ໃນວັນທີ 12 ກໍລະກົດນີ້, ກະຊວງໂຍທາທິການ ແລະ ຂົນສົ່ງ ໄດ້ຈັດກອງປະຊຸມຄະນະຊີ້ນຳໂຄງການຂັ້ນສູນກາງກ່ຽວກັບການປັບປຸງ ແລະ ສ້ອມແປງເສັ້ນທາງຫລວງແຫ່ງຊາດ 13 ເຫນືອ, ໄລຍະສີເກີດຫາໂພນໂຮງ, ໂດຍການເປັນປະທານຂອງທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ.
ໂຄງການປັບປຸງໄລຍະເສັ້ນທາງດັ່ງກ່າວມີລວງຍາວ 58 ກິໂລແມັດ, ໂດຍຈະເລີ່ມລົງມືແຕ່ເດືອນມັງກອນ 2019 ຮອດປີ 2021 ໃຫ້ສໍາເລັດ ຈາກນັ້ນໃຫ້ຜູ້ຮັບເໝົາເປັນຜູ້ບູລະນະຮັກສາ 7 ປີ (2022-2028), ຊຶ່ງໄດ້ວ່າຈ້າງບໍລິສັດທີ່ປຶກສາ LCG ເພື່ອດຳເນີນການສຶກສາຜົນກະທົບດ້ານສິ່ງແວດລ້ອມ ແລະ ສັງຄົມແບບຄົບຊຸດ ແລະ ວ່າຈ້າງລັດວິສາຫະກິດວິສະວະກຳຄົມມະນາຄົມ (ລວຄ) ດຳເນີນວຽກສຳຫລວດ-ອອກແບບມາແຕ່ປີ 2015, ໂດຍການສະໜັບສະໜູນທີ່ປຶກສາຈາກທະນາຄານໂລກຜ່ານການກະກຽມ ແລະ ປຶກສາຫາລືກັບຫລາຍພາກສ່ວນ, ຊຶ່ງມາຮອດເດືອນສິງຫາ 2017 ລັດຖະບານເຫັນດີດ້ານຫລັກການຮັບຮອງເອົາໂຄງການ ແລະ ເຫັນດີມອບໃຫ້ກະຊວງການເງິນທາບທາມເງິນກູ້ຈາກສະຖາບັນການເງິນສາກົນຄື: ທະນາຄານໂລກ, ກອງທຶນນໍດິກ ແລະ ທະນາຄານການລົງທຶນໂຄງລ່າງພື້ນຖານອາຊີ ຄາດວ່າຈະມີມູນຄ່າປະມານ 128 ລ້ານໂດລາສະຫະລັດ ຫລື ປະມານ 10 ພັນກວ່າຕື້ກີບ
ໃນນີ້ທະນາຄານໂລກໃຫ້ທຶນ 40 ລ້ານໂດລາສະຫະລັດ ແລະ ໄດ້ເຈລະຈາຜ່ານຜູ້ບໍລິຫານທະນາຄານໂລກແລ້ວ, ຊຶ່ງຈະໄດ້ເຊັນສັນຍາກູ້ຢືມໃນເດືອນສິງຫາ 2018, ກອງທຶນນໍດິກໃຫ້ທຶນ 9,5 ລ້ານໂດລາສະຫະລັດ ເພື່ອຈ້າງທີ່ປຶກສາຄຸມງານກໍ່ສ້າງ, ວຽກຕ້ານໄພພິບັດ ແລະ ຈ່າຍຄ່າຊົດເຊີຍສິ່ງກິດຂວາງ, ທະນາຄານລົງທຶນໂຄງລ່າງພື້ນຖານອາຊີຈະສະໜັບສະໜູນ 40 ລ້ານໂດລາສະຫະລັດ ແລະ ລັດຖະບານລາວ 38,5 ລ້ານໂດລາສະຫະລັດ ຫລື ປະມານ 310 ຕື້ກີບ. ໃນນີ້ 14,5 ລ້ານໂດລາສະຫະລັດຈ່າຍຄ່າຊົດເຊີຍ ແລະ 24 ລ້ານໂດລາສະຫະລັດຈ່າຍໃນໄລຍະບູລະນະຮັກສາ. ນອກຈາກມູນຄ່າ 128 ລ້ານໂດລາສະຫະລັດນີ້ແລ້ວ, ທະນາຄານການລົງທຶນໂຄງລ່າງພື້ນຖານອາຊີຍັງໃຫ້ງົບກອງທຶນພິເສດ ເພື່ອຈ້າງທີ່ປຶກສາຊ່ວຍວຽກໄກ່ເກ່ຍສິ່ງກິດຂວາງ ແລະ ກະກຽມສຳຫລວດອອກແບບໄລຍະທາງແຕ່ ກິໂລແມັດ 21 ນະຄອນຫລວງວຽງຈັນ ຫາ ກິໂລແມັດ 71 ເພີ່ມອີກຈຳນວນ 995.000 ໂດລາສະຫະລັດ
No comments:
Post a Comment