ຂປລ. ໃນວັນທີ 23 ຕຸລາ 2017 ຢູ່ສູນການຮ່ວມມືສາກົນ ແລະ ການຝຶກອົບຮົມ, ສະຖາບັນການຕ່າງປະເທດ, ກົມຈັດຕັ້ງ ແລະ ພະນັກງານ ກະຊວງການຕ່າງປະເທດ ຮ່ວມກັບສະຖາບັນການເມືອງ-ການປົກຄອງແຫ່ງຊາດ ໄດ້ເປີດຊຸດຝຶກອົບຮົມ ທິດສະດີການເມືອງ-ການປົກຄອງ ໄລຍະສັ້ນ 45 ວັນ, ຊຸດທີ II ໃຫ້ບັນດາສະມາຊິກພັກ, ພະນັກງານຫລັກແຫລ່ງ ພາຍໃນກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ, ໂດຍການເປັນປະທານຂອງທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີ ກະຊວງການຕ່າງປະເທດ, ທ່ານ ສະໝຸດທອງ ສົມພານິດ ຮອງຫົວໜ້າສະຖາບັນການເມືອງ-ການປົກຄອງແຫ່ງຊາດ, ມີບັນດາຄູອາຈານຈາກສະຖາບັນການເມືອງ-ການປົກ ຄອງແຫ່ງຊາດ ແລະ ບັນດາຜູ້ຕາງໜ້າຈາກກົມຕ່າງໆ ພາຍໃນກະຊວງການຕ່າງປະເທດ, ຄະນະພົວພັນການຕ່າງປະເທດສູນກາງພັກ ເຂົ້າຮ່ວມ.
ໃນການຝຶກອົບຮົມຄັ້ງນີ້, ຜູ້ເຂົ້ຮ່ວມຈະໄດ້ຍົກລະດັບຄວາມຮູ້ພື້ນຖານ ດ້ານທິດສະດີການເມືອງ-ການປົກຄອງ, ຄົ້ນຄວ້າຮ່ຳຮຽນທິດສະດີມາກ-ເລນິນ, ແນວທາງການປ່ຽນແປງໃໝ່ຂອງພັກ ໃນແຕ່ລະໄລຍະ. ຈຸດປະສົງ ກໍເພື່ອແນໃສ່ໃຫ້ພະນັກງານນຳພາ-ຄຸ້ມຄອງ, ພະນັກງານສືບທອດ ກໍຄື ບັນດາສະມາຊິກພັກ, ພະນັກງານຫລັກແຫລ່ງ ມີວິທີການເຮັດວຽກທີ່ຖືກຕ້ອງ ແລະ ຮູ້ໝູນໃຊ້ບັນດາບົດຮຽນດັ່ງ ກ່າວ, ເຂົ້າໃນໜ້າທີ່ວຽກງານຂອງຕົນ. ຊຸດຝຶກອົບດັ່ງກ່າວ, ຈະດຳເນີນໄປເຖິງວັນທີ 22 ທັນວາ 2017 ຊຶ່ງມີຜູ້ເຂົ້າຮ່ວມທັງໝົດ 47 ທ່ານ, ຍິງ 13 ທ່ານ.
ທ່ານ ແສງເພັດ ຮຸ່ງບຸນຍວງ ກ່າວວ່າ: ການຝຶກອົບຮົມຄັ້ງນີ້ ແມ່ນການຜັນຂະຫຍາຍມະຕິ ຂອງກອງປະຊຸມ ວຽກງານການຕ່າງປະເທດ ຄັ້ງທີ 13 ແລະ ແຜນບຳລຸງ-ກໍ່ສ້າງພະນັກງານຂອງກະ ຊວງການຕ່າງປະເທດ ເພື່ອເຮັດໃຫ້ການ ປະຕິບັດວຽກງານພາຍໃນກະຊວງ ໃຫ້ມີປະສິດທິຜົນສູງຂຶ້ນກວ່າເກົ່າ ຕາມຄຳຂວັນທີ່ວ່າ: ຍົກສູງຄວາມສາມາດ, ລັກສະນະນຳໜ້າ ແລະ ຄວາມເປັນເຈົ້າການຂອງພະນັກງານ ໃນຂະແໜງການຕ່າງປະເທດ ຕໍ່ການປະຕິບັດແນວທາງ ການຕ່າງ ປະເທດ. ພ້ອມດຽວກັນນີ້, ກໍເພື່ອສ້າງໃຫ້ບັນດາສະມາຊິກພັກ, ພະນັກງານນຳພາ-ຄຸ້ມຄອງ ມີທັດສະນະຫລັກໝັ້ນຊົນຊັ້ນໜັກແໜ້ນ, ມີຄຸນສົມບັດສິນທຳປະຕິວັດ ແລະ ແນວຄິດອຸ່ນອ່ຽນທຸ່ນທ່ຽງ, ເຊື່ອໝັ້ນຕໍ່ການນຳພາຂອງພັກ, ມີແບບແຜນ ດຳລົງຊີວິດ ທີ່ປອດໃສ ແລະ ມີວິທີການເຮັດວຽກທີ່ຖືກຕ້ອງ. ນອກຈາກນີ້, ກໍເພື່ອປະຕິບັດແຜນພັດທະນາ ຊັບພະຍາກອນມະນຸດ ຂອງກະຊວງການຕ່າງປະເທດໃຫ້ບັນລຸຕາມຄາດໝາຍທີ່ວາງໄວ້.
ຂ່າວ: ມະນີທອນ, ພາບ: ສະຫວາດ
No comments:
Post a Comment