ນັກສຶກສາຄະນະວິທະຍາສາດສັງຄົມ ຄະນະສະຖາປັດຕະຍະກຳສາດ ແລະ ຄະນະອັກສອນສາດ ຈຳນວນ 60 ຄົນ ທີ່ທຸກຍາກແຕ່ມີຜົນການຮຽນດີ ໄດ້ຮັບການຊ່ວຍເຫຼືອຈາກທ່ານ ຄິມ ໂຮກອງ ທີ່ປຶກສາບໍລິສັດບັນຊີມະຫາຊົນ ສ ເກົາຫຼີ ເຊິ່ງການຊ່ວຍເຫຼືອຄັ້ງນີ້ ພາຍໃຕ້ໂຄງການຮ່ວມມືເສີມສ້າງຂີດຄວາມສາມາດດ້ານການພັດທະນາຊຸມຊົນ-ຊົນນະບົດ ຕາມທິດ 3 ສ້າງ ແລະ ແຊມາອຶນອຸນດົງ.
ພິທີມອບ-ຮັບທຶນການສຶກສາຄັ້ງນີ້ ມີຂຶ້ນວັນທີ 11 ຕຸລາ 2017 ຢູ່ທີ່ມະຫາວິທະຍາໄລແຫ່ງຊາດ ມີທ່ານ ພຸດ ສິມມາລາວົງ ຮອງອະທິການບໍດີ ມະຫາວິທະຍາໄລແຫ່ງຊາດ ທ່ານ ຄິມ ໂຮກອງ ພ້ອມດ້ວຍອາຈານ-ນັກສຶກສາກ່ຽວຂ້ອງເຂົ້າຮ່ວມ ສຳລັບແຜນງານສະໜັບສະໜູນທຶນການສຶກສາໃຫ້ແກ່ນັກສຶກສາທີ່ທຸກຍາກ ແຕ່ຜົນການຮຽນດີ ໄດ້ຈັດຕັ້ງປະຕິບັດແຕ່ສົກປີ 2016-2017 ເປັນຕົ້ນມາ ຈຳນວນ 50 ທຶນ ທຶນລະ 200.000 ກີບ/ເດືອນ (ນັບແຕ່ເດືອນ 4-8 ເທົ່າກັບ 5 ເດືອນ) ລວມເປັນເງິນທັງໝົດ 50 ລ້ານກີບ ແລະ ສຳລັບສົກປີ 2017-2018 ໄດ້ເພີ່ມເປັນ 60 ທຶນ ໃນນັ້ນ 35 ທຶນມອບໃຫ້ນັກສຶກສາຄະນະວິທະຍາສາດສັງຄົມ ຄະນະສະຖາປັດຕະຍະກຳສາດ 20 ທຶນ ແລະ 5 ທຶນ ຄະນະອັກສອນສາດ ມູນຄ່າ 144 ລ້ານກີບ.
ທ່ານ ຄິມ ໂຮກອງ ກ່າວວ່າ: ທຶນການສຶກສານີ້ ມີລັກສະນະພິເສດກວ່າທຶນການສຶກສາທົ່ວໄປ ນອກຈາກຈະເປັນການສົ່ງເສີມ ແລະ ຫຼຸດຜ່ອນຄ່າໃຊ້ຈ່າຍຈາກຄອບຄົວແລ້ວ ທຶນດັ່ງກ່າວຍັງແນໃສ່ເຮັດໃຫ້ນັກສຶກສາມີຄວາມເຂົ້າໃຈ ແລະ ປູກຈິດສຳນຶກ ມີວິໄນໃນການໃຊ້ຈ່າຍເງິນ ສ້າງໃຫ້ນັກສຶກສາມີຄວາມຮັບຜິດຊອບ ສາມາດເຮັດບັນຊີລາຍຮັບ-ລາຍຈ່າຍປະຈຳວັນ ໂດຍໂຄງການໄດ້ມອບປຶ້ມບັນທຶກ ເພື່ອຕິດຕາມລາຍລະອຽດຂອງລາຍຮັບ ແລະ ຄ່າໃຊ້ຈ່າຍຊີວິດປະຈຳວັນ ໂດຍທຸກໆເດືອນ ນັກສຶກສາຕ້ອງນຳເອົາປຶ້ມບັນທຶກດັ່ງກ່າວມາໃຫ້ຄະນະຮັບຜິດຊອບກວດກາ ທັງນີ້ ເພື່ອນຳໄປຖອດຖອນບົດຮຽນ ແລະ ພ້ອມກັນປັບປຸງໃຫ້ດີຂຶ້ນເປັນກ້າວໆ.
No comments:
Post a Comment