ຈີນ ສະເຫນີຊ້ອມຮົບສຳຫລວດພະລັງງານໃນທະເລຈີນໃຕ້ກັບ ອາຊຽນ

ສຳນັກຂ່າວຕ່າງປະເທດລາຍງານຈາກປະເທດສິງກະໂປເມື່ອວັນທີ່ 3 ສິງຫາວ່າ ທ່ານວິວຽນ ວາລາກິສນັນ ລັດຖະມົນຕີວ່າການກະຊວງການຕ່າງປະເທດສິງກະໂປ ໃນຖານະປະທານໝຸນວຽນຂອງສະມາຄົມປະຊາຊາດແຫ່ງເອຊຽນຕາເວັນອອກສ່ຽງໃຕ້ (ອາຊຽນ) ປະຈຳປີນີ້ ກ່າວເມື່ອວັນພະຫັດວ່າລັດຖະບານຈີນ ແລະອາຊຽນເຫັນຊອບຮ່ວມກັນໃນຮ່າງກອບການເຈລະຈາແນວທາງປະຕິວັດ (ຊີໂອຊີ) ເລື່ອງທະເລຈີນໃຕ້ ເພື່ອການຕັ້ງຢູ່ເທີງສັນຕິພາບ ສະຖຽນລະພາບ ແລະຄວາມເຊື່ອຫມັ້ນ ອັນຈະນຳໄປສູ່ການເກີດຂະບວນການຄວາມຮ່ວມມືລະຫວ່າງທັງສອງຝ່າຍ ໃນການແກ້ໄຂຄວາມຂັດແຍ່ງເລື່ອງທະເລຈີນໃຕ້ຢ່າງເປັນລະບົບ

ສຳລັບມະຕິເຫັນດີຮ່ວມກັນດັ່ງກ່າວຈະຖືເປັນແນວທາງການເຈລະຈາໃນລຳດັບຕໍ່ໄປ ແມ່ນວ່າສິງກະໂປຍັງຂໍສະຫງວນຂໍ້ມູນໂດຍລວມໄວ້ກ່ອນ ແຕ່ມີລາຍງານວ່າຮ່າງເອກະສານເຜີຍໃຫ້ເຫັນເຖິງທົດສະຕະວັດຂອງແຕ່ລະປະເທດໃນເລື່ອງທະເລຈີນໃຕ້ ແລະທ່າທີຂອງແຕ່ລະຝ່າຍໃນການຕໍ່ລອງ ໂດຍຫວຽດນາມສະແດງຈຸດຢືນຊັດເຈນທີ່ສຸດ ດ້ວຍການຢືນການວ່າ “ທຸກປະເທດ” ຕ້ອງຢຸດກິດຈະກຳທາງທະຫານແລະການຖົ່ມທະເລເພື່ອສ້າງເກາະທຽມໃນທະເລຈີນໃຕ້ ສະນັ້ນການທີ່ທ່າຂອງສະມາຊິກອາຊຽນອີກ 9 ປະເທດທີ່ເຫຼືອກັບຍັງບໍ່ຊັດເຈນພຽງພໍ ບົ່ງຊີ້ເຖິງ “ຄວາມໄດ້ປຽບ” ແລະອິດທິພົນຂອງລັດຖະບານຈີນທີ່ຍັງຄົງຢູ່ໃນລະດັບເຫນືອກວ່າ

ຂະນະທີ່ໃນສ່ວນຂໍ້ສະເຫນີຂອງຈີນເພື່ອຄີ່ຄາຍຄວາມຂັດແຍ່ງທາງທະເລກັບອາຊຽນ ມີທັງການສະເຫນີຊ້ອມຮົບທາງທະເລຮ່ວມກັນ ໂດຍປາສະຈາກບຸກຄົນພາຍນອກ ແລະການຈັດຕັ້ງໂຄງການຄວາມຮ່ວມມືສຳລວດສັບພະຍາກອນທຳມະຊາດໃນທະເລຈີນໃຕ້ຮ່ວມກັນອີກດ້ວຍ ແຕ່ຜູ້ຊ່ຽວຊານເບີ່ງວ່າເປັນເຈດຕະນາແອບແຝງຂອງຈີນເພື່ອເພີ່ມການແຊກຊຶມເຂົ້າສູ່ທະເລຈີນໃຕ້ຫຼາຍກວ່າ ທັງນີ້ ການເຈລະຈາຊີໂອຊີຖືເປັນການຕໍ່ຍອດຈາກຖະແຫລງການວ່າດ້ວຍແນວປະຕິບັດຂອງພາຄີໃນທະເລຈີນໃຕ້ (ດີໂອຊີ) ວ່າດ້ວຍການຈັດການດ້ານຄວາມຫມັ້ນຄົງໃນທະເລຈີນໃຕ້ ທີ່ມີການລົງນາມຮ່ວມກັນເມື່ອປີ 2002

ຢ່າງໃດກໍ່ຕາມ ແນວທາງປະຕິບັດຕາມເອກະສານດັ່ງກ່າວກັບແທບບໍ່ໄດ້ຮັບການຕອບສະຫນອງຈາກປະເທດທີ່ຮ່ວມລົງນາມ ຊື່ງຍັງຄົງຖົມທະເລເພື່ອກໍ່ສ້າງເກາະທຽມສຳລັບການຈັດວາງສິ່ງປູກສ້າງ ແລະການເດີນຫນ້າສຳຫລວດແຫຼ່ງພະລັງງານ ແລະການເຮັດປະມົງບໍລິເວນອານາເຂດທາງທະເລທີ່ທັບຊ້ອນກັນ ຂະນະທີ່ທັງຈີນ ແລະອາຊຽນຕ່າງຍັງຄົງສະຫງວນທ່າທີມາຕະຫຼອດ ໃນການກຳນົດກອບໄລຍະເວລາທີ່ຊັດເຈນສຳລັບການຈັດເຮັດຊີໂອຊີ

ອານື່ງ ການເປີດເຜີຍຄວາມຄືບຫນ້າຂອງການເຈລະຈາຊີໂອຊີເລື່ອງທະເລຈີນໃຕ້ໂດຍສິງກະໂປ ທີ່ໃນຄວາມເປັນຈິງມີການເຫັນພ້ອງກັນຕັ້ງແຕ່ເດືອນມິຖຸນາທີ່ຜ່ານມາ ເກີດຂື້ນໃນເວລາດຽວກັບທີ່ທ່ານໄມເຄິລ ປອມເປໂອ ລັດຖະມົນຕີກະຊວງການຕ່າງປະເທດອາເມລິກາ ເລີ່ມການເດີນສາຍຢ້ຽມຢາມພູມມິພາກເອເຊຍຕາເວັນອອກສຽງໃຕ້ ໂດຍມາເລເຊຍຄືຈຸດຫມາຍແຫ່ງທຳອິດ ຕໍ່ຈາກນັ້ນຈະເຂົ້າຮ່ວມການປະຊຸມອາຊຽນທີ່ສິງກະໂປໃນຊ່ວງທ້າຍອາທິດນີ້ ແລະປິດທ້າຍພາລະກິດດ້ວຍການຢ້ຽມຢາມອິນໂດເນເຊຍ