ຣັດເຊຍປະຕິບັດການໂຈມຕີທາງອາກາດຖະຫຼົ່ມກະບົດໃນເຂດພາກໃຕ້ຂອງຊີເຣຍ

ສຳນັກຂ່າວຕ່າງປະເທດລາຍງານຈາກນະຄອນດາມັສກັສປະເທດຊີເຣຍເມື່ອວັນທີ່ 24 ມິຖຸນາວ່າ ອົງກອນສັງເກດການດ້ານສິດທິມະນຸດຊະຍະຊົນຊີເຣຍ (ເອສໂອເອຊອາຣ) ລາຍງານວ່າເຮືອບິນຮົບຂອງຣັດເຊຍ 5 ລຳຈາກຖານທັບອາກາດຣາໄມມິມ ໃນແຂວງລາຕາເກຍ ແຄມຝັ່ງທາງຕາເວັນຕົກຂອງຊີເຣຍປະຕິບັດການໂຈມຕີທາງອາກາດ 25 ຄັ້ງ ໃນເຂດບຸສຣາ ອັລ-ຣາຮີທາງຕາເວັນອອກສຽງເຫນືອຂອງເມືອງດາຮາ ຊື່ງເປັນເຂດອິດທິພົນຂອງຝ່າຍກະບົດພຽງບໍ່ກີ່ແຫ່ງທີ່ເຫຼືອຢູ່ໃນພາກຕາເວັນຕົກສຽງໃຕ້ຂອງຊີເຣຍເມື່ອວັນເສົາທີ່ຜາ່ນມາ

ທັງນີ້ ລາຍງານຂອງເອສໂອເອຊອາຣບໍ່ໄດ້ໃຫ້ລາຍລະອຽດທີ່ຊັດເຈນກ່ຽວກັບເຂດຄວາມເສຍຫາຍ ແຕ່ບໍ່ໄດ້ລະບຸວ່າເປັນຄັ້ງແລກໃນຮອບເກືອບ 1 ປີ ທີ່ກອງທັບຣັດເຊຍປະຕິບັດການທາງທະຫານບໍລິເວນນີ້ ນັບຕັ້ງແຕ່ມີຂໍ້ຕົກລົງຢຸດຍິງແບບໄຕພາຄີລະຫວ່າງອາເມລິກາ ກັບຣັດເຊຍ ແລະຈໍແດນ ໂດຍໄດ້ຮັບຄວາມສະໜັບສະໜູນຈາກທັງລັດຖະບານ ແລະຝ່າຍກະບົດເມື່ອເດືອນກໍລະກົດປີຜ່ານມາ ຢ່າງໃດກໍ່ຕາມ ເອສໂອເອຊອາຣວິເຄາະດ້ວຍວ່າປະຕິບັດການໂຈມຕີທາງອາກາດຂອງກອງທັບຣັດເຊຍໃນຄັ້ງນີ້ເປັນການເປີດທາງໃຫ້ກັບປະຕິບັດການພາກພື້ນດິນຂອງກອງທັບຊີເຣຍໃນການຢຶດບໍລິເວນດັ່ງກ່າວກັບຄືນຈາກກອງທັບປົດປ່ອຍຊີເຣຍ (ເອຟເອສເອ) ທີ່ອ່ອນກຳລັງລົງມາ ນອກຈາກນີ້ ພື້ນທີ່ດັ່ງກ່າວຍັງເປັນຈຸດເຊື່ອມຕໍ່ກັບຊາຍແດນຂອງຈໍແດນ ແລະທີ່ຮາບສູງໂກລັນ ຊື່ງເປັນພື້ນທີ່ພິພາດລະຫວ່າງຊີເຣຍກັບອິດສະຣາເອລດ້ວຍ

ແມ່ນວ່າອາເມລິກາສະແດງຄວາມບໍ່ພໍໃຈ ແລະເຕືອນຣັດເຊຍລວມເຖິງລັດຖະບານດາມັສກັສມາຕະຫຼອດ ໃນກໍລະນີທີ່ສະຖານະການສູ້ຮົບໃນພາກໃຕ້ຂອງຊີເຣຍທະວີຄວາມຮຸນແຮງ ເນື່ອງຈາກເປັນເຂດອິດທິພົນຂອງຝ່າຍກະບົດທີ່ລັດຖະບານວໍຊິງຕັນໃຫ້ຄວາມສະໜັບສະໜູນຢູ່ ຢ່າງໃດກໍ່ຕາມ ສະມາຊິກລະດັບສູງຂອງເອຟເອສເອເປີດເຜີຍກັບສຳນັກຂ່າວຣອຍເຕີ ກ່ຽວກັບການໄດ້ຮັບຈົດຫມາຍແຈ້ງຈາກລັດຖະບານວໍຊິງຕັນ ມີໃຈຄວາມພຽງວ່າ “ຢ່າຄາດຫວັງກັບຄວາມສະໜັບສະໜູນທາງທະຫານຈາກອາເມລິກາ ໃນການຮັບມືກັບການປະຕິບັດການທາງທະຫານຂອງກອງທັບຊີເຣຍ ແລະຣັດເຊຍ”