ມີ 2 ຄົນ ເສຍຊີວິດ ໃນການໂຈມຕີ ດ້ວຍມີດ ຢູ່ວັດອິສລາມ ໃນອາຟຣິກາໃຕ້

ມີ 2 ຄົນຖືກແທງເສຍຊີວິດ ໃນການໂຈມຕີວັດສາສະໜາອິສລາມ ຢູ່ອາຟຣິກາໃຕ້ ໃນ
ວັນພະຫັດມື້ນີ້ ແລະມີອີກຫຼາຍໆຄົນໄດ້ຮັບບາດເຈັບ ກ່ອນທີ່ຜູ້ໂຈມຕີ ຈະຖືກຕຳຫຼວດ
ຍິງຕາຍ.

ການໂຈມຕີດັ່ງກ່າວມີຂຶ້ນ ທີ່ເມືອງມາລແມັສບູຣີ (Malmesbury) ໃກ້ໆກັບນະຄອນ
ເຄບທາວນ໌. ຕຳຫຼວດກ່າວວ່າ ຜູ້ໂຈມຕີ ຊຶ່ງເຊື່ອວ່າ ມີອາຍຸປະມານ 30 ກວ່າປີ ຍັງຢູ່
ໃນບໍລິເວນເກີດເຫດແລະຍັງມີອາວຸດຢູ່ໃນມືເວລາຕຳຫຼວດໄປເຖິງ. ຜູ້ກ່ຽວບໍ່ໄດ້ເອົາ
ຫົວຊາຕໍ່ຄຳສັ່ງໃຫ້ຍອມມອບອາວຸດ ແລະໄດ້ຖືກຍິງຕາຍ ຫລັງຈາກລາວ ຫາທາງທີ່ຈະ
ໂຈມຕີຕຳຫຼວດ.

ຍັງບໍ່ມີການແຈ້ງໃຫ້ຊາບວ່າ ຜູ້ໂຈມຕີມີຈຸດປະສົງຫຍັງແທ້.

ເຫດຮ້າຍໃນວັນພະຫັດມື້ນີ້ ເກີດຂຶ້ນນຶ່ງເດືອນ ຫລັງຈາກມີຄົນນຶ່ງໄດ້ຖືກຂ້າຕາຍ
ແລະ ອີກ 2 ຄົນບາດເຈັບ ໃນການໂຈມຕີທີ່ຄ້າຍຄືກັນນີ້ ຢູ່ທີ່ວັດອິສລາມ ໃນເມືອງ
ເວຣູລາມ ທີ່ຕັ້ງຢູ່ໃນເຂດຊານເມືອງຂອງນະຄອນເດີບັນ ທາງພາກຕາເວັນອອກ
ຂອງອາຟຣິກາໃຕ້. ຍັງບໍ່ມີການຈັບກຸມຜູ້ຕ້ອງສົງໄສໃດໆເທື່ອ ກ່ຽວກັບຄະດີນີ້.