ຂປລ. ເຈົ້າໜ້າທີ່ສາມາດ ຄວບຄຸມໄຟໃໝ້ສະໜາມຂີ້ເຫຍື້ອ ຢູ່ຫລັກ 32 ບ້ານນາຜາສຸກ ເມືອງໄຊທານີ ນະຄອນຫລວງວຽງຈັນ ໄດ້ແລ້ວ. ພາຍຫລັງທີ່ໄຟເລີ່ມໃໝ້ມາແຕ່ຕອນບ່າຍ ຂອງວັນທີ 4 ມີນາ 2018 ທີ່ຜ່ານມາ ແລະ ຄາດໃຫ້ສໍາເລັດ ໃນໄວໆນີ້.
ທ່ານ ບົວຄໍາ ພະກະຊຸມ ຮອງຫົວໜ້າ ກອງບໍລິການຂົນສົ່ງຂີ້ເຫຍື້ອ, ຜູ້ຊີ້ນໍາວຽກງານ ພາກສະໜາມບໍາບັດຂີ້ເຫຍື້ອ ຫລັກ 32 ກ່າວວ່າ: ເມື່ອວັນທີ 4 ມີນາ ຜ່ານມາ ໄດ້ມີຄົນຈູດປ່າແລ້ວເຮັດໃຫ້ໄຟດັ່ງກ່າວ, ລາມເປັນວົງກວ້າງ ເຂົ້າໄປໃນສະໜາມເກັບຂີ້ເຫຍື່ອ ຈົນເກີດເປັນອັກຄີໄຟ ຢ່າງຮຸນແຮງ. ຕໍ່ກັບເຫດການດັ່ງກ່າວນີ້, ທາງຄະນະອໍານາດການປົກຄອງ ກໍໄດ້ມີການ ແຕ່ງຄະນະຮັບຜິດຊອບທຸກພາກສ່ວນ ເຂົ້າມາປະຕິບັດຫາວິທີ ໃນການມອດໄຟ ທີ່ຈະເປັນຜົນກະທົບ ຕໍ່ປະຊາຊົນ ແລະ ສິ່ງແວດລ້ອມ. ເຊິ່ງໃນການຈັດຕັ້ງປະຕິບັດ ເບື້ອງຕົ້ນ ທາງຄະນະຮັບຜິດຊອບ ກໍໄດ້ ມີການລະດົມລົດດັບເພິງມາຊິດນໍ້າ ເພື່ອເຂົ້າສະກັດກັ້ນ. ມາຮອດປັດຈຸບັນສາມາດ ມອດໄຟໄດ້ສໍາເລັດ ແລະ ພວກເຮົາກໍໄດ້ຮັບການຮ່ວມມື ກັບຫລາຍພາກສ່ວນພາກລັດ ແລະ ເອກະຊົນ ໃນການປະກອບສ່ວນ ກົນຈັກ ເຂົ້າມາຊ່ວຍເຫລືອ ຕໍ່ບັນຫາຄວັນໄຟ ທີ່ສົ່ງກິ່ນເໝັນ ທີ່ຈະກະທົບຕໍ່ ສິ່ງແວດລ້ອມ ແລະ ປະຊາຊົນທີ່ຢູ່ອ້ອມຂ້າງນັ້ນ, ໂດຍໄດ້ໃຊ້ວິທີການ ຈົກດິນຖົມກົບເປັນໜ້າ ເພື່ອດັບກິ່ນລະອອງຄວັນ ສໍາເລັດໄປແລ້ວ 20% ແລະ ຄາດໃຫ້ສໍາເລັດໃນໄວໆ ນີ້. ສະໜາມດັ່ງກ່າວ, ລວມມີເນື້ອທີ່ປະມານ 30 ກວ່າເຮັກຕາ, ມີບໍ່ບໍາບັດຂີ້ເຫຍື້ອ 12 ບໍ່ ແລະ ເກີດໄຟໃໝ້ໄປແລ້ວ 10 ບໍ່.
ໃນໂອກາດນີ້, ທ່ານ ແກ້ວພິລາວັນ ອາໄພລາດ ຮອງເຈົ້າຄອງ ນະຄອນຫລວງວຽງຈັນ, ໄດ້ໃຫ້ຮູ້ຕື່ມວ່າ: ພາຍຫລັງ ທີ່ໄດ້ເກີດອັກຄີໄຟດັ່ງກ່າວນັ້ນ, ທາງຄະນະພັກ ອໍານາດ ການປົກຄອງນະຄອນຫລວງວຽງຈັນ, ທຸກພາກສ່ວນກໍໄດ້ເອົາໃຈໃສ່ ໃນການປະຕິບັດໜ້າທີ່ ຢ່າງເຄັ່ງຮ້ອນ ແລະ ໄດ້ມີການແບ່ງຄວາມຮັບຜິດຊອບ ກັນຢ່າງລະອຽດ ເພື່ອຫາວິທີແກ້ໄຂ ໃຫ້ທັນສະພາບການ ແລະ ກັບຄືນ ສູ່ສະພາບເດີມ. ສະນັ້ນ, ໃນໄລຍະນີ້ ຂໍຮຽກຮ້ອງໃຫ້ພໍ່ແມ່ປະຊາຊົນ ໃຫ້ເອົາໃຈໃສ່ຮັກສາສຸຂະພາບ ຕາມການແນະນໍາ ຢູ່ແຕ່ລະບ້ານ ແລະ ໃນໄລຍະລະດູແລ້ງນີ້ ຂໍຮຽກຮ້ອງມາຍັງ ພໍ່ແມ່ປະຊາຊົນ ທຸກບ້ານ, ທຸກເຂດ ຈົ່ງເປັນເຈົ້າການ ນໍາກັນ ປະຕິບັດຕາມລະບຽບແຈ້ງການ ຂອງເມືອງ ກ່ຽວກັບຫ້າມບໍ່ໃຫ້ຈູດປ່າ, ເພື່ອຫາອາຫານ ຫລື ເພື່ອຈຸດປະສົງເຮັດອານາໄມ ຖາງຮົ້ວສວນ, ຖ້າຫາກວ່າພົບເຫັນ ຈະໃຫ້ເຈົ້າໜ້າທີ່ ປະຕິບັດດໍາເນີນຄະດີຕາມລະບຽບກົດໝາຍ.
No comments:
Post a Comment