ຂປລ. ໃນວັນທີ 16 ມີນາ 2018 ທີ່ສໍານັກງານ ນາຍົກລັດຖະມົນຕີ ທ່ານ ບຸນທອງ ຈິດມະນີ ຮອງ ນາຍົກລັດຖະມົນຕີ, ປະທານ ກວດກາລັດຖະບານ, ຫົວໜ້າ ອົງການຕ້ານການສໍ້ລາດບັງຫລວງ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ ຕາເກຊິ ຮິກິຮາຣະ ເອກອັກຄະຣາຊະທູດ ວິສາມັນຜູ້ມີອຳນາດເຕັມ ແຫ່ງ ປະເທດຍີ່ປຸ່ນ ປະຈໍາ ສປປ ລາວ ເພື່ອລາຍງານ ກ່ຽວກັບໂຄງການ ຮ່ວມມືຊ່ວຍເຫລືອ ສປປ ລາວ ຂອງຍີ່ປຸ່ນ ໃນ ປັດຈຸບັນ, ໂດຍສະເພາະ ໂຄງການພັດທະນາທ້ອງຖິ່ນ ແລະ ຈະສະເໜີແລກປ່ຽນ ຄໍາຄິດຄໍາເຫັນ ກ່ຽວກັບຄວາມຮຽກຮ້ອງຕ້ອງ ການຂອງຝ່າຍລາວ ເພື່ອຮ່ວມມື ໃນຂົງເຂດການກວດກາ ລັດຖະບານ ແລະ ການຕ້ານການ ສໍ້ລາດບັງຫລວງ.
ໃນໂອກາດນີ້, ທ່ານ ບຸນທອງ ຈິດມະນີ ໄດ້ສະແດງ ຄວາມຊົມເຊີຍ ຍິນດີຕ້ອນຮັບ ແລະ ຕີລາຄາສູງ ຕໍ່ທ່ານ ຕາເກຊິ ຮິກິຮາຣະ ໃນຄັ້ງນີ້. ເຊິ່ງມີຄວາມໝາຍຄວາມສຳຄັນ ເປັນຢ່າງຍິ່ງ, ທັງເປັນການປະກອບສ່ວນ ສຳຄັນ ເຂົ້າໃນການພົວພັນຮ່ວມມື ຕໍ່ສາຍພົວພັນມິດຕະພາບ ແລະ ການຮ່ວມມືລະຫວ່າງ ສປປ ລາວ-ຍີ່ປຸ່ນ ທີ່ນັບມື້ນັບຂະຫຍາຍຕົວ ຂຶ້ນຢ່າງບໍ່ຢຸດຢັ້ງ ພາຍໃຕ້ການເປັນຄູ່ຮ່ວມ ຍຸດທະສາດ ສອງຝ່າຍໄດ້ຮັບຮອງ ການຍົກລະດັບສາຍພົວພັນ ໃນ ປີ 2015 ເຊິ່ງຈະສືບຕໍ່ ຂະຫຍາຍວົງກວ້າງເຂົ້າສູ່ລວງເລິກ ແລະ ເປັນຮູບປະທໍາ. ຂະນະດຽວກັນ, ທ່ານ ກໍໄດ້ສະແດງ ຄວາມຂອບໃຈ ແລະ ຮູ້ບຸນຄຸນ ຕໍ່ ລັດຖະບານ ແລະ ປະຊາຊົນຍີ່ປຸ່ນ ທີ່ໄດ້ໃຫ້ການ ຮ່ວມມື ແລະ ຊ່ວຍເຫລືອ ສປປ ລາວ ໃນໄລຍະຜ່ານມາ. ການຊ່ວຍເຫລືອ ເພື່ອການພັດທະນາ(ODA) ຂອງຍີ່ປຸ່ນ ຍັງເປັນອັນດັບ 1 ຂອງການຊ່ວຍເຫລືອ ຕ່າງປະເທດແກ່ ສປປ ລາວ ການຊ່ວຍເຫລືອດັ່ງກ່າວ ສາມາດ ຕອບສະໜອງຕາມຄວາມຮຽກຮ້ອງຕ້ອງການ ຕົວຈິງຂອງປະຊາຊົນລາວ ບັນດາເຜົ່າ, ໂດຍສະເພາະ ແມ່ນການປະຕິບັດແຜນພັດທະນາ ເສດຖະກິດ-ສັງຄົມ ຂອງ ສປປ ລາວ ແຕ່ລະໄລຍະ ເພື່ອສໍາເລັດ ນະໂຍບາຍຂອງລັດຖະບານ ທີ່ນໍາເອົາປະເທດຊາດ ໃຫ້ອອກຈາກສະຖານະພາບ ຄວາມດ້ອຍພັດທະນາ ໃນປີ 2020.
ໂອກາດດຽວກັນ, ທ່ານ ຕາເກຊິ ຮິກິຮາຣະ ໄດ້ສະແດງ ຄວາມຂອບໃຈຕໍ່ທ່ານ ບຸນທອງ ຈິດມະນີ ທີ່ໄດ້ສະຫລະ ເວລາອັນມີຄ່າ ໃຫ້ການຕ້ອນຮັບ ຢ່າງອົບອຸ່ນໃນຄັ້ງນີ້. ພ້ອມທັງໄດ້ແຈ້ງສະພາບ ໃນການສືບຕໍ່ ຮ່ວມມືເຊິ່ງກັນ ແລະ ກັນ ໃນວຽກງານຕ່າງໆ ລະຫວ່າງ ລາວ-ຍີ່ປຸ່ນ ໃຫ້ທ່ານຮອງນາຍົກລັດ ຖະມົນຕີໄດ້ຮັບຊາບ.
No comments:
Post a Comment