ໂຄງການກໍ່ສ້າງຂົວນໍ້າຂອງ ກ້ອນຕື່ນ - ຫ້ວຍແກ້ວ ເມືອງປາກທາ ແຂວງບໍ່ແກ້ວ, ເປັນໂຄງການທີ່ນອນຢູ່ໃນເສັ້ນທາງຫຼວງຂອງແຂວງບໍ່ແກ້ວ ໝາຍເລກ 2243 ສ້າງຂຶ້ນເພື່ອເຊື່ອມຈອດລະຫວ່າງບ້ານ ກ້ອນຕື່ນ - ຫ້ວຍແກ້ວ ເມືອງປາກທາ ແຂວງບໍ່ແກ້ວ ແລະ ເຊື່ອມຈອດຕິດຊາຍແດນເມືອງຄອບ ແຂວງໄຊຍະບູລີ. ເຊິ່ງເປັນເສັ້ນທາງທີ່ມີໄລຍະສັ້ນທີ່ສຸດຈາກແຂວງບໍ່ແກ້ວໄປສູ່ນະຄອນຫຼວງວຽງຈັນ ໂດຍຜ່ານແຂວງໄຊຍະບູລີ, ໂຄງການດັ່ງກ່າວມີໂຄງສ້າງອອກແບບເປັນຂົວປະສົມ, ພາກສ່ວນລຸ່ມເປັນເບຕົງເສີມເຫຼັກ, ມີ 8 ເສົາ, ໃນນີ້ເສົາກາງນໍ້າ 6 ເສົາ ແລະ ສ່ວນເທິງເປັນໂຄງສ້າງຂາງເຫຼັກ ມີ 7 ຊ່ວງ, ຊ່ວງກາງນໍ້າມີຄວາມຍາວ 110 ແມັດ, ຄວາມຍາວຂອງຂົວ 505 ແມັດ, ຄວາມກ້ວາງຂອງຂົວ 12 ແມັດ, ທາງລົດແລ່ນ 7,9 ແມັດ, ທາງຄົນຍ່າງກວ້າງເບື້ອງລະ 1,8 ແມັດ, ໜ້າຂົວປູດ້ວຍເບຕົງເສີມເຫຼັກ ແລະ ປູທັບດ້ວຍຢາງຂົວອັດສະຟານ ໜາ 5 ຊັງຕີແມັດ, ມີທາງເຂົ້າຂົວ 2 ສົ້ນ ຍາວທັງໜ້າ 3,2 ກິໂລແມັດ, ປູຢາງ 2 ຊັ້ນ, ກວ້າງ 9 ແມັດ, ມູນຄ່າການກໍ່ສ້າງທັງໝົດເກືອບ 300 ຕື້ກີບ, ໂດຍແມ່ນການລົງທຶນຂອງລັດຖະບານ ໄລຍະການກໍ່ສ້າງແມ່ນ 36 ເດືອນ ໂດຍເລີ່ມແຕ່ວັນທີ 12 ຕຸລາ 2017 – 12 ກັນຍາ 2020 ຮັບເໝົາກໍ່ສ້າງໂດຍລັດວິສາຫະກິດກໍ່ສ້າງຄົມມະນາຄົມ.
ພິທີເປີດໂຄງການກໍ່ສ້າງຂົວຂ້າມນໍ້າຂອງດັ່ງກ່າວ ແມ່ນໄດ້ຈັດຂື້ນໃນວັນທີ 2 ກຸມພາ 2018 ທີ່ເມືອງປາກທາ ເຂົ້າຮ່ວມໂດຍທ່ານ ບຸນທອງ ຈິດມະນີ ກໍາມະການກົມການເມືອງ ສູນກາງພັກ, ຮອງນາຍົກລັດຖະມົນຕີ, ມີທ່ານ ຄໍາພັນ ເຜີຍຍະວົງ ເຈົ້າແຂວງໆບໍ່ແກ້ວ, ມີທ່ານ ພົງສະຫວັນ ສິດທະວົງ ເຈົ້າແຂວງໆໄຊຍະບູລີ, ລັດຖະມົນຕີກະຊວງໂຍທາ ແລະ ຂົນສົ່ງ, ຫົວໜ້າກົມຂົວທາງ, ຫົວໜ້າພະແນກການທີ່ກ່ຽວຂ້ອງຈາກ 2 ແຂວງ ເຂົ້າຮ່ວມ.
No comments:
Post a Comment