​ເຈົ້າໜ້າທີ່​ເຜີຍ​ອຸປະຕິ​ເຫດ​ລົດ​ບັນທຸກ​ຕຳ​ຄົນ​ຕາຍ 4 ຄົນຢູ່​ຖະໜົນ 13 ​ໃຕ້​ແມ່ນຍ້ອນ​ຄົນ​ຂັບ​ຫລັບ​ໃນ.

ກົມ​ຕຳຫລວດ​ຈະລາຈອນ ໃຫ້​ຮູ້​ວ່າ: ຜ່ານຈາກ​ການ​ສືບສວນ-ສອບ​ສວນ ​ເບື້ອງຕົ້ນ​ສາ​ເຫດ​ຂອງ​ການ​ເກີດ​ອຸປະຕິ​ເຫດ​ລົດ​ບັນທຸກ 10 ລໍ້​ຕຳ​ຄົນ​ຕາຍ 4 ຄົນຢູ່ຖະໜົນ 13 ​ໃຕ້​ເຂດ​ບ້ານ​ເຊ​ບັ້ງ​ຫຽງ​ເມືອງສອງ​ຄອນ​ແຂວງສະຫວັນ​ນະ​ເຂດ ເມື່ອທ້າຍອາທິດຜ່ານມາ​ແມ່ນ​ຍ້ອນ​ຜູ້​ຂັບ​ຂີ່​ຫລັບ​ໃນ, ​ເຊິ່ງລົດ​ບັນທຸກ 10 ລໍ້ໝາຍ​ເລກ​ທະບຽນ ບກ 2628 ສະຫວັນ​ນະ​ເຂດ, ຂັບ​ຂີ່​ໂດຍ​ທ້າວ ຫງວຽນ ວັນ​ຢິງ ອາຍຸ 44 ປີສັນຊາດ​ຫວຽດນາມ ທີ່​ບັນທຸກ​ງົວມາຈາກ​ແຂວງຈຳປາ​ສັກ ສູ່​ແຂວງສະຫວັນ​ນະ​​ເຂດດ້ວຍ​ຄວາມ​ໄວ​ສູງ, ພໍ​ຮອດ​ຈຸດ​ເກີດ​ເຫດລົດ​ເກີດ​ເສຍ​ຫລັກ ຈຶ່ງ​ຕຳ​ເອົາ​ລົດຈັກ​ຂີ່​ຢູ່​ທາງໜ້າ​ເຊິ່ງຂັບ​ຂີ່ໂດຍ​ທ້າວ ວັນ​ທອງ ອາຍຸ 55 ປີ ​ແລະ ນາງ ກັນລະຍາ ອາຍຸ 54 ປີທັງ​ສອງຜົວ​ເມຍກັນຢູ່​ບ້ານ​ແກ້ງ​ຕະງານ ​ເມືອງສອງ​ຄອນ​ແຂວງສະຫວັນ​ນະ​​ເຂດ, ​ເຮັດ​ໃຫ້​ເສຍ​ຊີວິດ​ຄາ​ທີ່ ​ແລະ ລົດ​ຍັງ​ໄດ້​ຂ້າມ​ຟາກ​ທາງໄປ​ຕຳ​ເອົາ​ລົດຈັກ​ຂອງ​ທ້າວ ພູ​ເຂົາ​ທອງ ອາຍຸ 36 ປີທີ່​ຂີ່​ສວນ​ທາງ​ມາພ້ອມ​ກັບ​ເມຍ ​ແລະ ລູກ​ສາວຊື່​ນາງ ​ໃບ​ເຕີຍ ອາຍຸ 7 ປີ​ເຮັດ​ໃຫ້​ຜູ້ກ່ຽວ ​ແລະ ລູກ​ເສຍ​ຊີວິດ​ຄາ​ທີ່ ​ແລະ ດ້ວຍ​ຄວາມ​ຮຸນ​ແຮງ​ດັ່ງກ່າວ​ຍັງ​ໄດ້​ໄປ​ຕຳ​ເອົາ​ຄົນ​ຍ່າງ​ແຄມ​ທາງ ກ່ອນ​ຈະ​ມາ​ຕຳ​ເຂົ້າກຳ​ແພງ​ເຮືອນ​ປະຊາຊົນ​ໄດ້​ຮັບ​ຄວາມ​ເສຍ​ຫາຍ​ຫລາຍ​ສົມຄວນ.
ປັດຈຸບັນ,​ ​ເຈົ້າໜ້າທີ່​ໄດ້​ກັກ​ຕົວ​ຜູ້​ຂັບ​ຂີ່​ລົດ​ຄັນ​ດັ່ງກ່າວ​ເພື່ອ​ດຳ​ເນີນ​ຄະດີ​ຕາມ​ລະບຽບກົດໝາຍ.
ຂອບໃຈຂໍ້ມູນ © ShareKao