ຂປລ. ພິທີເຊັນສັນຍາ ຈັດຊື້ ແລະ ກໍ່ສ້າງ ຕິດຕັ້ງໂຄງການພັດທະນາລະບົບເຄືອຂ່າຍ FTTH, ໂທລະສັບມືຖື 2G ແລະ 4G ລະຫວ່າງ ບໍລິສັດ ອີທີແອລ ຈໍາກັດ ຫລື EPC( Engineering, Procurement, Construction ) ແລະ ບໍລິສັດ ຄອມບາ ເທເລຄອມ ຊິສເຕັມ (ປະເທດຈີນ) ຈໍາກັດໄດ້ຈັດຂຶ້ນໃນວັນທີ 29 ມັງກອນນີ້, ທີ່ສໍານັກງານໃຫຍ່ ບໍລິສັດ ອີທີແອລ ຈໍາກັດ ຕາງໜ້າລົງນາມໂດຍ ທ່ານ ວູ ຈ້ຽງເຊີງ (Wu Jiang Cheng), ຜູ້ອໍານວຍການໃຫຍ່ ບໍລິສັດ ອີທີແອລ ຈໍາກັດ ແລະ ທ່ານ ຈ່າງ ເຍ້ຈຸ່ນ (Zhang Yuejun) ຜູ້ອໍານວຍການ ບໍລິສັດ ຄອມບາ ເທເລຄອມ ຊິສເຕັມ (ປະເທດຈີນ) ຈໍາກັດ, ເຊິ່ງມີທ່ານ ບຸນສະເຫລີມໄຊ ເຄນນາວົງ ຮອງລັດຖະມົນຕີກະຊວງໄປຊະນີ, ໂທລະຄົມມະນາ ຄົມ ແລະ ການສື່ສານ, ປະທານສະພາບໍລິຫານ ບໍລິສັດ ອີທີແອລ ຈໍາກັດເຂົ້າຮ່ວມເປັນສັກຂີພິຍານ.
ໃນໂອກາດດັ່ງກ່າວ, ທ່ານ ວູ ຈ້ຽງເຊີງ ໄດ້ໃຫ້ຮູ້ວ່າ: ໂຄງການພັດທະນາອອກແບບ, ຈັດຊື້ ແລະ ກໍ່ສ້າງ ຕິດຕັ້ງລະບົບໂທລະຄົມ ໃຫ້ໄດ້ມາດຕະຖານສາກົນ ໄດ້ເປັນຂີດໝາຍສໍາຄັນ ໃນການພັດທະນາ ລະບົບເຄືອຂ່າຍ ແລະ ການບໍລິການ ດ້ານໂທລະຄົມຂອງບໍລິສັດ ອີທີແອລ ຈໍາກັດ,ໂຄງການດັ່ງກ່າວ ມີມູນຄ່າທັງໝົດ 110 ລ້ານໂດລາສະຫະລັດ. ພາຍຫລັງໂຄງການດັ່ງກ່າວສໍາເລັດ ຈະເຮັດໃຫ້ລູກຄ້າກໍຄືສັງຄົມ ໄດ້ສໍາພັດກັບການບໍລິການໃໝ່ ຄຸນນະພາບທີ່ດີຕາມມາດຕະຖານສາກົນ ລວມທັງລະບົບສຽງ, Data ແລະ ໂທລະສັບມືຖື 4G ຂອງບໍລິສັດ ອີທີແອລ ຈໍາກັດ.
ພ້ອມນີ້, ທ່ານ ຈ່າງ ເຍ້ຈຸ່ນ ກ່າວວ່າ: ບໍລິສັດຄອມບາ ເປັນບໍລິສັດນຳໜ້າດ້ານອຸປະກອນ ແລະເຕັກນິກດ້ານໂທລະຄົມໃນ ສປ ຈີນ, ໂດຍຈະສົ່ງວິຊາການ ສົມທົບກັບວິຊາການ ບໍລິສັດ ETL ຈໍາກັດ ເພື່ອພັດທະນາ ບໍລິສັດ ETL ໃຫ້ເປັນບໍລິສັດທີ່ນຳໜ້າ ແລະ ທັນສະໄໝທີ່ສຸດໃນ ສປປ ລາວ.
No comments:
Post a Comment