ຂປລ. ປັດຈຸບັນ ສະພາບການລົງທຶນ ຈາກຕ່າງປະເທດ ທີ່ເຂົ້າມາລົງທຶນ ຢູ່ ສປປ ລາວ ໃນຂະແໜງການຕ່າງໆ ໄດ້ເພີ່ມຂຶ້ນຢ່າງຕໍ່ເນື່ອງພາຍຫລັງ ທີ່ລັດຖະບານລາວ ໄດ້ເປີດກວ້າງ, ປັບປຸງບັນດານິຕິກຳ ແລະ ນະໂຍບາຍດ້ານຕ່າງໆ ເພື່ອສົ່ງເສີມການລົງທຶນ ຂອງຕ່າງປະເທດ ເຂົ້າມາລົງທຶນຢູ່ລາວ ໃນນັ້ນ ສປ ຈີນ ຖືເປັນປະເທດອັນດັບ 1 ທີ່ມີການລົງທຶນ ເກືອບທຸກຂະແໜງການ ຢູ່ສປປ ລາວ.
ທ່ານ ຊຸນເລ ປະທານສະພາການຄ້າຈີນ ປະຈຳ ສປປ ລາວ ໄດ້ໃຫ້ສຳພາດ ຕໍ່ນັກຂ່າວ ສຳນັກຂ່າວສານປະເທດລາວ ໃນວັນທີ 7 ພະຈິກ 2017 ນີ້ວ່າ: ປັດຈຸບັນນັກລົງທຶນ ຈາກ ສປ ຈີນ ເຂົ້າມາລົງ ທຶນຢູ່ ສປປ ລາວ ນັບແຕ່ປີ 2005 ເປັນຕົ້ນມາ ມີ 200 ກວ່າບໍລິສັດ ລົງທຶນໃນຫລາຍ ຂະແໜງການ ເປັນຕົ້ນແມ່ນ ຂະແໜງການບໍ່ແຮ່, ໄຟຟ້າ, ກະສິກຳ, ອຸດສາຫະກຳ, ທຸລະກິດບໍລິການ ແລະ ອື່ນໆ. ສ່ວນດ້ານການຄ້າ ສປ ຈີນ ເປັນປະເທດຄູ່ຮ່ວມການຄ້າໃຫຍ່ ອັນດັບ 2 ຂອງລາວ, ເຊິ່ງສິນຄ້າສົ່ງອອກ ທີ່ໄດ້ຮັບ ຄວາມນິຍົມສູງ ຈາກປະຊາຊົນຈີນ ໃນປັດຈຸບັນ ແມ່ນເບຍລາວ ແລະ ເຂົ້າຈ້າວ, ນອກນັ້ນ, ຍັງມີ ຜະລິດຕະພັນໄມ້, ທອງ ແລະ ຢາງພາລາ. ສ່ວນສິນຄ້ານຳເຂົ້າ ຈາກ ສປ ຈີນ ຕົ້ນຕໍ ມີ ເຄື່ອງໄຟຟ້າ, ເຄື່ອງຈັກ, ອາໄລລົດ ແລະ ອື່ນໆ.
ທ່ານ ຊຸນເລ ໃຫ້ຮູ້ຕື່ມວ່າ: ປັດຈຸບັນ ການລົງທຶນ ຂອງນັກລົງທຶນຈີນ ຢູ່ ສປປ ລາວ ມີບາດກ້າວຂະຫຍາຍຕົວ ແລະ ເພີ່ມຂຶ້ນຢ່າງຕໍ່ເນື່ອງ ອັນພົ້ນເດັ່ນແມ່ນ ໂຄງການກໍ່ສ້າງ ເສັ້ນທາງລົດໄຟ ລາວ-ຈີນ ທີ່ພວມດຳເນີນ ການກໍ່ສ້າງໃນປັດຈຸບັນ ພາຍຫລັງ ທີ່ໂຄງການດັ່ງກ່າວສຳເລັດ ຈະເຮັດໃຫ້ການນຳເຂົ້າ ແລະ ສົ່ງອອກສິນຄ້າ ລະຫວ່າງ ສອງປະເທດ ລາວ-ຈີນ ມີຄວາມສະດວກສະບາຍຫລາຍຂຶ້ນ. ພ້ອມນັ້ນ, ວຽກງານການທ່ອງທ່ຽວ, ການໄປມາຫາສູ່ ເຊິ່ງກັນ ແລະ ກັນ ລະຫວ່າງປະຊາຊົນສອງຊາດ ລາວ-ຈີນ ຈະໄດ້ຮັບການພັດທະນາ, ສະດວກ, ສະບາຍ, ວ່ອງໄວຫລາຍຂຶ້ນ.
ຂ່າວ: Khuksoud.com
No comments:
Post a Comment