ລມຕ ກະຊວງປ້ອງກັນປະເທດຢ້ຽມຢາມມຽນມາ

ທ່ານ ພົນໂທ ຈັນສະໝອນ ຈັນຍາລາດ ລັດຖະມົນຕີກກະຊວງປ້ອງກັນປະເທດແຫ່ງ ສປປລາວ ພ້ອມດ້ວຍຄະນະໄດ້ເດີນທາງໄປຢ້ຽມຢາມມຽນມາ ຕາມຄຳເຊື້ອເຊີນຂອງທ່ານ ພົນເອກ ອາວຸໂສ ມິນ ອ່ອງຫຼ່າຍ, ຜູ່ບັນຊາການທະຫານສູງສຸດຂອງມຽນມາ ລະຫວ່າງວັນທີ 19-23 ພະຈິກ 2017

ຄະນະຜູ່ແທນລະດັບສູງຂອງສອງປະເທດໄດ້ແລກປ່ຽນການຢ້ຽມຢາມເຊິ່ງກັນ ແລະ ກັນຢ່າງເປັນປົກກະຕິ, ດ້ານວຽກງານຊາຍແດນຂອງສອງປະເທດແມ່ນມີຄວາມສະຫງົບໂດຍພື້ນຖານປັດສະຈາກບັນຫາຕ່າງໆທີ່ກະທົບກະເທືອນເຖິງອະທິປະໄຕຂອງແຕ່ລະປະເທດ, ປະຊາຊົນສອງຊາດທຳມາຫາກິນ ແລະ ຄ້າຂາຍໄປມາຫາສູ່ກັນຢ່າງສະຫງົບສຸກ, ການປັກຫຼັກໝາຍຊາຍແດນຂອງສອງປະເທດແມ່ນໄດ້ຮັບຜົນສຳເລັດຢ່າງຖາອວນດ້ວຍເວລາອັນສັ້ນ ເຊິ່ງບໍ່ເຄີຍມີມາໃນປະຫວັດສາດແຫ່ງການພົວພັນຂອງສອງປະເທດ

ທັງສອງຝ່າຍຍັງໄດ້ຮ່ວມມືກັນປາບປາມການຄ້າຂາຍຂອງເຖື່ອນ, ຢາເສບຕິດຢູ່ຕາມບໍລິເວນຊາຍແດນ, ການຮ່ວມມືທາງດ້ານການທ່ອງທ່ຽວ, ການຄ້າ ແລະ ອື່ນໆ, ການຮ່ວມມືລະຫວ່າງສອງກອງທັບລາວ-ມຽນມາ ແມ່ນໄດ້ຮັບການເພີ່ມພູນຄູນສ້າງ ແລະ ງອກງາມຂຶ້ນເລື້ອຍໆ ໂດຍມີຫ້ອງການທີ່ປຶກສາທູດຝ່າຍທະຫານຕັ້ງຢູ່ແຕ່ລະປະເທດ, ມີຄະນະກຳມະການ, ອະນຸກຳມະການຊາຍແດນຂັ້ນສູນກາງ ແລະ ທ້ອງຖິ່ນແຕ່ລະໆດັບ ເພື່ອແລກປ່ຽນຂໍ້ມູນຂ່າວສານ ເຮັດໃຫ້ບໍລິເວນຊາຍແດນມີຄວາມສະຫງົບກາຍເປັນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມື

ໄດ້ລົງນາມບົດບັນທຶກຄວາມຊົງຈຳ ເພື່ອເປັນບ່ອນອີງໃນການຮ່ວມມືກັນໃນຄັ້ງຕໍ່ໄປ ແລະ ໄດ້ເຂົ້າວາງພວງມາລາ ຢູ່ອະນຸສອນສະຖານຄວາມຊົງຈຳນັກຮົບເກົ່າກອງທັບມຽນມາທີ່ເສຍສະຫຼະຊີວິດໃນປາງສົງຄາມຕ້ານຈັກກະພັດຜູ່ຮຸກຮານຢ່າງອົງກາດກ້າຫານຈົນເຮັດໃຫ້ປະຊາຊາດໄດ້ຮັບການປົດປ່ອຍຢ່າງສົມບູນ ແລະທ່ານ ລມຕ ຍັງໄດ້ເຂົ້າຢ້ຽມຂໍ່ານັບພະນະທ່ານ ອູ ທິນ ຈໍ, ປະທານປະເທດມຽນມາ ໄດ້ກ່າວສະແດງຄວາມຊົມເຊີຍຕໍ່ຄະນະຜູ່ແທນທະຫານຂັ້ນສູງຂອງກອງທັບປະຊາຊົນລາວ ທີ່ເດີນທາງມາຢ້ຽມຢາມສອງຊາດ, ສອງກອງທັບ ແລະ ເຮັດໃຫ້ສາຍພົວພັນຂອງປະຊາຊົນສອງຊາດລາວ-ມຽນມາໄດ້ຮັບການຖະນຸຖະໜອມ, ຮັດແໜ້ນ ແລະ ງອກງາມຍິ່ງໆຂຶ້ນ, ພ້ອມທັງໄດ້ອວຍພອນໃຫ້ຄະນະຜູ່ແທນທະຫານຂັ້ນສູງຂອງກອງທັບປະຊາຊົນລາວ ໃນການເດີນທາງມາຢ້ຽມຢາມ ແລະ ເຮັດວຽກຢູ່ມຽນມາໃນຄັ້ງນີ້ໃຫ້ໄດ້ຮັບຜົນສຳເລັດຢ່າງຈົບງາມ.