ຂປລ. ພິທີປະກາດເປີດປື້ມທິດສະດີ ຂອງ ສີຈິ້ນຜິງ ວ່າດ້ວຍການປົກຄອງປະເທດ ແລະ ບໍ ລິຫານການເມືອງ ສະບັບພາສາລາວ (ແປຈາກພາສາຈີນ ເປັນພາສາລາວ) ໄດ້ມີຂຶ້ນໃນວັນທີ 9 ພະຈິກ 2017 ຢູ່ຫໍປະຊຸມແຫ່ງຊາດ ນະຄອນຫລວງວຽງຈັນ, ໂດຍມີທ່ານ ກິແກ້ວ ໄຂທຳພິທູນ ເລຂາທິການສູນກາງພັກ, ຫົວໜ້າຄະນະໂຄສະນາ ອົບຮົມສູນກາງພັກ, ທ່ານ ກົ່ວເວີ້ຍໝິນ ຮອງຫົວໜ້າຫ້ອງວ່າການ ຖະແຫລງຂ່າວ ຄະນະລັດຖະບານຈີນ, ມີ ທ່ານ ຫວ່າງ ເວີນທຽນ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສປ ຈີນ ປະຈຳ ລາວ, ມີບັນດາຮອງລັດຖະມົນຕີ, ຫົວໜ້າກົມ, ຮອງກົມ, ພ້ອມດ້ວຍແຂກຖືກເຊີນ ເຂົ້າຮ່ວມ.
ໃນໂອກາດດັ່ງກ່າວ, ທ່ານ ກົ່ວເວີ້ຍໝິນ ກ່າວວ່າ: ປື້ມທິດສະດີຂອງ ສີຈິ້ນຜິງ ວ່າດ້ວຍການປົກຄອງປະເທດ ແລະ ບໍລິຫານການເມືອງ ໄດ້ຮິບໂຮມເອົາ ບົດປະພັນທີ່ສຳຄັນຂອງ ທ່ານ ສີຈິ້ນຜິງ ໃນໄລຍະ ວັນທີ 15 ພະຈິກ 2012 ຫາ ວັນທີ 13 ມິຖຸນາ 2014, ລວມມີບົດປາໄສ, ບົດໂອ້ລົມ, ບົດສູນທອນພົດ, ບົດຕອບບັນຫາ, ຄຳຊີ້ນຳ, ຈົດໝາຍອວຍພອນ ແລະ ອື່ນໆ ທັງໝົດ 79 ບົດ. ນັບແຕ່ເດືອນກັນຍາ 2014 ປື້ມດັ່ງກ່າວ, ໄດ້ປະກາດອອກເປັນ 25 ພາສາ, 28 ສະບັບ, ຈຳໜ່າຍ 6 ລ້ານກວ່າຫົວ ໃນທົ່ວໂລກ. ສຳລັບສະບັບພາສາລາວ ໄດ້ເປີດພິມຈຳໜ່າຍ ຢ່າງເປັນທາງການ ໃນວັນທີ 7 ພະຈິກ 2017 ນີ້.
ພາຍຫລັງ ທ່ານ ກົ່ວເວີ້ຍໝິນ ຂຶ້ນມີຄຳເຫັນແລ້ວ, ທ່ານ ກິແກ້ວ ໄຂທຳພິທູນ ກໍໄດ້ຂຶ້ນກ່າວ ສະແດງຄວາມຂອບໃຈ ຕໍ່ລັດຖະບານຈີນ ກໍຄື ຫ້ອງວ່າການຖະແຫລງຂ່າວ ຄະນະລັດຖະບານ ສປ ຈີນ ຮ່ວມກັບຫ້ອງການຄົ້ນຄວ້າ ເອກະສານສູນກາງພັກ ກອມມູນິດຈີນ ແລະ ກຸ່ມບໍລິສັດ ການຈັດພິມສາກົນປະເທດຈີນ ທີ່ໄດ້ຮຽບຮຽງ ແລະ ແປຈາກສະບັບພາສາຈີນ ມາເປັນພາສາລາວ, ເຊິ່ງປື້ມດັ່ງກ່າວ, ຈະເຮັດໃຫ້ບັນດາຜູ້ອ່ານຮູ້, ເຂົ້າໃຈເຖິງບົດຮຽນ ແລະ ປະສົບການ ໃນການເຄື່ອນໄຫວວຽກງານ ຊີ້ນຳ-ນຳພາ ແລະ ສ້າງສາພັດທະນາປະເທດຊາດ ຂອງທ່ານ ສີ ຈິ້ນຜິງ ຕະຫລອດໄລຍະຜ່ານມາຈົນເຖິງປັດຈຸບັນ.
ພ້ອມດຽວກັນ, ການຈັດພິມປື້ມດັ່ງກ່າວ ຍັງເປັນການປະກອບສ່ວນ ອັນສຳຄັນເຂົ້າໃນການເສີມຂະຫຍາຍ ການພົວພັນຮ່ວມມືລະຫວ່າງ ປະຊາຊົນສອງຊາດ ລາວ-ຈີນ ໃຫ້ໄດ້ຮັບການພັດທະນາ ແລະ ແໜ້ນແຟ້ນຍິ່ງຂຶ້ນ ຢ່າງບໍ່ຢຸດຢັ້ງ. ໃນຕອນທ້າຍ ທ່ານ ກົ່ວເວີ້ຍໝິນ ກໍໄດ້ມອບປື້ມດັ່ງກ່າວ ໃຫ້ ທ່ານ ກິແກ້ວ ໄຂທຳພິທູນ ອີກດ້ວຍ.
ຂ່າວ: khuksoud.com
No comments:
Post a Comment