ຂປລ. ໃນວັນທີ 18 ຕຸລາ 2017ທີ່ຜ່ານມາ ທີ່ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ທ່ານ ບໍ່ແສງຄໍາ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ມາຊາຕະກະ ຟູຈິຕະ ເລຂາທິການໃຫຍ່ ສູນອາຊຽນ-ຍີ່ປຸ່ນ
ໃນໂອກາດດັ່ງກ່າວ, ທ່ານ ບໍ່ແສງຄໍາ ວົງດາລາ ໄດ້ສະແດງຄວາມຊົມເຊີນ, ຍິນດີຕ້ອງຮັບ ແລະ ຕີລາຄາສູງຕໍ່ການເດີນທາງມາຢ້ຽມຢາມ ສປປ ລາວ ໃນຄັ້ງນີ້, ທັງສອງຝ່າຍຍັງໄດ້ແລກປ່ຽນຄໍາຄິດເຫັນ ແລະ ປຶກສາຫາລືຄວາມເປັນໄປໄດ້ ກ່ຽວກັບວິທີການທີ່ຈະໂຄສະນາ ດຶງດູດນັກທ່ອງທ່ຽວຍີ່ປຸ່ນ ໃຫ້ເຂົ້າມາທ່ອງທ່ຽວລາວໃຫ້ຫລາຍຂຶ້ນ, ໂດຍຜ່ານບັນດາກິດຈະກໍາສໍາມະນາ ແລະ ກອງປະຊຸມດ້ານວິຊາການ ຫລື ງານວາງສະແດງຮູບພາບ ເພື່ອສົ່ງເສີມການໂຄສະນາ ກ່ຽວກັບລາວ ໃຫ້ເລີກເຊິ່ງຂຶ້ນຕື່ມ.
ພ້ອມນີ້, ທ່ານ ບໍ່ແສງຄໍາ ວົງດາລາ ກໍໄດ້ແຈ້ງໃຫ້ທ່ານ ມາຊາຕະກະ ຟູຈິຕະ ຊາບກ່ຽວກັບ ສປປ ລາວ ກະກຽມເປີດປີທ່ອງທ່ຽວລາວ 2018 ເພື່ອກະຕຸ້ນໃຫ້ນັກທ່ອງທ່ຽວສາກົນ ເຂົ້າມາທ່ຽວລາວໃນປີໜ້າຫລາຍຂຶ້ນ. ລວມທັງມີໜຶ່ງໃນກິດຈະກໍາທີ່ສໍາຄັນທີ່ຈະຈັດຢູ່ ຍີ່ປຸ່ນ ແມ່ນບຸນລາວ 2018 ເພື່ອສົ່ງເສີມການໂຄສະນາໃຫ້ຄົນຍີ່ປຸ່ນ ຮູ້ລາວຫລາຍຂຶ້ນຕື່ມອີກ.
ໃນໂອກາດດຽວກັນ, ທ່ານ ມາຊາຕະກະ ຟູຈິຕະ ກໍໄດ້ລາຍງານຄວາມຄືບໜ້າບັນດາກິດຈະກໍາ ທີ່ທາງສູນອາຊຽນ-ຍີ່ປຸ່ນ ໄດ້ໃຫ້ການຮ່ວມມືແກ່ສປປ ລາວ ໂດຍສະເພາະດ້ານການທ່ອງທ່ຽວ ໄດ້ມີການຈັດສໍາມະນາສ້າງຄວາມເຂັ້ມແຂງ ເພື່ອຍົກລະດັບຂີດຄວາມສາມາດ ໃຫ້ແກ່ບຸກຄະລາກອນທັງພາກລັດ ແລະ ເອກະຊົນ ທີ່ຮັບຜິດຊອບວຽກງານທ່ອງທ່ຽວ ເຊັ່ນ: ພາກສ່ວນປະກອບການບໍລິການດ້ານການທ່ອງທ່ຽວ, ການຄຸ້ມຄອງບູລະນະດ້ານແຫລງທ່ອງທ່ຽວ, ພາກສ່ວນສະໜອງຂໍ້ມູນກ່ຽວກັບການທ່ອງທ່ຽວ ແລະ ອື່ນໆ ເຊິ່ງມີການແລກປ່ຽນບົດຮຽນທັງຢູ່ພາຍໃນ ສປປ ລາວ ແລະ ຍີ່ປຸ່ນ.
ຂ່າວ: ວິໄລສັກ ພາບ: ເກດສະໜາ
No comments:
Post a Comment