ຂປລ. ໃນວັນທີ 30 ຕຸລາ 2017 ທີ່ ຫໍພິພິທະພັນໄກສອນ ພົມວິຫານ ຫ້ອງວ່າການສູນກາງພັກ ປະຊາຊົນ ປະຕິວັດລາວ ຮ່ວມກັບ ຫ້ອງວ່າການສູນກາງພັກ ກອມມູນິດຫວຽດນາມ ໄດ້ຈັດງານວາງສະແດງ ພາຍໃຕ້ຫົວຂໍ້ ສາຍພົວພັນມິດຕະພາບ ທີ່ເປັນມູນເຊື້ອ, ຄວາມສາມັກຄີພິເສດ ການຮ່ວມມືຮອບດ້ານ ລາວ-ຫວຽດນາມ-ຫວຽດນາມ-ລາວ ບົນຈິດໃຈ ຊີ້ນຳຂອງສູນກາງພັກ ປະຊາຊົນປະຕິວັດລາວ ແລະ ສູນກາງພັກ ກອມມູນິດຫວຽດນາມ.
ໃຫ້ກຽດເປີດພິທີ ໂດຍທ່ານ ຄຳຜາ ພິມມະສອນ ຮອງຫົວໜ້າຫ້ອງວ່າການ ສູນກາງພັກປະຊາຊົນ ປະຕິວັດລາວ ແລະ ທ່ານ ບູຍວັນແທັດ ຮອງຫົວໜ້າສູນກາງພັກ ກອມມູນິດຫວຽດນາມ, ມີທ່ານ ສົມສະຫວາດ ເລັ່ງສະຫວັດ, ອະດີດຄະນະກຳມາທິການຮ່ວມມື ລາວ-ຫວຽດນາມ ແລະ ບັນດາການນຳຈາກ ບັນດາກະຊວງ, ອົງການອ້ອມຂ້າງສູນກາງພັກ ເຂົ້າຮ່ວມ.
ງານວາງສະແດງຄັ້ງນີ້, ເປັນການບົ່ງບອກສື່ມວນຊົນ ທັງພາຍໃນ ແລະ ຕ່າງປະເທດ ໄດ້ຮູ້ເຖິງປະຫວັດສາດ ແຫ່ງສາຍພົວພັນ ມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບ ດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃນຂະບວນວິວັດ ແຫ່ງການຕໍ່ສູ້ເພື່ອເອກະລາດ, ອິດສາລະພາບ ຂອງສອງປະເທດ, ຊຶ່ງຜ່ານແຕ່ລະໄລຍະ ປະຫວັດສາດ ທີ່ລະອິດລະອ້ຽວ, ໂດຍສະເພາະ ຂະບວນວິວັດແຫ່ງການຕໍ່ສູ້ ເພື່ອປົດປ່ອຍຊາດ, ຍາດເອົາຄວາມເປັນ ເອກະລາດ ແລະ ອິດສາລະພາບ ກ້າວເຖິງໄລຍະ ປົກປັກຮັກສາ ແລະ ສ້າງສາພັດທະນາ ປະເທດຊາດ ດ້ວຍໄຊຊະນະອັນສະຫງ່າລາສີ, ໄດ້ກາຍມາເປັນສາຍພົວພັນ ມິດຕະພາບ ສາມັກຄີແບບພິເສດ ແລະ ການຮ່ວມມືຮອບດ້ານ ຊຶ່ງໃນໂລກບໍ່ເຄີຍມີມາກ່ອນ.
ງານວາງສະແດງ ໄດ້ສະເໜີເຖິງປັດໄຈຕ່າງໆ ທີ່ເປັນພື້ນຖານສ້າງສາຍພົວພັນ ແບບພິເສດ, ຮ່ວມສຳພັນສູ້ຮົບ ລາວ-ຫວຽດນາມ, ຫວຽດນາມ-ລາວ, ພິເສດ ແມ່ນບົດບາດຂອງ ປະທານໂຮ່ຈິມິງ, ປະທານໄກສອນ ພົມວິຫານ, ປະທານ ສຸພານຸວົງ ແລະ ບັນດາຜູ້ນຳການປະຕິວັດ ຂອງສອງພັກສອງລັດ, ນັກຮົບວິລະຊົນ ທະຫານຕຳຫລວດ ແລະ ປະຊາຊົນຮຸ່ນຄົນຕ່າງໆ ຂອງສອງປະເທດ ແລະ ມີຄວາມໝາຍທາງດ້ານ ປະຫວັດສາດ ແລະ ເມດຕາທຳຢ່າງເລິກເຊິ່ງ ເຮັດໃຫ້ປະຊາຊົນ ສອງປະເທດ ລາວ-ຫວຽດນາມ ຮຸ່ນຄົນຕ່າງໆຮັບຮູ້ເຂົ້າໃຈວ່າ: ສາຍພົວພັນມິດຕະພາບ, ຄວາມສາມັກຄີແບບພິເສດ ການຮ່ວມມືຮອບດ້ານ ລາວ-ຫວຽດນາມ, ຫວຽດນາມ-ລາວ ແມ່ນມູນມໍລະດົກຕົກທອດ ອັນລ້ຳຄ່າຂອງສອງຊາດ ລາວ-ຫວຽດນາມ ຊຶ່ງຈະຕ້ອງໄດ້ ຖະນຸຖະໜອມ ແລະ ພັດທະນາສູ່ລະດັບໃໝ່ ທີ່ນັບມື້ນັບສູງຂຶ້ນ ຢ່າງບໍ່ຢຸດຢັ້ງ.
ຂ່າວ: ມະນີທອນ, ພາບ: ວຽງສະຫວັນ
No comments:
Post a Comment