ເກັບເງິນຄ່າທາງຍັງບໍ່ຈົບ! ຫຼ້າສຸດ ສສຊ ຈຳປາສັກ ສະເໜີໃຫ້ລັດຖະບານແກ້ໄຂເປັນກໍລະນີດ່ວນ

ບັນຫາການເກັບເງິນຢູ່ເສັ້ນທາງຫ້ວຍເພັກ – ບ້ານພະພີນ – ວັດພູຈໍາປາສັກ ທີ່ເປັນເສັ້ນທາງເລກທີ 14 A ຍັງເປັນທີ່ວິພາກວິຈານໃນສັງຄົມຢູ່ພໍສົມຄວນເຖິງແມ່ນວ່າຜູ້ກໍ່ສ້າງຈະເກັບມາຫຼາຍປີແລ້ວ ຫຼ້າສຸດ ສສຊ ແຂວງຈຳປາສັກສະເໜີທີ່ສະພາແຫ່ງຊາດ ເພື່ອໃຫ້ລັດຖະບານອະນຸມັດງົບປະ ມານຈຳນວນໜຶ່ງແກ້ໄຂບັນການເກັບເງິນຢູ່ໃນເສັ້ນທາງດັ່ງກ່າວເປັນການດ່ວນ.

ທ່ານ ສາຍທອງ ໄຊຍະວົງ ສສຊ ເຂດ 15 ແຂວງຈຳປາສັກ ສະເໜີຕໍ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII ວ່າ: ຈໍາປາສັກກໍາລັງພົບກັບບັນຫາໜີ້ສິນ 2 ແຈທີ່ກຳລັງຄຸມເຄືອເປັນຕົ້ນແມ່ນໜີ້ສິນທະນາຄານ ເຊິ່ງແຂວງຈຳເປັນຈະຕ້ອງໄດ້ໃຊ້ຈ່າຍເພື່ອກະກຽມເປັນເຈົ້າພາບຈັດການແຂ່ງຂັນງານມະຫາວິທະຍາໄລແຫ່ງຊາດໃນປີ 2019 ໂດຍຈະຕ້ອງໄດ້ມີການພັດທະ ນາພື້ນຖານໂຄງລ່າງແນ່ນອນງົບປະມານເປັນໄຈສຳຄັນທີ່ສະເໜີຕໍ່ລັດຖະບານພິຈາລາະນາ.

ນອກຈາກງົບປະມານໃນການກະກຽມການເປັນເຈົ້າພາບຈັດການແຂ່ງຂັນກີລາມະຫາວິທະຍາ ໄລລະດັບຊາດແລ້ວ ຈຳປາສັກຍັງສະເໜີໃຫ້ລັດຖະບານຊ່ວຍແກ້ໄຂບັນຫາການເກັບເງິນຜ່ານທາງຢູ່ເສັ້ນທາງເລກທີ 14 A ຈາກບ້ານຫ້ວຍເພັກ, ເມືອງໂພນທອງ ຫາ ວັດພູຈໍາປາສັກ ໂດຍບໍລິສັດດວງດີກໍ່ສ້າງເປັນຜູ້ລົງທຶນກໍ່ສ້າງດ້ວຍອາຍຸສຳປະທານ 45 ປີ ເປັນຕົວເລກທີ່ຂ້ອນຂ້າງສູງພໍສົມຄວນ.

ໄລຍະຜ່ານມາໄດ້ມີການຕໍ່ວ່າຈາກຜູ້ທີ່ຊົມໃຊ້ ຫຼື ຜ່ານເສັ້ນທາງດັ່ງກ່າວວ່າມີການເກັບແພງເກີນໄປປະເພດລົດໃຫຍ່ໄປກັບ 30,000 ກີບ ນັກທ່ອງທ່ຽວທີ່ເດີນທາງໄປວັດພູຈຳປາສັກກໍ່ມີການເກັບຄ່າບໍລິການຕື່ມອີກສ້າງຄວາມຫຍໍ້ທໍ້ໃຫ້ກັບນັກທ່ອງທ່ຽວ.

ສະນັ້ນ, ຢາກເຮັດໃຫ້ບັນຫາເກັບຄ່າຜ່ານທາງຢູ່ຈຸດນີ້ໝົດໄປຂໍໃຫ້ລັດຖະບານຊ່ວຍພິຈາລະນາແກ້ໄຂນີ້ເປັນພຽງການສະເໜີຂອງ ສສຊ ເຂດ 15 ເທົ່ານັ້ນສ່ວນວ່າຜົນຈະອອກມາແນວໃດຕ້ອງໄດ້ຕິດຕາມໄປນຳກັນ.

Sout: ເສດຖະກິດການຄ້າ.