ການເປີດຂະບວນການແຂ່ງຂັນ “ຮັກຊາດ ແລະ ພັດທະນາ” ຕິດພັນກັບການຮັກນະຄອນຫຼວງວຽງຈັນ ແລະ ເປີດປີທ່ອງທ່ຽວລາວ ປີ 2018 ຈັດຂຶ້ນວັນທີ 12 ຕຸລາ 2017 ຢູ່ທີ່ຫ້ອງວ່າການປົກຄອງນະຄອນຫຼວງ ໂດຍເປັນກຽດເຂົ້າຮ່ວມຂອງທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງ ພ້ອມດ້ວຍຄະນະການນຳນະຄອນຫຼວງ ເຈົ້າເມືອງ ຫົວໜ້າພະແນກ ແລະ ເລຂາໜ່ວຍພັກຮາກຖານບ້ານເຂົ້າຮ່ວມ.
ທ່ານ ບຸນໜາ ຜາທຸມມະວົງ ຫົວໜ້າພະແນກພາຍໃນ ນວ ໄດ້ຂຶ້ນຜ່ານບົດສະຫຼຸບຂະບວນແຂ່ງຂັນ “ຮັກຊາດ ແລະ ພັດທະນາ” ໃນໄລຍະທີ່ຜ່ານມາ ແລະ ທິດທາງແຜນການຕໍ່ໜ້າ ເຊິ່ງທ່ານໄດ້ກ່າວບາງຕອນວ່າ: ພາຍຫຼັງທີ່ກົມການເມືອງສູນກາງພັກໄດ້ມີມະຕິ 03 ວ່າດ້ວຍວຽກງານ 3 ສ້າງ ໃນຕົ້ນປີ 2011 ນະຄອນຫຼວງ ກໍ່ໄດ້ຈັດກອງປະຊຸມປຸກລະດົມຂະບວນການແຂ່ງຂັນ “ຮັກຊາດ ແລະ ພັດທະນາ” ຊຸກຍູ້ວຽກງານ 3 ສ້າງເຂົ້າສູ່ລວງເລິກຂຶ້ນຕື່ມອີກ ເພື່ອສ້າງຜົນງານຕ້ອນຮັບ 2 ວັນປະຫວັດສາດ ໂດຍສະເພາະແມ່ນການສືບຕໍ່ຫັນລົງກໍ່ສ້າງຮາກຖານ ສ້າງບ້ານພັດທະນາຕາມ 4 ເນື້ອໃນ 4 ຄາດໝາຍຊຸກຍູ້ວຽກງານ 3 ສ້າງເຂົ້າສູ່ລວງເລິກໃຫ້ແຂງແຮງກວ່າເກົ່າ ເພື່ອປະຕິບັດໃຫ້ເປັນຈິງບັນດາຄາດໝາຍສູ້ຊົນທີ່ວາງໄວ້ ເຊິ່ງກອງປະຊຸມດັ່ງກ່າວ ໄດ້ມີຕົວແທນຈາກທຸກຂະແໜງການ ເມືອງ ບ້ານ ນັກທຸລະກິດ ແລະ ຜູ້ປະກອບການດີເດັ່ນທົ່ວນະຄອນຫຼວງວຽງຈັນເຂົ້າຮ່ວມ ແລະ ໄດ້ຈັບມືແຂ່ງຂັນກັນຮັບເອົາຂໍ້ແຂ່ງຂັນ ເພື່ອໄປຈັດຕັ້ງຜັນຂະຫຍາຍຕົວຈິງ.
ການຈັດກອງປະຊຸມຂຶ້ນຄັ້ງນີ້ ແມ່ນມີຄວາມໝາຍສຳຄັນສຳລັບການສືບຕໍ່ເສີມຂະຫຍາຍ ບັນດາຜົນສຳເລັດວຽກງານທີ່ບັນລຸໄດ້ໃນຊຸມປີທີ່ຜ່ານມາ ພ້ອມກັນສ້າງຜົນສຳເລັດຂອງຕົນໃຫ້ຫຼາຍກວ່າເກົ່າໃນຊຸມປີຕໍ່ໜ້າ ເພີ່ມທະວີຄວາມພະຍາຍາມສືບຕໍ່ບຸກບືນ ສູ້ຊົນຕັ້ງໜ້າປະຕິບັດບັນດາຄາດໝາຍທີ່ກອງປະຊຸມໃຫຍ່ ຄັ້ງທີ VI ຂອງອົງຄະນະພັກນະຄອນຫຼວງວຽງຈັນວາງອອກໃຫ້ເປັນຈິງ ເປັນຕົ້ນ 6 ວິໄສທັດ 6 ຍຸດທະສາດ 18 ຄາດໝາຍ 16 ໂຄງການບຸກທະລຸໃນການພັດທະນານະຄອນຫຼວງວຽງຈັນ ດ້ວຍຈິດໃຈແຂ່ງຂັນ “ຮັກຊາດ ແລະ ພັດທະນາ” ເພື່ອສ້າງພື້ນຖານອັນໜັກແໜ້ນໃນການຕ້ອນຮັບປີທ່ອງທ່ຽວລາວ ປີ 2018.
ສຳລັບທິດທາງແຜນການ ເພື່ອຊຸກຍູ້ຂະບວນການແຂ່ງຂັນ “ຮັກຊາດ ແລະ ພັດທະນາ” ຕິດພັນກັບຮັກນະຄອນຫຼວງວຽງຈັນ ແຕ່ນີ້ຫາປີ 2020 ຄະນະພັກທຸກຂັ້ນ ແລະ ທຸກຂະແໜງການ ຕ້ອງພ້ອມກັນສືບຕໍ່ສ້າງບາດກ້າວບຸກທະລຸທັງ 4 ດ້ານໃຫ້ແຂງແຮງກວ່າເກົ່າ ສ້າງແຂວງເປັນຫົວໜ່ວຍຍຸດທະສາດ ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ພ້ອມກັນນີ້ ສືບຕໍ່ຍູ້ແຮງ ແລະ ສຸມໃສ່ການພັດທະນາເມືອງ ແລະ ບ້ານທີ່ຜັນຂະຫຍາຍວຽກງານ 3 ສ້າງ (9 ເມືອງ 31 ບ້ານ) ໃຫ້ເປັນເມືອງ ແລະ ບ້ານຕົວແບບໃນການເຮັດທົດລອງວຽກງານ 3 ສ້າງ ບັນດາຂະແໜງການຂອງນະຄອນຫຼວງວຽງຈັນ ຕ້ອງສຸມໃສ່ເຮັດບົດບາດຄຸ້ມຄອງມະຫາພາກ ແລະ ເຂົ້າຮ່ວມໃນການຜັນຂະຫຍາຍວຽກງານ 3 ສ້າງຢ່າງແຂງແຮງ ແລະ ຕໍ່ເນື່ອງ ປັບປຸງລະບອບກົນໄກພະນັກງານນະຄອນຫຼວງລົງຊ່ວຍເມືອງ ແລະ ຫັນພະນັກງານລົງຊ່ວຍບ້ານ ເພື່ອເຮັດໃຫ້ຂັ້ນເມືອງ ແລະ ບ້ານ ມີພະນັກງານບໍລິຫານ ແລະ ຮັບໃຊ້ປະຊາຊົນຢ່າງພຽງພໍ ໂດຍສະເພາະແມ່ນພະນັກງານວິຊາການທີ່ພາປູກ-ພາລ້ຽງ ພ້ອມກັນນີ້ ກໍ່ໃຫ້ເອົາໃຈ່ໃສ່ສ້າງພະນັກງານກັບທີ່ໃຫ້ໄດ້ທັງຈຳນວນ ແລະ ຄຸນະພາບ ໂດຍສະເພາະ ຜູ້ທີ່ຈະເປັນເລຂາພັກບ້ານ-ນາຍບ້ານຕາມທິດຫັນເປັນໜຸ່ມ ເພື່ອເຮັດແນວໃດໃນຊຸມປີຕໍ່ໜ້າຜູ້ທີ່ເປັນເລຂາພັກບ້ານ-ນາຍບ້ານ ໃຫ້ມີມາດຕະຖານເງື່ອນໄຂສ້າງເປັນຄະນະພັກເມືອງໄດ້ເພີ່ມຂຶ້ນ.
ພາຍຫຼັງທີ່ຄະນະຈັດຕັ້ງພິທີໄດ້ປະກາດຂໍ້ແຂ່ງຂັນ “ຮັກຊາດ ແລະ ພັດທະນາ” ຕິດພັນກັບການຮັກນະຄອນຫຼວງວຽງຈັນ ແລະ ເປີດປີທ່ອງທ່ຽວລາວ ປີ 2018 ຄະນະປະຈຳພັກ ນວ ຜູ້ຊີ້ນຳແຕ່ລະເມືອງ ເຈົ້າເມືອງ 9 ເມືອງ ຫົວໜ້າພະແນກການຫ້ອງການທຽບເທົ່າອ້ອມຂ້າງ ນວ ພ້ອມດ້ວຍພະນັກງານ-ລັດຖະກອນ (ພະແນກພາຍໃນ ນວ ຄະນະຈັດຕັ້ງ ນວ ຫ້ອງການພາຍໃນເມືອງ 9 ເມືອງ ແລະ ຄະນະຈັດຕັ້ງເມືອງ 9 ເມືອງ ກໍ່ໄດ້ຂຶ້ນຈັບມືແຂ່ງຂັນກັນຮັບເອົາຂໍ້ແຂ່ງຂັນ ເພື່ອໄປຈັດຕັ້ງຜັນຂະຫຍາຍຕົວຈິງ.
No comments:
Post a Comment