ຂປລ. ການພັດທະນາ ແລະ ຄຸ້ມຄອງເຂດເສດຖະກິດພິເສດ ສະຫວັນ-ເຊໂນ ແລະ ເຂດເສດຖະກິດພິເສດ ໄຊເສດຖາກວມລວມ (ຂພສ) ຂອງລັດຖະບານ ໃນໄລຍະບໍ່ເທົ່າໃດປີທີ່ຜ່ານມາ ໄດ້ສ້າງຄວາມເຊື່ອໝັ້ນ ໃຫ້ແກ່ບັນດາບໍລິສັດທີ່ມີຊື່ສຽງ ແລະ ນັກລົງທຶນ ຈາກຕ່າງປະເທດເຂົ້າມາລົງທຶນ, ອັນໄດ້ສ້າງວຽກເຮັດງານທຳ ແລະ ຖ່າຍທອດຄວາມຮູ້ເຕັກໂນໂລຊີ ໃຫ້ແກ່ແຮງງານລາວ ໄດ້ຫລາຍກວ່າ 15.000 ຄົນ. ນັບແຕ່ທ້າຍປີ 2015 ເຖິງປັດຈຸບັນ ສາມາດມອບລາຍຮັບເຂົ້າງົບປະມານຂອງລັດ ໄດ້ 43 ຕື້ກີບ, ພ້ອມນັ້ນຍັງມີການນຳເຂົ້າວັດຖຸ ແລະ ອຸປະກອນການກໍ່ສ້າງທັງໝົດ ມູນຄ່າ 1.300 ລ້ານໂດລາສະຫະລັດ, ທັງສາມາດສົ່ງອອກສິນຄ້າ ມູນຄ່າ 568 ລ້ານໂດລາສະຫະລັດ.
ທ່ານ ສຸພັນ ແກ້ວມີໄຊ ລັດຖະມົນຕີກະຊວງແຜນການ ແລະ ການລົງທຶນ ຊີ້ໃຫ້ເຫັນວ່າ: ການພັດທະນາ ແລະ ຄຸ້ມຄອງ ເຂດເສດຖະກິດພິເສດ ໄດ້ນຳໃຊ້ເນື້ອທີ່ດິນຢ່າງມີຈຸດສຸມ ແລະ ມີປະສິດທິຜົນ ທາງດ້ານເສດຖະກິດ, ສ້າງມູນຄ່າເພີ່ມທີ່ດິນຢູ່ເຂດຫ່າງໄກສອກຫລີກ. ການຈັດສັນ ແລະ ຊົດເຊີຍທີ່ດິນ ສ່ວນໃຫຍ່ ແມ່ນນຳໃຊ້ທຶນຮອນຂອງຜູ້ພັດທະນາ ເພາະພາຍຫລັງໝົດອາຍຸສຳປະທານ ທີ່ດິນດັ່ງກ່າວຈະໄດ້ມອບຄືນໃຫ້ລັດ ຍົກເວັ້ນທີ່ດິນເປັນຂອງເອກະຊົນພາຍໃນ. ປັດຈຸບັນ ຂພສ ມີທັງໝົດ 12 ເຂດ ໄດ້ນຳໃຊ້ທີ່ດິນຕາມສັນຍາສຳປະທານແລ້ວເກືອບ 20 ພັນເຮັກຕາ. ທັງສອງ ຂພສ ໄດ້ປະກອບສ່ວນສຳຄັນ ໃນການພັດທະນາພື້ນຖານໂຄງລ່າງ ເຂດຫ່າງໄກສອກຫລີກ, ສ້າງຕົວເມືອງໃໝ່ໃນຊົນນະບົດ, ເຂດນິຄົມອຸດສາຫະກຳ ແລະ ເຂດທ່ອງທ່ຽວ ທີ່ຕິດພັນກັບທຳມະຊາດ ແລະ ວັດທະນະທຳ ເຮັດໃຫ້ຊົນນະບົດ ມີໃບໜ້າໃໝ່ ແລະ ຊ່ວຍຍົກລະດັບຊີວິດການເປັນຢູ່ ຂອງປະຊາຊົນເຂດດັ່ງກ່າວ ໃຫ້ດີຂຶ້ນເທື່ອລະກ້າວ.
ຢ່າງໃດກໍຕາມ ທ່ານ ສຸພັນ ແກ້ວມີໄຊ ລະບຸຕື່ມວ່າ: ຜ່ານມາ ຂພສ ມີນະໂຍບາຍສົ່ງເສີມທີ່ດີ ແຕ່ທາງດ້ານນິຕິກຳ ບໍ່ທັນໜັກແໜ້ນພຽງພໍ ເຮັດໃຫ້ການຈັດຕັ້ງປະຕິບັດວຽກງານຕົວຈິງ ພົບຄວາມຫຍຸ້ງຍາກ ໂດຍສະເພາະການດຶງດູດການລົງທຶນ ແລະ ການສ້າງຄວາມເຊື່ອໝັ້ນໃຫ້ແກ່ນັກລົງທຶນລາຍໃຫຍ່ ທີ່ຈະຕັດສິນໃຈນຳເອົາທຶນຮອນ ມາລົງທຶນພັດທະນາເຂດນີ້ ເພາະປະເທດເພື່ອນບ້ານ ທີ່ກຳລັງມີການແຂ່ງຂັນສ້າງ ຂພສ ຕາມຊາຍແດນ, ເຊິ່ງມີການປັບປຸງນິຕິກຳ ແລະ ກົນໄກການຄຸ້ມຄອງທີ່ເຂັ້ມແຂງ ເພື່ອຍາດແຍ່ງການລົງທຶນ.
No comments:
Post a Comment