ພອນແກ້ວ ນັກຮຽນເກັ່ງລະດັບປະເທດ ເກີດໃນຄອບຄົວທຸກຈົນ ກັດແຂ້ວສູ້ຈົນກ້າວເປັນນັກຮຽນເກັ່ງມາເກືອບທຸກຊັ້ນ

ທ້າວ ພອນ​ແກ້​ວ ​​ເຊັງ​ມີ​ຢາ​ລີ​ຊົ່ງ ​ແມ່ນນັກຮຽນ​ເກັ່ງ​ ວິຊາ​ຄະນິດສາດ​ ​​​ເກີດ​ໃນ​ຄອບຄົວ​ທຸກ​ຈົນ, ​ເຄີຍ​ຍ່າງໄປ​ໂຮງ​ແຕ່​ຊັ້ນປະຖົມ​ ເກື​​​ອບ 9 ກວ່າ​ກິ​ໂລ ​ຕັ້ງ​ແຕ່​ນ້ອຍ​ ​ແລະ ຕອນຫຍ້າ​ຍ​ໄປ​ຮຽນຢູ່ ມ ຕົ້ນ ຍ່າງ​ເປັນ​ມື້ທຽບ​ຫຼ​າຍກິ​ໂລ ບໍ່​ໄດ້​ຂີ່​ລົດ (ລົດຖີບ​, ລົດ​ເມ​ບໍ່ມີ)​​ ໂດຍ​ຊິວິດ​ຕ້ອງ​ອົດ​ຍາກ​ຂາດ​ເຂີນ, ​ຂາດ​ຄົນ​ອຸດ​ໜູນຊ່ວຍ​ໃນ​ການ​ຮຽນ​​ ທັງ​ນີ້​ກໍ່ຍ້ອນ​ຄວາມ​ດຸ​ໝັ່ນ​ອົດທົນ, ມີ​ຄວາມ​ຕັ້ງ​ໃຈກັດ​ແຂ້ວ​ສູ້​ຈົນ​ກ້າວ​ເປັນ​ນັກຮຽນ​ເ​ກັ່ງມາ​​ເກືອບ​ທຸກ​ຊັ້ນ ​ແລະ ກ້າ​ວມາ​ເປັນ​ນັກຮຽນ​ເກັ່ງ​ລະ​ດັບ​ຊາດ ສາມາດ​ຄວ້າອັນ​ດັບ 1 ​ວິ​ຊາ​ຄະນິດສາດໄດ້ ຊັ້ນ ມ7 ປະຈຳ​ສົກ 2016-2017.

ສຳລັບ​ທ້າວ ພອນ​ແກ້​ວ ​​ເຊັງ​ມີ​ຢາ​ລີ​ຊົ່ງ ເກີດທີ່ບ້ານ​ຫິນແດງ ​ເມືອງສຳ​ພັນ ​ແຂວງ​ຜົ້ງສາລີ, ​ພໍ່ຊື່  ຢົ່ງເຊັງຊົ່ງ ແລະ ​ແມ່ນ​ຊື່ນາງ ເຈັງ ຖືອາຊີບ​ປະຊາຊົນ​ເ​ຮັດ​ໄຮ່, ​ເຮັດສ່ວນ​ພ້ອມ​ລ້ຽງ​ສັ​ດ, ອາ​ໄສ​ຢູ່​ຊົນນະບົ​ດ ຢູ່​ແບບລຳບາກ​ຂາດ​ເຂີນ ​ໂດຍມີອ້າຍ​ນ້ອງ​ຮ່ວມ​ກັນ​ທັງ​ໝົດ 6 ຄົນ, ຍິງ 2 ຄົນ ​ບວກ​ພໍ່​-ແມ່​ອີກ​ເປັນ 8 ຄົນ, ​ເຊິ່ງຕົນເປັນ​ລູກ​ຊາຍ​ກົກ ​ປັດ​ຈຸ​ບັນ​ອາຍຸ​ໄດ້ 19 ປີ ຫາກໍ່​ເສັງ​ຈົບ​ຊັ້ນ​ ມ7 ທີ່ ມສ ສັນຕິພາບ ​ແຂວງຫຼວງ​ພະ​ບາງ​, ​ສົກ​ປີ 2016-2017​ ນີ້​ກາຍ​ເປັນວ່າ​ນັກຮຽນ​ເກັ່ງ​ລະດັບ​ຊາດ​ ອັນ​ດັບ 1 ວິຊາ​ຄະນິດສາດ ໄດ້​ຄະ​ແນນ​ສະ​ເລ່ຍ 8.85 ​ປັດຈຸບັນ​ກຳລັງ​ລໍຖ້າ​ຮຽນ​ຕໍ່​ຂັ້ນມະຫາວິທະຍາ​ໄລ ມີຄວາມຄາດ​ຫວັງ​ຢາກຮຽນແພດສາ​ດ, ຈາກ​ການ​ສືບ​ປະຫວັດ​ເປັນ​ນັກຮຽນ​ເກັ່ງ​ມາ​ແຕ່​ຊັ້ນ​ປະຖົມ​ຄອງ​ອັບ​ດັບ ທີ່ 1 ມາ​ຈົນ​ເຖິງ ມ ຕົ້ນ ສ່ວນ ​ມ ​ປາຍ​ ຕິດ​ອັບດັບ 1-7 ​ໃນ​ແຕ່ລະ​ເດືອນ.​

ທ້າ​ວ ພອນ​ແກ້ວ ນັກ​ຮຽນ​ເກັ່ງ ເຊັງ​ມີ​ຢາ​ລີ​ຊົ່ງ ຈາມ ມສ ສັນຕິພາບ​ ​ແຂວງຫຼວງ​ພະ​ບາງ ເລົ່າ​ປະຫວັດຕົນ​ວ່າ: ​ຕົນ​ເກີດ​ໃນ​ຄອບຄົວ​ທຸກ​ຈົນ​ຄົນຊົນນະບົດ, ​ຊີວິດ​ການ​​ເປັນ​ຢູ່​ລຳບາກ​ພໍ່-​ແມ່​ເປັນ​ພຽງປະຊາຊົນ​ຊາວ​ສ່ວນ​ທຳ​ມະ​ດາ ບໍ່ສາມາດ​ອູດໜູນດ້ານ​ທຶນຮອນ ​ແລະ ອຸປະກອນ​ການ​ຮຽນ​ໄດ້​ເທົ່າ​ທີ່​ຄວນ​ທຽບກັບ​ຄອບຄົວ​ຄົນ​ອື່ນ​​ແມ່ນ​ຫ່າງ​ກັນຫຼາ​ຍ ແຕ່ຕົນ​ເກີດ​ມາ​ເປັນ​ລູກ​​ເພິ່ນນັບ​ວ່າ​ໂຊກ​ດີ​ຫຼາຍ​ແລ້ວ ​ສະນັ້ນ​ຕົນ​ເປັນ​ລູກ​ຊາຍກົກ​​ຕ້ອງໄດ້​ເຮັດ​ວຽກຫຼາຍ ​​ແລະ ​​ຕັ້ງ​ໃຈ​ຕໍ່ການ​ຮຽນຫຼາຍ​ທີ່​ສຸດຫວັງ​ເປັນ​ອາວຸດ​ປາຍ​ແຫຼມ​ຊ່ວຍ​ຕົນ​ເອງ​ ​ແລະ ຄອບຄົວ,​ ອະນາ​ຄົດ​ຕ້ອງມີ​ວຽກງານ​ດີໆ​ມີ​ອາຊີບ​ທີ​ດີຂຶ້ນ​ຄື​ຄອບຄົວ​ອື່ນ​ເຂົາ. ພ້ອມ​ດຽວ​ກັນ​ນັ້ນ, ທ້າວ ພອນ​ແກ້ວ ເຊັງ​ມີ​ຢາ​ລີ​ຊົ່ງ ​ເລົ່າອີກ​ວ່າ: ຕອນ​ຍັງ​ນ້ອຍຕົນ​ຮຽນຢູ່ ປະຖົມ ບ້ານນຳ​ຮາງ ​ເມືອງ​ສຳພັນ ​ແຂວງ​ຜົ້ງ​ສາລີ ​ໂດຍ​ໂຮງຮຽນຫ່າງ​ຈາກ​​ເຮືອນ​ປະມານ ​ເກື​ອບ 10 ຫຼັກ ຕ້ອງ​ຕື່ນ​ແຕ່​ເຊົ້າ​ແຕ່ 4:30 ​ໂມງ ພ້ອມທັງນຶ້ງ​ເຂົ້າ​ເບິ່​ງບົດຮຽນ​ໄປ​ນຳ​ທຸກ​ມື້, ສ່ວນວັນ​ເສົາ​-ອາທິດ​ຕ້ອງ​ຊອກ​ຢູ່​ຫາ​ກິນ​ເພື່ອ​ເປັນ​ອາຫານ​ແຮ​ໄວ ​ແລະ ​ເວລາ​ຫວ່າງ​ຈາກ​ຮຽນກໍ່​​ຊ່ວຍວຽກພໍ່​-ແມ່, ຫຼັງ​ຈາກ​ຈົບ​ປະຖົມ ຊີວິດ​ຍິ່ງ​ລຳບາກ​ຂຶ້ນ ຕົນ​ໄດ້​ພັດ​ຖິ່ນຈາກ​ພໍ່​-ແມ່​ຫຍ້າ​ຍ​ເຂົ້າ​ໄປຮຽນ​ຢູ່ ມສ ນາ​ໄຊ ​ເມືອງ​ສຳພັນ ​ແຂວງ​ຜົ້ງ​ສາລີ ​​ໃກ້​ຕົວ​ເມືອງ​ແດ່ ຕ້ອງ​ໄດ້​ຍ່າງ​ເດີນທາງ​ຫຼາຍ​ກິ​ໂລ​​ແມັດ ນັບ​ເປັນ​ເວລາ​ເຄິ່ງ​ມື້ ​ໄດ້​ມາ​ຂໍ​ຕັ້ງ​ຕູບ​ນ້ອຍ​ພໍບັງ​​ແດດ ​ບັງ​ຝົນພ້ອມ​ໝູ່​ນັກຮຽນຕ່າງ​ຖິ່ນ 3-4 ຄົນ ​ຂໍ​ອາ​ໄສ​ຮຽນນຳ​ບ້ານ​ເພິ່​ນ​​ ໂດຍ​ຊິວິດ​ການ​ເປັນ​ຢູ່ລໍາບາກ​ຫຼາຍ​ນັ​ບ​ເປັນ​ປີ ຫຼື 2 ປີ​ຈຶ່ງ​ກັບ​ບ້ານ​ເກີດຄັ້ງໜຶ່ງ, ​​ເນື່ອງ​ຈາກວ່າ​ເສັ້ນທາງ​​ໄກຫຼາຍ ຫຼັງ​ຈາກ​ກັບ​ມາ​ແຕ່​ບ້ານ​ຕົນ​ກໍ່​ຈະ​ໄດ້​ແຕ່ເຂົ້າ​ສາ​ນ, ອາຫານ​ແຫ້ງ, ​​ເຄື່ອງນຸງຖື​ ພ້ອມ​ອຸປະກອນ​ການ​ຮຽນຈຳນວນ​ໜຶ່ງຕິດ​ຕົວ​ແບກ​ມາ, ບາງ​ຄັ້ງ​ພໍ່​-ແມ່​ກໍ່ຝາກ​​ເຂົາ​ສານ​, ອາຫານ​ແຫ້ງນຳ​ຄົນຊາວບ້ານ​ມາກໍ່ພໍ​ແບ່ງ​ກັບ​ໝູ່ຄູ່​ຈຸນ​ເຈືອ​ກັນ​ກິນ ບໍ່ພຽງ​ແຕ່ເທົ່າ​ນັ້ນ​ອາຫານ​ການ​ກິນ​ຕ້ອງ​ໄດ້​ຫາ​ຢູ່​ກິນ​​ເກັບຜັກ​​ຫັກ​ໜໍ່ຕາມ​ທຳ​ມະ​ຊາດ ບາງ​ມື້ກໍ່ຂາດ​ເຂີນບາງ​ຄັ້ງ​ແອບ​ນຳ​ຕາ​ຕົກ​ໃນ​ ຫຼື ​ໄຫ້​ຄົນ​ດຽວ​ແລ້ວກັດ​ແຂ້ວ​ສູ້ຕໍ່​ໄປ.

ຫຼັງ​ຈາກ​ນັ້ນ, ​ຕົນ​ຢູ່​ມາກໍ່​ໂຊກ​ດີໃນ​ຂະນະ​ຮຽນ ມ ​ຕົ້ນ ​ກໍ່​ໄດ້ສ້າງ​ຮັກ​ຄົ​ນ​ແພງ​ນຳພໍ່-​ແມ່​ຮັກ ​ຄູ-​ອາ​ຈານຫຼາຍຄົນ​​ ​ໃຫ້​ຄວາມ​ຊ່ວຍ​ເຫຼືອ​ບາງ​ຄັ້ງ​ຄາວ, ​ໃຫ້​ກຳລັງ​ໃຈ​ສູ້​ຕໍ່​​ ຈົນ​ມາສົກ​ປີ 2013-2014 ​ໄດ້​ເປັນ​ຕົວ​ແທນ​ຈາກ​ແຂວງ​ຜົ້ງ​ສາລີ​ ໄດ້​ມາ​ເສັງ​ນັກຮຽນ​ເກັ່ງ​ລະດັບ​ຊາດ, ​ເຊິ່ງຕອນ​ນັ້ນ​ໂຊກ​ບໍ່ດີ ສຸຂະພາບ​ບໍ່ອຳນວຍ​​ເນື່ອງ​ຈາກ​ບໍ່ລຶງ​ເຄີຍການ​ເດີ​ນທາງ​ໄກ (​ເມົາ​ລົດ, ອ່ອນ​ເພຍ)​​, ສະໝອງ​ເຮັດ​ວຽກຊ້າ​ບໍ່ສາມາດຍາດ​​ອັນ​ດັບ​ໄດ້​​ ຈຶ່ງ​ມີ​ຈິດ​ໃຈຄຽດ​ແຄ້ນ​ຕໍ່ການ​ຮຽນ​ ​ແລະ ຕອນ​ຈົບ​ ມ4 ​ໂຊກ​ດີ​ຂຶ້ນ​ມາ​ອີກ​ລະດັບ ​ເພາະ​ຕົນ​ໄດ້​ຮັບ​ການ​ຊ່ວຍ​ເຫຼືອ​ຈາກ​ໂຄງການ​ນັກຮຽນພອນ​ສະຫວັ​ນ ຈາກຍີ່ປຸ່ນ​ໄດ້​ກ້າວເຂົ້າມາ​ຮຽນຕໍ່ຊັ້ນ​ ມ ປາຍ ທີ່ ມສ ສັນຕິພາບ ​ ​ແຂວງ​ຫຼວງ​ພະ​ບາງ ຊີວິດ​ການ​ເປັນ​ຢູ່​ຄ່ອຍ​ດີ​ຂຶ້ນ​ອີກ, ໄດ້​ມາ​ຢູ່​ຫໍ​ພັກ​ນຳ​ໝູ່​​ເພື່ອ​ນນັກ​ຮຽນ​ເກັ່ງ​ທົ່ວ​ແຂວງຈາກ​ພາກ​ເໜືອ ​ໂດຍ​ໂຄງການ CAS ຊ່ວຍ​ເຫຼືອ ຈົນ​​ມາ​ສົກ​ປີ 2016 -2017 ກໍ່​ໄດ້​ເປັນ​ຕົວ​ແທນ​ນັກຮຽນ​ເກັ່ງ​ຂອງ​ແຂວງ​ເຂົ້າ​ຮ່ວມ​ສອບ​ເສັງ​ນັກຮຽນ​ເກັ່ງ​ລະດັບ​ປະ​ເທດ ​ແລະ ສາມາດ​ຍາດ​ໄດ້ອັນດັບທີ່ 1 ​ຕາມ​ຄວາມ​ຫວັງ (ກ່ອນ​ໜ້າ​ການ​ສອບເສັ່ງຕົນ​ຄາດ​ໄວ້​ບໍ່ທີ 1 ກໍ່ທີ​ 2).

ການ​ປະສົບ​ຜົນສຳ​ເລັດ​ຄັ້ງ​ນີ້, ຂໍ​ຂອບ​ໃຈ​ພໍ່​-ແມ່​ໃຫ້ການ​ສົ່ງ​ເສີມ, ໝູ່​ເພືອນ​ໃຫ້​ກຳລັງ​ໃຈ ​ແລະ ພິ​ເສດ ຂໍ​ຂອບ​ໃຈ​ອາຈານ ໄຊພູມ ສັດສະດີ​ ໃຫ້ການ​ຊີ້​ນຳ​ສັງ​ສອນ​ຂັ້ນ ​ມ ​ຕົ້ນ, ​ສ່ວນຊັ້ນ ​ມ ປາຍ ​ແມ່ນ ອາຈານ ທ່ານ ບຼົງ ໄປເຢຍລໍ່  ​ແລະ ​ອາຈານ ຢາກຸ ຈະ ທີ່​​ໃຫ້ການ​ສອນ​ພິ​ເສດ​ແນະນຳ​ການ​ຮຽນຫຼາຍ​ດ້ານ​ຈົນ​ສຳ​ເລັດ​ນັກຮຽນ​ເກັ່ງ​ມາ​ຕະຫຼອດ ​ພ້ອມ​ດຽວ​ກັນ​ນັ້ນ​ຕ້ອງ​ຂໍ​ຂອບ​ໃຈ​ນຳ​ການ​ຈັກ​ຕັ້ງ​ທີ່​ກ່ຽວຂ້ອງໂດຍ​ສະ​ເພາະ​ ກະຊວງ​ສຶກສາ​ທິການ ​ແລະ ກິລາ ທີ່​ໃຫ້​ທຶນ​ສະໜັບສະໜູນ, ຂໍ​ຂອບ​ໃຈພໍ່​-ແມ່​ສະມາຄົມ​ນັກຮຽນທີ່​ໃຫ້ການ​ສະໜັບສະໜູນ​ໃນ​ການ​ຮຽນບຳລຸງ​ໄລຍະ​ຜ່ານ​ມາ. ສຳລັບທ້າວ ພອນ​ແກ້ວ ເຊັງ​ມີ​ຢາ​ລີ​ຊົ່ງ ຖື​ໄດ້​ວ່າ​​ເປັນ​ຄົນ​ດຸໝັ່ນ​ອົດທົນ, ​ເປັນ​ຄົນ​ມຸ້ງ​ມັ້ນ, ​ບໍ່ຕິດ​ຫຼິ້ນ​​, ເອົາ​ໃຈ​ໃສ​ຕໍ່ການ​ຮຽນ, ​ແບ່ງ​ເວລາ​ຮຽນ, ​ເວລາ​ຫຼິ້ນ​ກິນ​ລາ ​ແລະ ຄົ້ນ​ຄວ້າ​ບົດຮຽນທັງ​ຕຳລາລາວ ​ແລະ ຕ່າງປະ​ເທດຈົນ​ກາຍ​ເປັນ​ນັກຮຽນ​ເກັ່ງ​ມາ​ຕະຫຼອດຕອນ​ທ້າຍ ນ້ອງ​ຂໍ​ຝາກ​​ເປັນ​ແບບຢ່າງເຖິງ​ນັກຮຽນຮຸ້ນນ້ອງ ​ແລະ ທຸກ​ຄົນ​ວ່າ​ “ຈົ່ງ​ຕັ້ງ​ໃຈຮຽນ​ແຕ່​ຍັງ​ນ້ອຍເພື່ອ​ທີ່​ຈະ​ໄດ້ກາຍ​ເປັນ​ນັກຮຽນ​ເກັ່ງ ​ແລະ ມີອະນາຄົດ​ທີ່​ດີ​ໄດ້”.

ຂໍຂອບໃຈ

ຂໍ້ມູນ : ໜັງສືພິມເສດຖະກິດ-ສັງຄົມ