ກວດເຫັນລາຍຮັບ 600 ກວ່າຕື້ກີບ ຢູ່ບາງຂະແໜງບໍ່ມອບ ເຂົ້າງົບປະມານ

ຕາມການລາຍງານຂອງ ຂປລ ວ່າ : ອົງການກວດສອບແຫ່ງລັດ ໄດ້ກວດເຫັນລາຍຮັບຢູ່​ບາງ​ຂະ​ແໜງ​​ ເຊັ່ນ: ລາຍ​ຮັບສ່ວຍ ສາອາກອນ, ລາຍຮັບຊັບສິນຂອງລັດ, ເງິນກອງທຶນລັດ ແລະ ອື່ນໆ ມູນຄ່າ 689 ກວ່າຕື້ກີບ, ໃນນັ້ນສູນ ກາງ 516 ກວ່າຕື້ກີບ ແລະ ຂັ້ນທ້ອງຖິ່ນ 173 ກວ່າຕື້ກີບ, ຊຶ່ງບໍ່ໄດ້ມອບເຂົ້າງົບປະມານ ແຫ່ງລັດໃນ​ສົກ​ປີ 2015-2016. ຂໍ້ມູນດັ່ງກ່າວ, ໄດ້ຖືກ​ເປີດ​ເຜີຍໂດຍ ທ່ານ ນາງ ວຽງທອງ ສີພັນ ດອນ ປະທານອົງ ການກວດສອບແຫ່ງລັດ. ໃນວັນ ທີ 16 ຕຸລາ 2017 ໃນກອງປະຊຸມສະໄໝ ສາມັນເທື່ອທີ 4 ຂອງສະພາ ແຫ່ງຊາດຊຸດທີ VIII.

ທ່ານ ນາງ ວຽງທອງ ສີພັນດອນ ກ່າວວ່າ: ຜ່ານການຈັດຕັ້ງປະຕິບັດແຜນງົບປະ ມານແຫ່ງລັດ ສົກປີ 2015-2016 ຢູ່ຂັ້ນສູນກາງ ແລະ ທ້ອງຖິ່ນ, ຊຶ່ງບໍ່ສອດ​ຄອງຕາມລະບຽບກົດໝາຍວ່າ​ດ້ວຍ​ງົບປະມານ​ແຫ່ງ​ລັດ ເຊັ່ນ: ຂະ​ແໜງສ່ວຍສາອາກອນຍັງບໍ່ມອບ​ເຂົ້າງົບປະມານ ຂອງລັດຈໍານວນ 115 ກວ່າຕື້ ກີບ, ໃນນັ້ນຢູ່ສູນກາງ 79 ກວ່າຕື້ກີບ ແລະ ທ້ອງຖິ່ນ 35 ກວ່າຕື້ກີບ; ຂະ​ແໜງ​ຄຸ້ມຄອງ​ຊັບ​ສິນ​ຂອງ​ລັດ​ຈໍານວນ 27 ກວ່າ​ຕື້​ກີບ. ຢູ່​ສູນ​ກາງ​ເກື​ອບ 4 ຕື້​ກີບ ​ແລະ ທ້ອງ​ຖິ່ນ 24 ກວ່າ​ຕື້​ກີບ; ລາຍ​ຮັບ​ອື່ນໆ 172 ກວ່າ​ຕື້​ກີບ, ຢູ່​ສູນ​ກາງ 58 ກວ່າ​ຕື້​ກີບ ​ແລະ ທ້ອງ​ຖິ່ນ 113 ກວ່າ​ຕື້​ກີບ ​ແລະ ​ເງິນ​ກອງ​ທຶນ​ຂອງ​ລັດ 374 ກວ່າ​ຕື້​ກີບ, ສູນ​ກາງ 373 ກວ່າ​ຕື້​ກີບ.

ທ່ານ​ປະທານ​ອົງການ​ກວດ​ສອບ​ແຫ່ງ​ລັດ ກ່າວ​ຕື່ມ​ວ່າ: ສົກ​ປີ 2015-2016 ສະພາ​ແຫ່ງ​ຊາດ​ໄດ້​ຮັບຮອງ​​ແຜນ​ລາຍ​ຮັບ​ງົບປະມານ​ແຫ່ງ​ລັດ 26.159 ຕື້​ກີບ​; ​ໄດ້​ຮັບຮອງ​ແຜນ​ດັດ​ແກ້ 23.700 ຕື້​ກີບ, ປະ ຕິບັດ​ໄດ້​ຕົວ​ຈິງ 22.287 ກວ່າ​ຕື້​ກີບ ​ເທົ່າ​ກັບ 94,04% ຂອງ​ແຜນການ​ດັດ​ແກ້.

ຂ່າວ: ຂັນ​ໄຊ/ຂປລ