ຄະນະຜູ້ແທນລາວນຳໂດຍ ທ່ານ ຄຳບຸນນັດ ໄຊຍະນົນ ຮອງລັດຖະມົນຕີກະຊວງກະສິກຳ ແລະ ປ່າໄມ້ ໄດ້ສຳເລັດເຂົ້າຮ່ວມກອງປະຊຸມ GLOBAL SAEMAUL LEADERSHIP FORUM (GSLF)/SAEMAUL UADONG GLOBAL LEAGUE (SGL) 2017 ຈັດຂຶ້ນ ວັນທີ 17-19 ຕຸລາ 2017 ທີ່ບູຊານ ສ ເກົາຫຼີ ໂດຍເປັນປະທານຂອງທ່ານ ໂຊຈິນກວາງ ປະທານໂຄງການແຊມາອືນດົງ (SAEMAUL UADONG) ມີບັນດາຮອງລັດຖະມົນຕີກະຊວງກ່ຽວຂ້ອງ ແລະ ຕົວແທນໂຄງການແຊມາອືນດົງ ປະເທດສະມາຊິກທົ່ວໂລກເຂົ້າຮ່ວມ.
ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງລາຍງານການເຄື່ອນໄຫວຂອງໂຄງການແຊມາອືນດົງ ນັບແຕ່ສ້າງຕັ້ງໃນຊຸມປີ 1970 ຢູ່ປະເທດ ສ ເກົາຫຼີ ແລະ ການເຄື່ອນໄຫວຂອງໂຄງການ ປະຈຳປີ 2017 ພ້ອມທັງແຜນວຽກ ປີ 2018 ນອກນີ້ ຜູ້ແທນກອງປະຊຸມຍັງໄດ້ພ້ອມກັນຮັບເອົາປະເທດສະມາຊິກໃໝ່ທີ່ເຂົ້າຮ່ວມໂຄງການ ຈຳນວນ 8 ປະເທດ ເຊິ່ງມາຮອດປັດຈຸບັນ ມີ 40 ປະເທດທົ່ວໂລກ ທີ່ໄດ້ເຂົ້າເປັນສະມາຊິກໂຄງການແຊມາອືນດົງ ແລະ ປະເທດສະມາຊິກຈະເປັນປະເທດດ້ອຍພັດທະນາ ແລະ ກຳລັງພັດທະນາ ໂດຍລວມແລ້ວ ກອງປະຊຸມຄັ້ງນີ້ ເປັນກອງປະຊຸມລະດັບໂລກຂອງໂຄງການແຊມາອືນດົງ ປະຈຳປີ 2017 ເຊິ່ງກອງປະຊຸມໄດ້ປຶກສາຫາລືຫຼາຍບັນຫາສຳຄັນ ແລະ ໄດ້ຮັບຟັງການປະກອບຄຳເຫັນຂອງຕົວແທນປະເທດສະມາຊິກຈຳນວນໜຶ່ງ ທັງນີ້ກໍ່ເພື່ອພ້ອມກັນແກ້ໄຂບັນຫາທີ່ຄົງຄ້າງ ແລະ ສົ່ງເສີມບັນຫາທີ່ໄປໄດ້ດີ ເພື່ອເປົ້າໝາຍການພັດທະນາຂອງປະເທດ ແລະ ຫຼາຍປະເທດສະມາຊິກໄດ້ມີການຍ້ອງຍໍຊົມເຊີຍໂຄງການແຊມາອືນດົງ ທີ່ເຮັດໄດ້ດີໃນການລຶບລ້າງຄວາມທຸກຍາກຂອງປະຊາຊົນເຂດຊົນນະບົດ ຖືກກັບແນວທາງການພັດທະນາປະເທດຂອງແຕ່ລະປະເທດ.
ສຳລັບ ສປປ ລາວ ໄດ້ເຂົ້າເປັນສະມາຊິກໂຄງການແຊມາອືນດົງ ນັບແຕ່ປີ 2009 ເປັນຕົ້ນມາ ເຊິ່ງເລີ່ມຕົ້ນຢູ່ບ້ານຫາດໄຊ ເມືອງທຸລະຄົມ ແຂວງວຽງຈັນ ແລະ ປັດຈຸບັນໄດ້ຂະຫຍາຍອອກໄປສູ່ ບ້ານລິ່ງຊັນ ບ້ານນາແກ່ວ ບ້ານແຈ້ງ ແລະ ບ້ານຈຸ້ມ ເມືອງທຸລະຄົມ ແລະ ບ້ານປາກແຖບ ເມືອງສັງທອງ ນະຄອນຫຼວງວຽງຈັນ ເປົ້າໝາຍຂອງໂຄງການແມ່ນພັດທະນາບ້ານ ໂດຍປະຊາຊົນມີສ່ວນຮ່ວມໃນການເລືອກໂຄງການພັດທະນາ ແລະ ໂຄງການຈະເນັ້ນກິດຈະກຳພັດທະນາພື້ນຖານໂຄງລ່າງສ້າງຖະໜົນຫົນທາງ ເປັນຕົ້ນ ທາງຮ່ອມ ທາງຊອຍພາຍໃນບ້ານ ເຮັດໃຫ້ການໄປມາຂອງປະຊາຊົນມີຄວາມສະດວກ ເຊິ່ງການຈັດຕັ້ງປະບັດໂຄງການຈະໃຫ້ທຶນຊ່ວຍເຫຼືອວັດຖຸທີ່ຈຳເປັນ ແລະ ປະຊາຊົນມີສ່ວນຮ່ວມຕາມທ່າແຮງ ເປັນຕົ້ນ ແຮງງານໄມ້ແບບ ແລະ ສ່ວນອື່ນໆ ນອກຈາກກິດຈະກຳນີ້ແລ້ວ ຍັງມີກິດຈະກຳປູກຝັງ-ລ້ຽງສັດ ເປັນຕົ້ນ ໃຫ້ທຶນປຸກສ້າງເຮືອນຮົ່ມ ປູກພືດກະສິກຳ ປູກເຫັດ ໃຫ້ທຶນລ້ຽງປາ ລ້ຽງກົບ ລ້ຽງງົວ ສ້າງຕັ້ງກອງທຶນ ແລະ ອື່ນໆ ເພື່ອເຮັດໃຫ້ການພັດທະນາໂຄງການແຊມາອືນດົງ ຢູ່ແຕ່ລະບ້ານໄປໄດ້ດີ ແລະ ມີປະສິດທິຜົນ ແຕ່ລະປີໂຄງການແຊມາອືນດົງ ຍັງໄດ້ໃຫ້ທຶນເຝິກອົບຮົມຢູ່ສູນເຝິກອົບຮົມໂຄງການແຊມາອືນດົງ ສ ເກົາຫຼີ ຈຳນວນຫຼາຍທຶນ ໃນການເປັນຜູ້ນຳໂຄງການໃຫ້ແກ່ອຳນາດການປົກຄອງບ້ານ ຫົວໜ້າຫ້ອງການ ໂຄງການປະຈຳບ້ານ ອຳນາດການປົກຄອງເມືອງ ຂະແໜງການກ່ຽວຂ້ອງຂອງເມືອງຂອງແຂວງ ແລະ ອາຈານສອນພາກວິຊາກ່ຽວຂ້ອງຂອງມະຫາວິທະຍາໄລແຫ່ງຊາດ ແລະ ໂຄງການດັ່ງກ່າວ ກໍ່ເປັນໂຄງການໜຶ່ງທີ່ປະຊາຊົນໄດ້ຮັບຜົນປະໂຫຍດ ແລະ ໄດ້ຮັບການຊຸກຍູ້ສົ່ງເສີມຈາກອຳນາດການປົກຄອງທ້ອງຖິ່ນ ແລະ ຂະແໜງການກ່ຽວຂ້ອງພາກລັດ ອັນໄດ້ເຮັດໃຫ້ໂຄງການໄດ້ຂະຫຍາຍອອກໄປສູ່ຫຼາຍບ້ານຢູ່ເຂດຊົນນະບົດ.
No comments:
Post a Comment