ຜູ້ນຳເກົາຫຼີເໜືອ ມີຄວາມສົນໃຈເອົາສິງກະໂປເປັນຕົ້ນແບບໃນການພັດທະນາປະເທດ

ສຳນັກຂ່າວຕ່າງປະເທດລາຍງານ 12 ມິຖຸນາ 2018 ວ່າ ສຳນັກຂ່າວກາງເກົາຫຼີ (KCNA) ລາຍງານວ່າ ພາລະກິດຂອງທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ເມື່ອວັນຈັນທີ່ຜ່ານມາ ເປັນການທ່ຽວຊົມ ແລະ ຢ້ຽມຢາມສະຖານທີ່ສຳຄັນຕ່າງໆຂອງສິງກະໂປ ບໍ່ວ່າຈະເປັນສວນພຶກສາສາດ Gardens by The Bay, ຮູບປັ້ນສິງ Merlion ແລະ ຊັ້ນດາດຟ້າຂອງໂຮງແຮມມາຣິນາ ເບ ແຊນ.
ເຊິ່ງທ່ານ ຄິມ ຈອງ-ອຶນ ກ່າວຂອບໃຈທ່ານ ວິວຽນ ບາລາກຣິສນັນ ລັດຖະມົນຕີກະຊວງການຕ່າງປະເທດສິງກະໂປ ແລະ ທ່ານ ອ໋ອງ ເຢ ກັງ ລັດຖະມົນຕີກະຊວງສຶກສາທິການຂອງສິງກະໂປ ທີ່ເຮັດໜ້າທີ່ນຳພາທ່ຽວຊົມແຕ່ລະສະຖານທີ່ ແລະ ກ່າວວ່າສິງກະໂປເປັນປະເທດທີ່ມີຄວາມສະອາດສະອ້ານ ແລະ ເປັນລະບົບລະບຽບຫຼາຍ ເຊິ່ງເປັນພາບລັກທີ່ໜ້າປະທັບໃຈເປັນຢ່າງຍິ່ງ ພ້ອມທັງສະແດງຄວາມຫວັງວ່າຈະໄດ້ມີໂອກາດຮຽນຮູ້ນະໂຍບາຍການພັດທະນາຂອງປະເທດແຫ່ງນີ້ເພີ່ມເຕີມ ໂດຍສະເພາະດ້ານການຍົກລະດັບຄວາມສາມາດທາງເສດຖະກິດ ເພື່ອນຳໄປປະຍຸກໃຊ້ກັບເກົາຫຼີເໜືອຕໍ່ໄປ, ຂະນະດຽວກັນ ທ່ານ ຄິມ ຈອງ-ອຶນ ກໍ່ໄດ້ຮ່ວມຖ່າຍພາບສ່ວນຕົວກັບທ່ານລັດຖະມົນຕີສອງກະຊວງດັ່ງກ່າວຂອງສິງກະໂປອີກດ້ວຍ ແລະ ຍັງໄດ້ມີການໂບກມືທັກທາຍພ້ອມທັງຮອຍຍິ້ມໃຫ້ແກ່ປະຊາຊົນທີ່ພາກັນມາຖ້າຊົມຜູ້ນຳຂອງເກົາຫຼີເໜືອຢ່າງໃກ້ຊິດຕາມເສັ້ນທາງ.