ປະຊາຊົນ 68.5 ລ້ານຄົນ ໃນທົ່ວໂລກ ຖືກບັງຄັບ ໃຫ້ຍົກຍ້າຍຖິ່ນຖານ

ອົງການອົບພະຍົບ ຂອງສະຫະປະຊາຊາດ ກ່າວວ່າ ປະຊາຊົນ 68 ລ້ານ 5 ແສນຄົນ
ໃນທົ່ວໂລກ ທີ່ມີຈຳນວນຫຼາຍເປັນປະຫວັດການ ໄດ້ຖືກບັງຄັບໃຫ້ຫລົບໜີອອກຈາກ
ເຮືອນຊານ ຂອງພວກເຂົາເຈົ້າ ເມື່ອປີກາຍນີ້ ຍ້ອນສົງຄາມ ຄວາມຮຸນແຮງ ແລະການ
ຖືກປະຫັດປະຫານ.

ທ່ານ ຟີລິບໂປ ກຣານດີ ຂ້າຫລວງໃຫຍ່ ດ້ານອົບພະຍົບ ຂອງອົງການສະຫະປະຊາຊາດ
ໄດ້ກ່າວຕໍ່ບັນດານັກຂ່າວ ຢູ່ທີ່ນະຄອນເຈນີວາ ໃນວັນອັງຄານວານນີ້ ວ່າ ຈຳນວນຫລ້າ
ສຸດສຳລັບປີ 2017 ແມ່ນ ຫຼາຍກວ່າ ປີ 2016 ເກືອບ 3 ລ້ານ. ທ່ານ ໄດ້ກ່າວອີກວ່າ ຫຼາຍ
ກວ່າ 16 ລ້ານຄົນ ແມ່ນພວກຄົນທີ່ຫາກໍຖືກພັດຖິ່ນມາໃໝ່ໆ ໃນປີກາຍນີ້ ຍ້ອນບັນຫາ
ຂັດແຍ້ງ ທີ່ມີຢູ່ຕໍ່ເນື່ອງ ແລະຍືດເຍື້ອ ແລະ ບໍ່ສາມາດແກ້ໄຂ ຕໍ່ບັນຫາຂັດແຍ້ງເຫຼົ່ານັ້ນໄດ້
ທີ່ໄດ້ “ສືບຕໍ່ກົດດັນພວກພົນລະເຮືອນທັງຫຼາຍ.”

ທ່ານ ກຣານດີ ໄດ້ກ່າວຕໍ່ໄປວ່າ ຫຼາຍກວ່າ ສອງສ່ວນສາມ ຂອງພວກອົບພະຍົບທັງໝົດ
ຕົ້ນຕໍແມ່ນມາຈາກປະເທດຈຳນວນນຶ່ງ ທີ່ປະກອບດ້ວຍ ອັຟການິສຖານ ຊີເຣຍ ຊູດານໃຕ້
ແລະ ສາທາລະນະລັດ ປະຊາທິປະໄຕ ຄອງໂກ. ທ່ານກ່າວວ່າ ອົງການນີ້ ໄດ້ພົບເຫັນວ່າ
85 ເປີເຊັນ ຂອງພວກອົບພະຍົບທັງໝົດ ແມ່ນມາຈາກປະເທດທີ່ທຸກຍາກ ຫຼື ມີລາຍໄດ້
ປານກາງ ເຊິ່ງ “ຄວນເປັນອົງປະກອບທີ່ປັດເປົ່າຄວາມເຊື່ອ” ທີີ່ວ່າ ອັນນີ້ເປັນ“ວິກິດ
ການ ຂອງປະເທດທີ່ຮັ່ງມີ.”