ທະຫານ ອັຟການິສຖານ 30 ຄົນ ເສຍຊີວິດ ໃນການໂຈມຕີ ຂອງ ກະບົດຕາລີບານ

ມີທະຫານອັຟການິສຖານ 30 ຄົນຖືກຂ້າຕາຍເວລາພວກຫົວຮຸນແຮງທີ່ສົງໄສວ່າ ເປັນ
ກຸ່ມຕາລີບານ ໄດ້ໂຈມຕີດ່ານກວດຂອງພວກທະຫານ 2 ແຫ່ງ ໃນວັນພຸດມື້ນີ້.

ຫົວໜ້າສະພາປະຈຳແຂວງ ທີ່ແຂວງແບັດກີ (Badghis) ໃນພາກຕາເວັນຕົກຂອງປະ
ເທດ ກ່າວວ່າ ການໂຈມຕີເລີ້ມຂຶ້ນໃນຕອນແລງຂອງຄືນວັນອັງຄານໃນເຂດເມືອງບາ
ລາ ເມີກາບ (Bala Murghab) ແລະແກ່ຍາວມາຈົນຮອດຕອນເຊົ້າວັນພຸດມື້ນີ້.

ກຸ່ມຕາລີບານຍັງບໍ່ທັນໄດ້ອອກມາອ້າງເອົາຄວາມຮັບຜິດຊອບເທື່ອກ່ຽວກັບການໂຈມ
ຕີດັ່ງກ່າວ ຊຶ່ງມີຂຶ້ນຫຼັງຈາກການຢຸດຍິງເປັນເວລາ 3 ມື້ ເນື່ອງໃນໂອກາດການສະເຫຼີມ
ສະຫຼອງບຸນອີດ ອາລ-ຟີດເຕີ.

ອະດີດຜູ້ປົກຄອງປະເທດຂອງອັຟການິສຖານ ໄດ້ຖືກຂັບໄລ່ອອກຈາກອຳນາດໂດຍ
ກຳລັງທີ່ຢູ່ພາຍໃຕ້ການນຳພາຂອງອົງການເນໂຕ້ ລຸນຫຼັງການໂຈມຕີຂອງພວກກໍ່ການ
ຮ້າຍ ທີ່ນະຄອນຫຼວງວໍຊິງຕັນແລະນິວຢອກ ໃນປີ 2001 ໃນຖານໃຫ້ບ່ອນພັກພາອາ
ໄສແກ່ກຸ່ມກໍ່ການຮ້າຍອາລກາອີດາແລະຜູ້ນຳຂອງກຸ່ມດັ່ງກ່າວທ້າວໂອຊາມາ ບິນ ລາ
ເດັນ.