ທະຫານອິສຣາແອລ ຍິງສັງຫານກຸ່ມປະທ້ວງ ຊາວປາແລັສໄຕນ໌ ຢູ່ເຂດຊາຍແດນ ກາຊາ

ກຳລັງຂອງອິສຣາແອລ ໄດ້ຍິງ ແລະສັງຫານ ຊາວປາແລັສໄຕນ໌ ຄົນນຶ່ງ ແລະເຮັດໃຫ້
ຢ່າງໜ້ອຍ 12 ຄົນບາດເຈັບ ໃນວັນຈັນມື້ນີ້ ຢູ່ຕາມຊາຍແດນຂອງເຂດກາຊາ ບ່ອນທີ່
ຫຼາຍພັນຄົນ ໄດ້ໄປເຕົ້າໂຮມກັນເພື່ອປະທ້ວງ ໃນການທີ່ ສະຫະລັດ ໄດ້ກຽມພ້ອມ ທີ່ຈະ
ຍ້າຍສະຖານທູດຂອງຕົນ ຈາກນະຄອນ ແທລລາວີບ ໄປຍັງນະຄອນຫຼວງເຈຣູຊາແລັມ
ນັ້ນ.

ບັນດາແພດຂອງທ້ອງຖິ່ນ ໄດ້ລາຍງານວ່າ ມີການສູນເສຍຊີວິດ ແລະບາດເຈັບ ໃນ
ການປະທະກັນຫຼາຍຄັ້ງ ໃນວັນຈັນມື້ນີ້ ໂດຍຄັ້ງຫຼ້າສຸດ ໃນຮອບ 6 ສັບປະດາ ຂອງ
ການເດີນຂະບວນປະທ້ວງ ແລະ ເກີດຄວາມຮຸນແຮງ ທີ່ລວມທັງ ການຍິງສັງຫານ
ຊາວປາແລັສໄຕນ໌ ຫຼາຍກວ່າ 40 ຄົນ ໂດຍພວກທະຫານຂອງອິສຣາແອລ.

ພວກວິພາກວິຈານ ໄດ້ຖິ້ມໂທດໃສ່ກຳລັງຂອງອິສຣາແອລ ທີ່ໃຊ້ລູກປືນແທ້ ໃນ
ຂະນະທີ່ ອິສຣາແອລ ກໍກ່າວວ່າ ການກະທຳຂອງຕົນທັງຫຼາຍ ແມ່ນຈຳເປັນເພື່ອ
ຄວາມປອດໄພ ຂະນະທີ່ພວກຄົນທັງຫຼາຍ ເປັນໄພຂົ່ມຂູ່ຕໍ່ຮົ້ວກັ້ນຊາຍແດນ.

ນອກເໜືອຈາກການຍິງປືນໃສ່ພວກປະທ້ວງທີ່ເກີດຂຶ້ນໃໝ່ໆໃນວັນຈັນມື້ນີ້ ຈາກຟາກ
ຂອງອິສຣາແອລ ແລ້ວ ກຳລັງຮັກສາຄວາມສະຫງົບ ຍັງໄດ້ຍິງລູກແກັສນ້ຳຕາ ເຂົ້າໄປ
ແຖວຫຼັງຂອງພວກປະທ້ວງ ແຕ່ພວກຝຸງຄົນ ກໍປາກົດວ່າ ບໍ່ຍອມຖອຍ ແລະ ສືບຕໍ່
ປຸ້ມລຸມເຂົ້າກັນຢູ່.

ພ້ອມກັນກັບ ການບໍ່ເຫັນດີນຳ ການຍ້າຍສະຖານທູດສະຫະລັດນັ້ນ ຊາວປາແລັສໄຕນ໌
ຍັງທຳການປະທ້ວງ ເພື່ອເປັນຂີດໝາຍ ວັນຄົບຮອບນຶ່ງປີ ຂອງອັນທີ່ພວກເຂົາເຈົ້າເອີ້ນ
ວ່າ “ນັກບາ” ຫຼື “ຄວາມຫາຍະນະ” ໃນການອ້າງອີງເຖິງ ຊາວປາແລັສໄຕນ໌ ຫຼາຍພັນ
ຄົນ ຜູ້ທີ່ໄດ້ຖືກຂັບໄລ່ ຫຼື ຫລົບໜີໄປ ໃນປາງສົງຄາມປີ 1948 ທີ່ກ່ຽວພັນກັບການກໍ່ຕັ້ງ
ອິສຣາແອລ ນັ້ນ.

ສະຖານທູດສະຫະລັດແຫ່ງໃໝ່ ແມ່ນເປັນສະຖານທີ່ປະຕິບັດງານຊົ່ວຄາວ ພາຍໃນ
ອາຄານ ຂອງກົງສຸນສະຫະລັດ ທີ່ມີຢູ່ແລ້ວ ຢູ່ໃນນະຄອນຫຼວງ ເຈຣູຊາແລັມ ໃນຂະ
ນະທີ່ ພວມຊອກຫາສະຖານທີ່ ທີ່ໃຫຍ່ກວ່າເກົ່າຢູ່.