ເຈົ້າໜ້າທີ່ສະຫະລັດ ອາເມລິກາຢ້ຽມຢາມເກົາຫຼີເໜືອຫາລືປະຊຸມສຸດຍອດ “ທຣັມ-ຄິມ”

ສຳນັກຂ່າວຣອຍເຕີຈາກນະຄອນໂຊລ ປະເທດເກົາຫຼີໃຕ້ ເມື່ອວັນທີ່ 27 ພຶດສະພາ ວ່າທັງປຽງຢາງ ແລະ ວໍຊິງຕັນຕ່າງກໍ່ກຳລັງພັກດັນ ແຜນການປະຊຸມຂັ້ນສຸດຍອດລະຫວ່າງປະທານາທິບໍດີໂດນັນ ທຮັມ ຜູ້ນຳສະຫະລັດ ແລະ ທ່ານ ຄິມ ຈອງ ອຶນ ຜູ້ນຳເກົາຫຼີເໜືອ ຫຼັງຈາກທຮັມປະກາດຍົກເລີກແຜນການພົບປະໃນວັນທີ່ 12 ມິຖຸນາ ທີ່ສິງກະໂປ ໃນວັນພະຫັດ ( 23 ພຶດສະພາ) ແຕ່ໄດ້ທົບທວນໃນວັນຕໍ່ມາ

ປະທານາທິບໍດີມຸມ ແຈ ອິນ ຜູ້ນຳເກົາຫຼີໃຕ້ ເຜີຍວ່າ ທ່ານ ແລະທ່ານ ຄິມ ຕົກລົງກັນລະຫວ່າງການພົບປະກັນເມື່ອວັນເສົາ ວ່າ ການປະຊຸມສຸດຍອດ ເກົາຫຼີເໜືອ – ສະຫະລັດ ອາເມລິກາ ຈະຕ້ອງເກີດຂື້ນ

ໜັງສືພິມວໍຊິງຕັນ ຂອງອາເມລິກາ ລາຍງານການເປີດເຜີຍຂອງບຸກຄົນໃກ້ຊິດກັບການກຽມການວ່າ ທ່ານ ຊັງ ຄິມ ອາດີດເອກອັກຄະລາຊະທູດສະຫະລັດປະຈຳເກົາຫຼີໃຕ້ ແລະ ຜູ້ແທນເຈລະຈານິວເຄຣຍກັບເກົາຫຼີເໜືອ ຜູ້ນຳການກຽມການໃນຝ່າຍຂອງອາເມລິກາ ໂດຍທ່ານ ຊັງ ຄິມ ຂ້າມແດນຈາກເກົາຫຼີໃຕ້ເຂົ້າສູ່ເກົາຫຼີເໜືອເມື່ອວັນອາທິດ ພ້ອມດ້ວຍ ນາງ ແອລດິສັນ ຮູເຄີ ຜູ້ຊ່ຽວຊານເກົາຫຼີຂອງສະພາຄວາມໝັ້ນຄົງແຫ່ງຊາດທຳນຽບຂາວ ແລະ ເຈົ້າໜ້າທີ່ກະຊວງປ້ອງກັນປະເທດອາເມລິກາອີກຄົນໜຶ່ງ ແລະ ໄດ້ພົບປະກັບ ທ່ານ ໂຊຊອນ ຮຸຍ ລັດຖະມົນຕີຊ່ວຍກະຊວງການຕ່າງປະເທດເກົາຫຼີເໜືອ

ເຈົ້າໜ້າທີ່ທາງການສະຫະລັດ ອາເມລິກາ ກ່າວຢືນຢືນວ່າ ທ່ານ ຊັງ ຄິມ ເຊິ່ງປັດຈຸບັນເປັນເອກອັກຄະລາຊະທູດສະຫະລັດ ປະຈຳຟິລິປິນ ນຳຄະນະພົບປະກັບເຈົ້າໜ້າທີ່ເກົາຫຼີເໜືອ ທີ່ບໍລິເວນເຂດແດນ ຊ່ວງທ້າຍອາທິດນີ້ ເພື່ອກຽມການສຳລັບປະຊຸມສຸດຍອດ ການພົບຫາລືຄາດວ່າຈະມີຕໍ່ໄປໃນວັນຈັນ ແລະ ວັນອັງຄານ

ທີ່ປະເທດສິງກະໂປເມື່ອວັນອາທິດ ປະຊາຊົນທີ່ກຳລັງຍ່າງຫຼີ້ນຜັກຜ່ອນບໍລິເວນເມີໄລອ້ອນ ປາກ ຕ່າງກໍ່ຕົກໃຈ ເມື່ອ ທ່ານ ຄິມ ຈອງ ອຶນ ຜູ້ນຳເກົາຫຼີເໜືອປາກົດທີ່ນັ້ນ ກ່ອນຄົນຈະເຂົ້າມາຮຸ້ມລ້ອມ ແລະ ຮູ້ຄວາມຈິງວ່າ ແທ້ຈິງເຂົາເປັນຄົນໜ້າຄື ເຜີຍຊື່ພຽງ “ ຮາວເວີດ ເອັກ” ຊາວຈີນຮ່ອງກົງ – ອອສເຕເຣຍ

ຮາວເວີດ ເອັກ ເຜີຍຕໍ່ຜູ້ສື່ຂ່າວວ່າ ເຂົາໄປຢ້ຽມຢາມເພື່ອອວຍພອນໃຫ້ການປະຊຸມໃຫ້ປະຊຸມສຸດຍອດລະຫວ່າງ ທຣັມກັບຄິມ ທີ່ສິງກະໂປເກີດຂຶ້ນຈິງ ແລະ ການເຈລະຈາປະສົບຜົນສຳເລັດຕາມເປົ້າໝາຍ ນັ້ນຄືຢຸດຕິໂຄງການນິວເຄຍຂອງເກົາຫຼີເໜືອ

ຄົນໜ້າຄືເຜີຍອີກວ່າ ນັບຕັ້ງແຕ່ ຄິມ ຈອງ ອຶນ ຂື້ນເປັນຜູ້ນຳເກົາຫຼີເໜືອໃນປີ 2011 ເຮັດໃຫ້ເຂົາຈະເລີນຮຸ່ງເຮືອງນຳໄປດ້ວຍ ມີຄົນຕິດຕໍ່ໃຫ່ສະແດງໜັງ ອອກລາຍການໂທລະທັດ ເປັນພີເຊັນເຕີໂຄສະນາ ແລະ ວຽກເອກະຊົນຕ່າງໆ ເຊິ່ງສ່ວນໃຫ່ຍຢູ່ໃນຮ່ອງກົງບ້ານເກີດ