ທຸງຊາດ ເກົາຫຼີເໜືອ ຖືກຊັກຂຶ້ນ ສູ່ປາຍເສົາ ຢູ່ທີ່ໝູ່ບ້ານ ໂອລິມປິກ ໃນເກົາຫຼີໃຕ້

ທຸງຊາດເກົາຫຼີເໜືອ, ຊ້າຍ, ປິວສະບັດ ຢູ່ຮ່ວມກັບທຸງຊາດອື່ນໆ ຈາກຫຼາຍປະເທດ ຢູ່ໃນໝູ່ບ້ານໂອລິມປິກ ຂອງເມືອງ ກາງເນີງ ທີ່ເປັນເຈົ້າພາບຈັດ ການແຂ່ງຂັນກິລາໂອລິມປິກ ລະດູໜາວ ປີ 2018 ຂອງເກົາຫຼີໃຕ້, ວັນທີ 1 ກຸມພາ 2018.

ທຸງຊາດຂອງເກົາຫຼີເໜືອ ໄດ້ຖືກຊັກຂຶ້ນສູ່ປາຍເສົາ ທີ່ຄຸ້ມບ້ານພັກ ສຳລັບບັນດານັກ
ກິລາ ທີ່ເຂົ້າຮ່ວມໃນການແຂ່ງຂັນກິລາໂອລິມປິກລະດູໜາວເຊິ່ງຈະມີຂຶ້ນຢູ່ເກົາຫຼີໃຕ້
ໃນໄວໆນີ້.

ທຸງຊາດເກົາຫຼີເໜືອໄດ້ເລີ່ມປິວສະບັດ ຢູ່ທີ່ຄຸ້ມບ້ານພັກ ນັກກິລາໂອລິມປິກ ໃນເມືອງ
ພຽງຈາງ ທີ່ເປັນເຈົ້າພາບຈັດງານ ແລະ ເມືອງກາງເນີງ ເຊິ່ງຕັ້ງຢູ່ຫ່າງຈາກນະຄອນ
ຫຼວງໂຊລ ໄປທາງກ້ຳຕາເວັນອອກ ປະມານ 230 ກິໂລແມັດ ນຶ່ງວັນຫຼັງຈາກທີ່ໄດ້ມີ
ການຈັດພິທີຕ່າງໆ ເພື່ອເປີດຄຸ້ມບ້ານພັກ ນັກກິລາໂອລິມປິກ ຢ່າງເປັນທາງການ.

ມີການຊັກຊ້ານຶ່ງວັນ ໃນການຊັກທຸງດັ່ງກ່າວຂຶ້ນສູ່ປາຍເສົາ ຍ້ອນກົດໝາຍດ້ານ
ຄວາມໝັ້ນຄົງ ທີ່ເຄັ່ງຄັດຂອງເກົາຫຼີໃຕ້ ໄດ້ຫ້າມບໍ່ໃຫ້ປັກທຸງຊາດ ຂອງເກົາຫຼີເໜືອ.
ບັນດາເຈົ້າໜ້າທີ່ ຈຶ່ງໄດ້ໃຫ້ການຍົກເວັ້ນຕໍ່ທຸກໆສະຖານທີ່ ທີ່ກ່ຽວຂ້ອງກັບການແຂ່ງ
ຂັນກິລາໂອລິມປິກລະດູໜາວ ລວມທັງບ້ານພັກຂອງບັນດານັກກິລາ ແລະ ສະໜາມ
ກິລາ ທີ່ຈັດການແຂ່ງຂັນຕ່າງໆ ນຳດ້ວຍ.

ທຸງຊາດຂອງເກົາຫຼີເໜືອ ໄດ້ຖືກຊັກຂຶ້ນສູ່ປາຍເສົາ ທັນກັບເວລາ ເພື່ອຕ້ອນຮັບ ທີມ
ນັກກິລາໂອລິມປິກ ຂອງເກົາຫຼີເໜືອ ຈຳນວນ 10 ຄົນ ທີ່ມີກຳນົດ ຈະເດີນທາງໄປ
ຮອດເກົາຫຼີໃຕ້ ໃນຕອນແລງວັນພະຫັດມື້ນີ້. ພວກເຂົາເຈົ້າຈະເຂົ້າຮ່ວມ ກັບພວກ
ນັກກິລາຕີຄີເທິງນ້ຳກ້ອນ ເພດຍິງ ຈຳນວນ 12 ຄົນ ທີ່ໄດ້ເດີນທາງໄປຮອດ ເມື່ອ
ສັບປະດາແລ້ວນີ້ ເພື່ອເຂົ້າຮ່ວມ ກັບນັກກິລາເກົາຫຼີໃຕ້ ໃນການຝຶກຊ້ອມ ເປັນທີມ
ນຶ່ງດຽວຂອງເກົາຫຼີ.