ລະເບີດທະນາຄານໃນມຽນມາ ຕາຍ2 ເຈັບ 11ຄົນ

ມີຜູ້ເສຍຊີວິດ 2ສົບ ແລະ ບາດເຈັບ 11ຄົນຈາກເຫດລະເບີດພາຍໃນທະນາຄານໃນເມືອງລ່າສ້ຽວ ລັດຊານທາງຕອນເຫນືອຂອງມຽນມາ

ສຳນັກຂ່າວຕ່າງປະເທດລາຍງານຈາກເມືອງລ່າສ້ຽວ ລັດຊານປະເທດມຽນມາເມື່ອວັນທີ 21ກຸມພາວ່າ: ເຈົ້າຫນ້າທີ່ຝ່າຍຄວາມຫມັ້ນຄົງຂອງມຽນມາເປີດເຜີຍວ່າ: ເກີດເຫດລະເບີດພາຍໃນທະນາຄານໂຍມາ ສາຂາເມືອງລ່າສ້ຽວໃນລັດຊານ ທາງຕອນເຫນືອຂອງມຽນມາເມື່ອວັນພຸດທີ 21ກຸມພາ ແຮງລະເບີດເຮັດໃຫ້ມີຜູ້ເສຍຊີວິດ 2ສົບ ເປັນພະນັກງານຫຍິງ 2ຄົນຂອງທະນາຄານ ແລະ ບາດເຈັບອີກ 11ຄົນ ຕົວອາຄານໃກ້ຄຽງໄດ້ຮັບຄວາມເສຍຫາຍໄປນຳເພາະແຮງລະເບີດຂ່ອນຂ້າງຮຸນແຮງ ນອກນັ້ນກໍ່ມີລົດຝຫຍ່ອີກຫລາຍຄັນເຈົ້າຫນ້າທີ່ຝ່າຍຄວາມຫມັ້ນຄົງ ເຂົ້າກວດສອບພື້ນທີ່ເກີດເຫດແລ້ວ
ຍັງບໍ່ມີກຸ່ມໃດອອກມາປະກາດອ້າງຄວາມຮັບຜິດຊອບເຫດໂຈມຕີດ້ວຍລະເບີດໃນຄັ້ງນີ້ ແຕ່ລັດຊານເປັນລັດທີ່ມີຫລາຍຊາດພັນອາໄສຢູ່ ແຕ່ການໂຈມຕີໃນເຂດເມືອງນັ້ນເກີດຂື້ນຫນ້ອຍຄັ້ງ
ທ່ານຊໍ ເຕ ໂຄສົກລັດຖະບານມຽນມາຖະແຫລງຜ່ານທາງເຟດບຸກວ່າ: ຫຍິງບໍລິສຸດ 2ຄົນຕ້ອງມາເສຍຊີວິດ ແລະ ພົນລະເຮືອນອີກ 11ຄົນບາດເຈັບເພາະເຫດລະເບີດ ຂະນະທີ່ທະນາຄານໂຍມາອອກຖະແຫລງການສະແດງຄວາມເສຍໃຈຕໍ່ການສູນເສຍທີ່ເກີດຂື້ນ ແລະ ຍືນຍັດເປັນນື່ງດຽວຂອງທະນາຄານພາຍໃຕ້ສະຖານະການອັນຫນ້າເສົ້າສະຫລົດ ສ່ວນຕຳຫລວດໃນກຸງເນປິດໍກ່າວຍືນຍັນວ່າ: ມີການເສຍຊີວິດແທ້ ແລະ ຜູ້ບາດເຈັບໄດ້ຮັບການຊ່ວຍເຫລືອສົ່ງໂຮງຫມໍແລ້ວ.