ຂະບວນລົດໄຟຕົກລາງ ໃນລັດວໍຊິງຕັນ ສົ່ງຜົນເຮັດໃຫ້ມີ ຫຼາຍຄົນເສຍຊີວິດ

ຄະນະສືບສວນລັດຖະບານກາງສະຫະລັດ ກ່າວວ່າ ຂະບວນລົດໄຟທີ່ໄດ້ຕົກລາງໃນ
ວັນຈັນວານນີ້ ໃນພາກຕາເວັນຕົກສຽງເໜືອຂອງສະຫະລັດ ໃນລັດວໍຊີງຕັນ ແມ່ນໄດ້
ແລ່ນໃນຄວາມໄວ 129 ກິໂລແມັຕ ຕໍ່ຊົ່ວໂມງ ຕາມລາງ ບ່ອນທີ່ຄວາມໄວຂອງມັນ
ແມ່ນມີແຕ່ 48 ກິໂລແມັຕ ຕໍ່ຊົ່ວໂມງ.

ລົດໄຟ ໄດ້ຕົກລາງຮອບໆເຂດນະຄອນຊີອາໂຕ້ (Seattle) ເຮັດໃຫ້ຕູ້ລົດໄຟບາງຕູ້
ຫຼົ່ນລົງໃສ່ຖະໜົນສາຍຫຼັກ ທີ່ຢູ່ກ້ອງທາງລົດໄຟນັ້ນ ແລະສັງຫານ ພວກໂດຍສານ
ຢ່າງນ້ອຍ 3 ຄົນ.

ສະມາຊິກຄະນະກຳມະການດ້ານຄວາມປອດໄພແຫ່ງຊາດ ທ່ານນາງ ແບລລາ
ດິນ-ຊາຣ໌ (Bella Dinh-Zarr) ໄດ້ບອກພວກນັກຂ່າວວ່າ ຄະນະສືບສວນ ໄດ້ທຳ
ການທົດສອບຂໍ້ມູນສະຖິຕິທີ່ເກັບກຳໄວ້ຈາກນຶ່ງໃນ ສອງຄະບວນ ຊຶ່ງເຮັດໃຫ້ມັນ
ແລ່ນໄວໃນລາງໃໝ່ ເປັນຄັ້ງທຳອິດ.

ພວກລົດ ທີ່ລົດໄຟ ແອມເທຣັກ (Amtrak) ທີ່ຕົກລາງ ໃສ່ຖະໜົນສາຍຫຼັກ 5 ທີ່ຢູ່ທາງລຸ່ມ ແລະລົດໄຟບາງຕູ້ຍັງເຫັນຢູ່ໃນລາງ, 18 ທັນວາ 2017, ທີ່ ດຸຍປົງ, ວໍຊີງຕັນ.

ທ່ານນາງ ດິນ-ຊາຣ໌ (Dinh-Zarr)ໄດ້ບອກຄະນະກຳມະການດ້ານຄວາມປອດໄພ
ແຫ່ງຊາດ ວ່າພວກຕົນ ພ້ອມທີ່ຈະປະຕິບັດໜ້າທີ່ໃນສະຖານທີ່ເກີດເຫດ ໃນວັນອັງ
ຄານມື້ນີ້ ແລະວ່າ ການສືບສວນ ຈະເປັນການສຳພາດພວກປະຕິບັດໜ້າທີ່ ເພື່ອ
ກວດສອບເບິ່ງວ່າ ແມ່ນຫຍັງແລະເປັນຫຍັງ ຄືສາເຫດຂອງການຜິດພາດຄັ້ງນີ້.

ທ່ານນາງໄດ້ກ່າວວ່າ “ມັນເປັນອຸບປະຕິເຫດທີ່ສະຫຼັບສັບຊ້ອນ.”

ໂດຍທົ່ວໄປແລ້ວ ຄະນະກຳມະການດ້ານຄວາມປອດໄພແຫ່ງຊາດ ຈະໄປປະຕິບັດ
ໜ້າທີ່ໃນສະຖານທີ່ດັ່ງກ່າວເປັນເວລາ 7 ຫາ 10 ມື້ ກ່ອນທີ່ຈະໄດ້ວິເຄາະຂໍ້ມູນ ທີ່ພວກເຂົາເຈົ້າເກັບກຳມາໄດ້ ແລະອອກຖະແຫຼງການໃນການຄົ້ນພົບຄັ້ງນີ້.

ນອກຈາກພວກເຄາະຮ້າຍທີ່ເສຍຊີວິດແລ້ວ, ເຈົ້າໜ້າທີ່ທ້ອງຖິ່ນຍັງໄດ້ກ່າວວ່າ ໄດ້ມີຜູ້ຄົນຫຼາຍກວ່າ 100 ຄົນ ໄດ້ຮັບບາດເຈັບ.