ສະຫວັນນະເຂດແກ້ໄຂລົດບໍ່ຖືກຕ້ອງເກືອບ 3 ພັນຄັນ

ປີ 2017 ກອງກວດກາພາສີ ປະຈຳແຂວງສະຫວັນນະເຂດ ໄດ້ຮັບຕົວເລກແຜນການຈັດເກັບລາຍຮັບເຂົ້າງົບປະມານແຫ່ງລັດ ຈຳນວນ 9 ຕື້ກີບ, ແຕ່ຜ່ານການຈັດຕັ້ງປະຕິບັດວຽກງານວິຊາສະເພາະຕົວຈິງນັບແຕ່ເດືອນມັງກອນຫາວັນທີ 23 ພະຈິກ 2017 ສາມາດປະຕິບັດໄດ້ທັງໝົດ 51 ຕື້ກວ່າກີບ ເທົ່າກັບ 568,68%, ລືື່ນແຜນການປີ 460,95% ຄິດເປັນຕົວເລກເງິນລື່ນແຜນການປະມານ 42 ຕື້ກວ່າກີບ. ທັງນີ້, ກໍ່ຍ້ອນການແກ້ໄຂລົດບໍ່ຖືກຕ້ອງຈຳນວນ 2.716 ຄັນ. ໃນນັ້ນ, ເປັນປະເພດລົດໃຫຍ່ 1.401 ຄັນ, ລົດຈັກ 1.315 ຄັນ.

ທ່ານ ຄຳພອນ ຫານຊະນະຮອງຫົວໜ້າກອງກວດກາພາສີປະຈຳແຂວງສະຫວັນນະເຂດໃຫ້ສຳພາດວ່າ: ດ້ານແນວຄິດການເມືອງຄະນະກອງກວດກາພາສີປະຈຳແຂວງ ໄດ້ເອົາໃຈໃສ່ສຶກສາອົບຮົມໃຫ້ສະມາຊິກພັກ, ພະນັກນັກງານ, ເຜີຍແຜ່ເຊື່ອມຊຶມບັນດາແນວທາງນະໂຍບາຍຂອງພັກ-ລັດ, ມະຕິຕ່າງໆຂອງພັກ, ກົດໝາຍຂອງລັດ,ຍົກສູງຄວາມຮູ້ຄວາມສາມາດເຂົ້າຮ່ວມດຳເນີນຊີວິດການເມືອງ ແລະ ຖືເອົາການຕໍານິຕິຊົມຕົນເອງເປັນພື້ນຖານການກໍ່ສ້າງເພື່ອເປັນການປະກອບສ່ວນຢ່າງຕັ້ງໜ້າເຂົ້າໃນການພາລະກິດປ່ຽນແປງໃໝ່ຢ່າງຮອບດ້ານ, ພ້ອມທັງຕີຖອຍປະກົດການຫຍໍ້ທໍ້ຕ່າງໆໃນຂະແໜງພາສີໂດຍສະເພາະໃນກອງກວດກາພາສີປະຈຳແຂວງໃຫ້ຫຼຸດໜ້ອຍຖອຍລົງເທື່ອລະກ້າວ…ດ້ານວິຊາສະເພາະກອງກວດກາພາສີປະຈຳແຂວງປະກອບມີ 2 ຈຸງານຄື: ຈຸງານປະຕິບັດໜ້າທີ່ວິຊາສະເພາະ ແລະ ຈຸງານປະສານສົມທົບກັບອົງການປົກຄອງທ້ອງຖິ່ນ, ພະນັກງານ-ເຈົ້າໜ້າທີ່ພາສີປະຈຳກອງກວດກາທັງໝົດ 34 ສະຫາຍ, ຍິງ 5 ສະຫາຍ, ມີຄະນະກອງກວດກາ 4 ສະຫາຍ, ໃນແຕ່ລະໄລຍະຄະນະກອງກວດກາພາສີໄດ້ຊັບຊ້ອນໝູນວຽນພະນັກງານ-ສະມາຊິກພັກຕາມຄວາມຮູ້ຄວາມສາມາດ ແລະ ແບ່ງຄວາມຮັບຜິດຊອບຢ່າງລະອຽດ.

ທ່ານ ຄຳພອນ ຫານຊະນະຍັງໄດ້ເນັ້ນຕື່ມອີກວ່າ: ອີງຕາມການມອບໝາຍຈາກກົມພາສີ ກະຊວງການເງິນ ມອບໝາຍໃຫ້ກອງກວດກາພາສີປະຈຳແຂວງສະຫວັນນະເຂດໃນປີ 2017 ຈັດເກັບລາຍຮັບເຂົ້າງົບປະມານແຫ່ງລັດຈຳນວນ 9 ຕື້ກີບ, ແຕ່ຜ່ານການຈັດຕັ້ງປະຕິບັດນັບແຕ່ເດືອນມັງກອນຫາວັນທີ 23 ພະຈິກ 2017 ສາມາດຈັດເກັບລາຍຮັບໄດ້ 51 ຕື້ກວ່າກີບ ເທົ່າກັບ 568,68% ຂອງການແຜນການປີ, ຖ້າທຽບໃສ່ແຜນການສາມາດປະຕິບັດໄດ້ລືື່ນແຜນ 460,95% ຄິດເປັນຕົວເລກເງິນລື່ນແຜນການປະມານ 42 ຕື້ກວ່າກີບ. ສາເຫດທີ່ພາໃຫ້ການຈັດເກັບລາຍຮັບລື່ນແຜນການແມ່ນຍ້ອນການແກ້ໄຂລົດບໍ່ຖືກຕ້ອງທີ່ແຂວງຂຶ້ນບັນຊີໄວ້ທັງໝົດ 5.702 ຄັນ, ໃນນັ້ນ, ປະເພດລົດຈັກ 3.835 ຄັນ, ລົດໃຫຍ່ 1,867 ຄັນ ( ລົດກະບະ 1.627 ຄັນ, ລົດເກັງ 77 ຄັນ,  ລົດຈິບ 159 ຄັນ, ລົດຕູ້ 4 ຄັນ) ແລະ ສາມາດແກ້ໄຂໄດ້ແລ້ວທັງໝົດ  2.716 ຄັນ. ໃນນັ້ນ, ລົດໃຫຍ່ 1.401 ຄັນ, ລົດຈັກ 1.315 ຄັນ ສາມາດເກັບລາຍຮັບເຂົ້າງົບປະມານໄດ້ຫຼາຍກວ່າ 40 ຕື້ກີບ. ນອກນັ້ນ, ຍັງມີລາຍຮັບຈາກເກັບພາສີນຳສິ້ນສ່ວນພາຫະນະ ແລະ ອາໄຫຼ່, ປະເພດເຄື່ອງກໍ່ສ້າງ, ເຄື່ອງໃຊ້ໄຟຟ້າ, ເຄື່ອງອຸປະໂພກ-ບໍລິໂພກ ແລະ ເຄື່ອງສິນຄ້າອື່ນໆ.

ສຳລັບແຜນຄາດຄະເນຈັດກັບລາຍຮັບເຂົ້າງົບປະມານໝົດປີ 2017 ຂອງກອງກວດກາພາສີປະຈຳແຂວງສະຫວັນນະເຂດ, ຖ້າຫາກວ່າທາງຄະນະຮັບຜິດຊອບໂດຍສະເພາະແມ່ນຄະນະນຳຈາກກະຊວງການເງິນ ອະນຸຍາດໃຫ້ແກ້ໄຂລົດທີ່ບໍ່ຖືກຕ້ອງທີ່ເຈົ້າໜ້າພາສີຂອງກອງກວດກາພາສີປະຈຳແຂວງໄດ້ຢຶດມາໄວ້ຈຳນວນ 6 ຄັນ ແລະ ອີກ 17 ຄັນແມ່ນເຈົ້າໜ້າທີ່ພາສີໄດ້ຮ່ວມກັບຄະນະສະເພາະກິດຂອງແຂວງຄາດວ່າການເກັບລາຍຮັບເຂົ້າງົບປະມານຈະບັນລຸເຖິງ 53 ຕື້ກີບ.