ຂປລ. ເມື່ອທ້າຍເດືອນຕຸລາ ທີ່ຜ່ານມາ ພະແນກການຄ້າ ແຂວງຢູນໜານ ສປ ຈີນ ໄດ້ຈັດງານ ແນະນໍາກ່ຽວກັບ ຜະລິດຕະພັນ ແລະ ວິສາຫະກິດຈີນ (ຢູນໜານ) ຢູ່ສູນການຄ້າ ລາວ-ໄອເຕັກ ນະຄອນຫລວງວຽງຈັນ, ໂດຍມີທ່ານ ຈັນທະຈອນ ວົງໄຊ ຮອງປະທານ ສະພາອຸດສາຫະກໍາ ແລະ ການຄ້າແຫ່ງ ສປປ ລາວ, ທ່ານ ໂຮ້ຈີງຢຸ້ ຜູ້ຄົ້ນຄວ້າຂະແໜງການຄ້າອາຊຽນ ພະແນກການຄ້າແຂວງຢູນໜານ,ມີບັນດາຜູ້ຕາງໜ້າ ຂອງບໍລິສັດລາວ ແລະ ບໍລິສັດຈີນ, ພ້ອມດ້ວຍພາກສ່ວນກ່ຽວ ຂ້ອງ ເຂົ້າຮ່ວມ.
ໂອກາດດັ່ງກ່າວ, ທ່ານ ໂຮ້ຈີງຢຸ້ ກ່າວວ່າ: ເພື່ອເຮັດໃຫ້ສາຍພົວພັນ ມິດຕະພາບຂອງ ລາວ-ຈີນ ນັບມື້ນັບ ເຕີບໃຫຍ່ ຂະຫຍາຍຕົວຂຶ້ນຢ່າງບໍ່ຢຸດຢັ້ງ, ແຂວງຢູນໜານ ກໍຄື ບັນດາວິສາຫະກິດ ຢູນໜານ ຈະປະຕິບັດຕາມ ການສະເໜີຂອງ “ໜຶ່ງເສັ້ນທາງໜຶ່ງແລວທາງ”, ພາກັນກ້າວອອກໄປສູ່ຕ່າງ ປະເທດ ແລະ ຈະໃຫ້ການສະໜັບສະໜູນ ຢ່າງຫລວງຫລາຍ ແກ່ການຮ່ວມມື ລະຫວ່າງ ລາວ-ຈີນ ໃນອະນາຄົດແລະ ຫວັງວ່າຝ່າຍລາວ ຈະໃຫ້ການສະໜັບສະໜູນ, ສົ່ງເສີມການຮ່ວມມື ຂອງສອງຝ່າຍ.
ທ່ານ ຈັນທະຈອນວົງໄຊກ່າວວ່າ: ສະພາອຸດສາຫະກໍາ ແລະ ການຄ້າ ແຫ່ງ ສປປ ລາວ ຈະໃຫ້ການສະໜັບສະໜູນ ຢ່າງສຸດຄວາມສາມາດແລະ ຊຸກຍູ້, ສົ່ງເສີມວຽກງານການຄ້າ ລາວ-ຈີນໃຫ້ໄດ້ຮັບ ການພັດທະນາ ແລະ ແຕກດອກອອກຜົນຍິ່ງໆຂຶ້ນ ໃນອະນາຄົດ.
ພ້ອມດຽວກັນ, ທ່ານ ເຈົ່າຫລີນ ຜູ້ຈັດການທົ່ວໄປ ຂອງໂຊເຈນ (SOJEN) ພາຫະນະ ແຫ່ງກິດຈະການໂປເຈນສາຂາ ສປປ ລາວ ໃຫ້ຮູ້ວ່າ: ໂຊເຈນ ແມ່ນຜະລິດຕະພັນໜຶ່ງ ທີ່ຂາຍດີທີ່ສຸດໃນຕະຫລາດ ສປປ ລາວມີຫລາຍກວ່າ 30 ລຸ້ນແລະໄດ້ກຽມລົດ ໄວ້ຫລາຍກວ່າ 1800 ຄັນເພື່ອຕອບສະໜອງ ຄວາມຕ້ອງການ ໃນເວລາໃກ້ໆນີ້ ຂອງຕະຫລາດລາວ. ປັດຈຸບັນໂຊເຈນ ມີສາຂາຈໍາໜ່າຍສິນຄ້າ 17 ແຫ່ງ ແລະມີຮ້ານຮ່ວມຈໍາໜ່າຍ 10 ກວ່າຮ້ານ.ຕະຫລອດໄລຍະ 20 ກ່ວາປີຜ່ານມາ, ໂຊເຈນ ໄດ້ປະດິດຄິດສ້າງ ບັນດານະວັດຕະກໍາໃໝ່ຂຶ້ນມາ ຢ່າງບໍ່ຢຸດຢັ້ງ, ເພື່ອເປັນການສະແຫວງຫາຄວາມດີເລີດ, ເອົາໃຈໃສ່ໃນການຜະລິດລົດ ດ້ວຍເຕັກນິກທີ່ທັນສະໄໝ.
No comments:
Post a Comment