ຂປລ. ວັນທີ 3 ພະຈິກ ກົງກັບມື້ຂຶ້ນ 15 ຄ່ຳ, ເດືອນ 12 (ລາວ) ພສ 2560 ເຊິ່ງເປັນມື້ສຸດທ້າຍ ຂອງບຸນນະມັດສະການ ພະທາດຫລວງວຽງຈັນ ແລະ ຢູ່ໃນບັນຍາກາດ ແຫ່ງການສະເຫລີມສະຫລອງ ພິທີສົມໂພດລາພອນ ປະຕິສັງຂອນ ພະທາດຫລວງວຽງຈັນ ຄົບຮອບ 451 ປີ. ພ້ອມເປີດປີທ່ອງທ່ຽວລາວ 2018. ບຸນນະມັດສະການ ພະທາດຫລວງ ຖືເປັນປະເພນີອັນດີງາມ ຂອງປະຊາຊົນລາວບັນດາເຜົ່າທີ່ສືບທອດ ແລະ ປະຕິບັດກັນ ມາແຕ່ບູຮານນະການ, ນັບວ່າເປັນບຸນປາງໃຫຍ່ ອີກບຸນໜຶ່ງຂອງຊາວລາວເຮົາ ທີ່ໄດ້ຈັດຂຶ້ນເປັນປະຈຳທຸກໆປີ.
ເປັນກຽດເຂົ້າຮ່ວມ ພິທີດັ່ງກ່າວ, ມີບັນດາຜູ້ນໍາ ພັກ-ລັດ, ນຳໂດຍທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ, ທ່ານ ທອງລຸນ ສີສຸລິດ ນາຍົກລັດຖະມົນຕີ, ພະອາຈານໃຫຍ່ ມະຫາງອນ ດໍາລົງບຸນ ປະທານສູນກາງອົງການ ພຸດສາສະໜາສໍາພັນລາວ (ອພສ) ແລະ ບັນດາການນຳພັກ-ລັດ ຊາວພຸດທະສາສະນິກະຊົນ ລາວບັນດາເຜົ່າ ໃນຂອບເຂດ ທົ່ວປະເທດ ກໍຄື ມວນຊົນຊາວນະຄອນຫລວງວຽງຈັນ, ຕ່າງກໍໄດ້ເຂົ້າຮ່ວມ ທຳບຸນໃສ່ບາດຖວາຍສັງຄະທານ ແດ່ພະພິຂຸສົງສຳມະເນນ ຫລາຍກວ່າພັນອົງ, ພ້ອມຮັບຟັງທຳມະເທດສະໜາ ຕາມຄຳສອນຂອງ ພະສຳມາສຳພຸດທະເຈົ້າ ຕໍ່ການໃຫ້ທານ, ຖືສິນພາວະນາຕາມຮີດຄອງ ປະເພນີອັນດີງາມ ທີ່ມີມາແຕ່ບູຮານນະການ. ເຊິ່ງການເຮັດບຸນສິນທານ, ແມ່ນເພື່ອລະນຶກເຖິງ ຄຸນງາມຄວາມດີແລະ ອຸທິດບຸນກຸສົນແດ່ ພະເຈົ້າໄຊຍະເສດຖາທິຣາດ ທີ່ເປັນຜູ້ສ້າງ ແລະ ປະຕິສັງຂອນ ພະທາດຫລວງວຽງຈັນ. ມາຮອດປັດຈຸບັນ ແມ່ນເປັນຄັ້ງທີ 4 ທີ່ໄດ້ມີການປະຕິສັງຂອນຄືນໃໝ່ ແລະ ປັບປຸງພະທາດຫລວງອີກຄັ້ງ, ໂດຍໄດ້ໂອບຄໍາໃສ່ ຈອມພະທາດຫລວງນໍ້າໜັກ 9 ກິໂລ 9 ບາດ ແລະ 9 ສະຫລຶງ, ໂບກຮອຍແຕກແຫງອົງພະທາດ ແລະ ຫໍໄຫວ້ ທັງສີດ້ານ, ທາສີຄໍາອົງພະທາດໃຫຍ່, ພະທາດປາລະມີ 30 ລູກ, ພະທາດສີທໍາມະຫາຍໂສກ ແລະ ຫໍກວມ, ບູລະນະຫລັງຄາ ກົມມະລຽນຄືນໃໝ່, ສ້ອມແປງຊຸ້ມປະຕູທັງ 4 ດ້ານ, ປັງປຸງພື້ນ, ລະບົບລະບຽງ, ຮ່ອງນໍ້າອ້ອມຂ້າງ, ໄຟຟ້າ ແລະ ອື່ນໆ ລວມມູນຄ່າ 12 ຕື້ກວ່າກີບ.
ຂ່າວ: ຂັນໄຊ, ພາບ: ວຽງສະຫວັນ
No comments:
Post a Comment