ຂປລ. ທ່ານ ນາມ ວິຍະເກດ ເຈົ້າແຂວງອັດຕະປື ໄດ້ເປີດເຜີຍໃຫ້ຮູ້ ເມື່ອບໍ່ດົນມານີ້ວ່າ: ໃນປີ 2017 ແຂວງອັດຕະປື ດ້ານເສດຖະກິດມະຫາພາກ ມີການເຕີບໂຕຢ່າງຕໍ່ເນື່ອງ ສະເລ່ຍຢູ່ໃນລະດັບ 8%, ສະເລ່ຍລາຍຮັບຕໍ່ຫົວຄົນ 15 ລ້ານກວ່າກີບຕໍ່ຄົນຕໍ່ປີ ຫລື ເທົ່າກັບ 1.980 ໂດລາສະຫະລັດ ຕໍ່ຄົນຕໍ່ປີ, ອັດຕາເງິນເຟີ້ຢູ່ໃນລະດັບ 0,45%, ດ້ານການລົງທຶນ ສາມາດດຶງດູດນັກລົງທຶນ ຈາກພາກເອກະຊົນທັງພາຍໃນ ແລະ ຕ່າງປະເທດໄດ້ 4 ໂຄງການ ມີມູນຄ່າທັງໝົດ 40 ກວ່າລ້ານໂດລາສະຫະລັດ ຫລື ປະມານ 325 ຕື້ກີບ. ໃນນັ້ນຂັ້ນສູນກາງອະນຸມັດມີ 1 ໂຄງການ, ການລົງທຶນສ່ວນໃຫ່ຍ ແມ່ນສຸມໃສ່ດ້ານກະສິກຳ, ການບໍລິການ ແລະ ການພັດທະນາ ນິຄົມອຸດສາຫະກຳ, ໃນໄລຍະ 9 ເດືອນຂອງປີ 2017 ສາມາດເກັບລາຍຮັບພາຍໃນແຂວງ ບັນລຸໄດ້ 54 ຕື້ກວ່າກີບ, ເທົ່າກັບ 40% ຂອງແຜນການດັດແກ້, ລາຍຮັບດຸນດ່ຽງມີ 2 ຮ້ອຍກວ່າຕື້ກີບ, ກວມເອົາ 92% ຂອງແຜນການດັດແກ້, ປະຕິບັດລາຍຈ່າຍບັນລຸໄດ້ 243 ກວ່າຕື້ກີບ, ກວມເອົາ 69% ຂອງແຜນການດັດແກ້.
ທ່ານ ນາມ ວິຍະເກດ ກ່າວຕື່ມວ່າ: ຄຽງຄູ່ກັບການຂະຫຍາຍຕົວ ທາງດ້ານເສດຖະກິດມະຫາພາກ ໃນດ້ານວຽກງານຂົງເຂດ ວັດທະນະທຳ-ສັງຄົມ ກໍມີການຂະຫຍາຍຕົວເຊັ່ນກັນ ເປັນຕົ້ນອັດຕາການເຂົ້າຮຽນສຸດທິ ຊັ້ນປະຖົມຫລອດເຫລືອ ປ5, ມັດທະຍົມຕົ້ນ ແລະ ຕອນປາຍ ແມ່ນມີອັດຕາເພີ່ມຂຶ້ນ, ອັດຕາການປະລະການຮຽນ ແລະ ຄ້າງຫ້ອງມີທ່າອ່ຽງຫລຸດລົງ, ສ່ວນອັດຕາການຮູ້ໜັງສື ຂອງປະຊາຊົນໃນເກນອາຍຸ 15 ປີ ຂຶ້ນໄປກວມເອົາ99%, ມາຮອດປັດຈຸບັນ ສາມາດປະກາດເມືອງຈົບຊັ້ນປະຖົມໄດ້ແລ້ວມີ 2 ເມືອງ ຄື ເມືອງສາມັກຄີໄຊ ແລະ ເມືອງໄຊເສດຖາ, ດ້ານຄອບຄົວ ແລະ ບ້ານວັດທະນະທຳ ກໍມີອັດຕາເພີ່ມຂຶ້ນ ພື້ນຖານໂຄງລ່າງ ດ້ານການທ່ອງທ່ຽວທຳມະຊາດ, ວັດທະນະທຳ ແລະ ປະຫວັດສາດ ມີການພັດທະນາ ແລະ ໄດ້ຮັບການສົ່ງເສີມຢ່າງແຂງແຮງ, ຕາໜ່າງສາທາລະນະສຸກ ໄດ້ກວມເອົາ 100% ໃນເຂດຊົນນະບົດຫ່າງໄກສອກຫລີກ, ປ້ອງກັນ ແລະ ການສັກຢາກັນພະຍາດໄດ້ຮັບການຈັດຕັ້ງປະຕິບັດຢ່າງກວ້າງຂວາງ, ການປະຕິບັດນະໂຍບາຍປິ່ນປົວເສຍຄ່າ ແລະ ບໍ່ເສຍຄ່າ ມີການເຄື່ອນໄຫວຢ່າງຕັ້ງໜ້າ ແລະ ດີຂຶ້ນກວ່າເກົ່າ, ການກໍ່ສ້າງ ແລະ ພັດທະນາສີມືແຮງງານ ກໍເຮັດໄດ້ໄປພ້ອມໆກັນກັບການຄຸ້ມຄອງແຮງງານ ທັງພາຍໃນ ແລະ ຕ່າງປະເທດ, ການປະຕິບັດນະໂຍບາຍ ຕໍ່ຜູ້ທີ່ມີຜົນງານຄຸນງາມ ຄວາມດີຕໍ່ການປະຕິວັດ, ຕໍ່ຜູ້ພິການ ແລະ ເສຍອົງຄະ ກໍຈັດຕັ້ງປະຕິບັດໄດ້ດີສົມຄວນ.
ຂ່າວ: ແຂວງອັດຕະປື ວັດທະນາ ຫລວງອາໄພ
No comments:
Post a Comment