ເຫັນແລ້ວເສົ້າ... ພາບຄວາມເສຍຫາຍ ຈາກພາຍຸ ຢູ່ບ້ານເມືອງເກິນ ເມືອງຊໍາໃຕ້ ເຊິ່ງເປັນບ້ານວິລະຊົນ

 ເມືອງຊຳໃຕ້ແຂວງຫົວພັນ ໄດ້ຮັບຜົນກະທົບຢ່າງຮ້າຍແຮງ ທີ່ສຸດເທົ່າທີ່ເຄີຍມີມາຈາກພາຍຸເຂດຮ້ອນທີ່ພັດຜ່ານເມື່ອ ວັນທີ9-11ຕຸລາ 2017 ຜ່ານມາ  ເຮັດໃຫ້ທັງເຂົ້ານາ, ເຮືອນຊານທີ່ຢູ່ອາໄສ ແລະ ສິ່ງຂອງອື່ນໆຂອງປະຊາຊົນໄດ້ຮັບຜົນເສຍຫາຍຢ່າງໜັກ.

ໃນນີ້ຮ້າຍແຮງກວ່າໝູ່ແມ່ນບ້ານເມືອງເກິນ ເຊິ່ງເປັນບ້ານວິລະຊົນຂອງລາວຊື່ງຫ່າງຈາກເທດສະບານເມືອງຊຳໃຕ້ປະມານ 65 ກິໂລແມັດ ເຊິ່ງມີ ປະຊາຊົນ 36 ຄອບຄົວມີພົນລະເມືອງ 184 ຄົນ ໄດ້ຮັບຜົນກະທົບ, ແຕ່ໂຊກດີບໍ່ມີຜູ້ເສຍຊີວິດ.

ຈາກການລົງກວດກາຕົວຈິ່ງມີເຮືອນຊານຂອງປະຊາຊົນຖືກເສຍຫາຍ 60% ຂຶ້ນໄປຈຳນວນ 6 ຫຼັງ, ເສຍຫາຍ 100% ແມ່ນເຮືອນ 1 ຫຼັງ, ເລົ້າເຂົ້າ 23 ຫຼັງ, ເນື້ອທີ່ນາເສຍຫາຍ 20 ເຮັກຕາ, ເຂົ້າເປືອກເສຍຫາຍທັງໝົດ 90 ໂຕນ, ລົດຈັກ 28 ຄັນ, ລົດໄຖນາ 16 ຄັນ, ໂຮງສີເຂົ້າ 10 ເຄື່ອງ, ຫູກ ແລະ ກີ່ຕໍ່າຫູກ, ເຄື່ອງນຸ່ງຫົ່ມຕ່າງໆ,  ເຮືອນຄົວ ແລະ ເຄື່ອງໃຊ້ໃນເຮືອນຄົວ. ນອກນີ້ຍັງມີສັດລ້ຽງປະເພດງົວ 6 ໂຕ, ຄວາຍ 3 ໂຕ, ສັດປີກ 738 ໂຕ ແລະ ໜອງປາ 61 ໜອງຖືກເສຍຫາຍ ລວມມູນຄ່າເສຍຫາຍປະມານ 1 ຕື້ກວ່າກີບ.

ລາວອັບເດດຂໍເປັນສື່ກາງເຖິງປວງຊາວລາວ ຈົນພ້ອມກັນຊຸກຍູ້ຊ່ວຍເຫລືອປະຊາຊົນ ບ້ານເມືອງເກິນ ເມືອງແອດແຂວງຫົວພັນດ້ວຍ ໂດຍສາມາດປະສານພົວພັນໃຫ້ການຊ່ວຍເຫລືອໄປທີ່ພະແນກແຮງງານແລະສະຫວັດດີການສັງຄົມ ແຂວງຫົວພັນ ໂທ 064312048, 064314114
ຫລື ປະສານໄປທີ່ຫ້ອງວ່າການປົກຄອງແຂວງຫົວພັນ ໂທ 064312029