ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ VIII ໄຂຂຶ້ນຢ່າງເປັນທາງການ ໃນວັນທີ 16 ຕຸລາ 2017 ຢູ່ທີ່ຫ້ອງວ່າການສູນກາງພັກ ໂດຍການເປັນປະທານຂອງທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ໃຫ້ກຽດເຂົ້າຮ່ວມມີທ່ານ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດ ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍບັນດາການນຳພັກ-ລັດ ອະດີດການນຳຂັ້ນສູງນັກປະຕິວັດອາວຸໂສ ຜູ້ຊົງຄຸນວຸດທິ ສະມາຊິກສະພາແຫ່ງຊາດ ແລະ ແຂກຖືກເຊີນ.
ທ່ານນາງ ປານີ ຢາທໍ່ຕູ້ ກ່າວສູນທອນພົດມີບາງຕອນວ່າ: ປີ 2017 ເປັນປີທີ 2 ຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VIII ເຖິງວ່າສະພາບແວດລ້ອມ ທັງພາກພື້ນ-ສາກົນ ມີທັງກາລະໂອກາດ ແລະ ສິ່ງທ້າທາຍ ໄດ້ສົ່ງຜົນກະທົບແກ່ການພັດທະນາເສດຖະກິດ-ສັງຄົມຂອງປະເທດ ກໍ່ຕາມແຕ່ດ້ວຍຄວາມເອົາໃຈໃສ່ຊີ້ນຳ-ນຳພາຂອງພັກ-ລັດຖະບານ ອົງການຈັດຕັ້ງທຸກຂັ້ນ ທັງສູນກາງ ແລະ ທ້ອງຖິ່ນ ບວກກັບການເຂົ້າຮ່ວມຢ່າງຕັ້ງໜ້າຂອງປະຊາຊົນລາວບັນດາເຜົ່າ ເຮັດໃຫ້ປະເທດຊາດມີສະຖຽນລະພາບທາງດ້ານການເມືອງ ສັງຄົມມີຄວາມສະຫງົບປອດໄພໂດຍພື້ນຖານ ແລະ ເສດຖະກິດສືບຕໍ່ຂະຫຍາຍຢ່າງຕໍ່ເນື່ອງ ຊີວິດການເປັນຢູ່ຂອງພໍ່ແມ່ປະຊາຊົນ ໄດ້ຮັບການປັບປຸງດີຂຶ້ນເປັນກ້າວໆ ເຊິ່ງໃນກອງປະຊຸມທີ່ມີຄວາມໝາຍຄວາມສຳຄັນຄັ້ງນີ້ ສະພາແຫ່ງຊາດ ຈະໄດ້ສຸມໃສ່ພິຈາລະນາ ແລະ ຕົກລົງບັນຫາສຳຄັນຂອງຊາດ ຄື: ພິຈາລະນາ ແລະ ຮັບຮອງບົດລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຜນ ງົບປະມານແຫ່ງລັດ ແລະ ແຜນເງິນຕາ ປະຈຳປີ 2017 ແລະ ທິດທາງ 2018 ພິຈາລະນາ ແລະ ຮັບຮອງບົດລາຍງານກ່ຽວກັບການຈັດຕັ້ງປະຕິບັດ ແຜນການທ່ອງທ່ຽວໃນຊຸມປີຜ່ານມາ ແລະ ທິດທາງປີ 2018 ເພື່ອຮອງຮັບປີທ່ອງທ່ຽວລາວ ພິຈາລະນາ ແລະ ຮັບຮອງບົດລາຍງານການຈັດຕັ້ງປະຕິບັດການເຄື່ອນໄຫວ ປະຈຳປີ 2017 ແລະ ທິດທາງປີ 2018 ຂອງອົງການກວດສອບແຫ່ງລັດ ແລະ ຮັບຮອງບົດລາຍງານກ່ຽວກັບຜົນການກວດສອບສະຫຼຸບ ຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ສົກປີ 2015-2016 ແລະ ການແກ້ໄຂຜົນການກວດສອບງົບປະມານ ແລະ ການນຳໃຊ້ຊັບສິນຂອງລັດ ສົກປີ 2013-2014 ແລະ 2014-2015 ຂອງອົງການກວດກາລັດຖະບານພິຈາລະນາ ແລະ ຮັບຮອງບົດລາຍງານການຈັດຕັ້ງປະຕິບັດ ການເຄື່ອນໄຫວວຽກງານ ປະຈຳປີ 2017 ແລະ ທິດທາງ 2018 ຂອງສານປະຊາຊົນສູງສຸດ ແລະ ໄອຍະການປະຊາຊົນສູງສຸດ ພິຈາລະນາ ແລະ ຮັບຮອງບົດລາຍງານການຈັດຕັ້ງປະຕິບັດການເຄື່ອນໄຫວ ປະຈຳປີ 2017 ແລະ ທິດທາງ 2018 ຂອງສະພາແຫ່ງຊາດ ພິຈາລະນາ ແລະ ຮັບຮອງການສ້າງ-ປັບປຸງກົດໝາຍ ໃນຂົງເຂດເສດຖະກິດ-ສັງຄົມ ແລະ ຂົງເຂດປົກປ້ອງກົດໝາຍ ຈຳນວນ 16 ສະບັບ ໃນນັ້ນ ມີກົດໝາຍສ້າງໃໝ່ 9 ສະບັບ ປະກອບມີ: ຮ່າງກົດໝາຍວ່າດ້ວຍການປົກປ້ອງຜົນກະທົບຈາກການນຳເຂົ້າສິນຄ້າ ກົດໝາຍວ່າດ້ວຍອຸຕຸນິຍົມ ແລະ ອຸທົກກະສາດ ກົດໝາຍວ່າດ້ວຍວຽກງານກາແດງລາວ ກົດໝາຍວ່າດ້ວຍການຄຸ້ມຄອງໜີ້ສິນສາທາລະນະ ກົດໝາຍວ່າດ້ວຍການຖ່າຍທອດເຕັກໂນໂລຊີ ກົດໝາຍວ່າດ້ວຍລະບົບການຊຳລະ ກົດໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່ ກົດໝາຍວ່າດ້ວຍຜູ້ພິພາກສາ ແລະ ກົດໝາຍວ່າດ້ວຍການຈັດຊື້-ຈັດຈ້າງດ້ວຍທຶນຂອງລັດ ພ້ອມກັບກົດໝາຍປັບປຸງອີກ 7 ສະບັບ ປະກອບມີ: ຮ່າງກົດໝາຍວ່າດ້ວຍການດຳເນີນຄະດີອາຍາ ກົດໝາຍວ່າດ້ວຍການກວດກາລັດ ກົດໝາຍວ່າດ້ວຍຜັງເມືອງ ກົດໝາຍວ່າດ້ວຍສັນຊາດ ກົດໝາຍວ່າດ້ວຍອົງການກຳມະບານລາວ ກົດໝາຍວ່າດ້ວຍແຮ່ທາດ ແລະ ກົດໝາຍວ່າດ້ວຍຊັບສິນທາງປັນຍາ ນອກນີ້ ກອງປະຊຸມຍັງຈະໄດ້ຮັບຟັງການຊີ້ແຈງອະທິບາຍ ກ່ຽວກັບການປັບປຸງການບໍລິຫານລັດໃນທຸກຂັ້ນ ກໍ່ຄືການຄຸ້ມຄອງແຮງງານລາວຢູ່ພາຍໃນ-ຕ່າງປະເທດຂອງລັດຖະບານ ຮັບຟັງລາຍງານຜົນການຕິດຕາມກວດກາຂອງສູນກາງແນວລາວສ້າງຊາດ ແລະ ອົງການຈັດຕັ້ງມະຫາຊົນ ຕໍ່ກັບການປະຕິບັດໜ້າທີ່ຂອງສະພາແຫ່ງຊາດ ໂດຍສະເພາະແມ່ນ ສັງລວມຂໍ້ສະເໜີຂອງຜູ້ມີສິດປ່ອນບັດເລືອກຕັ້ງ ແລະ ຂອງປະຊາຊົນຕໍ່ກັບອົງການບໍລິຫານລັດເປັນຕົ້ນ.
ການດຳເນີນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ VIII ໄລຍະ 25 ວັນ (16 ຕຸລາ-17 ພະຈິກ 2017) ຖືເປັນກອງປະຊຸມທີ່ມີຄວາມໝາຍຄວາມສຳຄັນ ຍິ່ງຕໍ່ການຈັດຕັ້ງປະຕິບັດວຽກງານນິຕິບັນຍັດ ວຽກບໍລິຫານລັດ ກໍ່ຄືການຈັດຕັ້ງປະຕິບັດວຽກງານພັດທະນາເສດຖະກິດ-ສັງຄົມຂອງປະເທດຊາດ ດັ່ງນັ້ນ ຂໍເຊີນຊວນປະຊາຊົນບັນດາເຜົ່າ ໃນຂອບເຂດທົ່ວປະເທດ ຈົ່ງໄດ້ຕິດຕາມກອງປະຊຸມຢ່າງໃກ້ຊິດ ແລະ ສາມາດສະແດງຄວາມຄິດເຫັນ ຂໍ້ສະເໜີແນະສູ່ກອງປະຊຸມຄັ້ງນີ້ ໂດຍຜ່ານໂທລະສັບສາຍດ່ວນ ໝາຍເລກ 156 ໂດຍບໍ່ເສຍຄ່າ.
No comments:
Post a Comment