ລັດຖະບານ ເຜີຍ! ຫ້າມຮັບເອົາພະນັກງານອາສາສະໝັກເຂົ້າເປັນລັດຖະກອນ ຖ້າບໍ່ຜ່ານການເສັງ.

ນາຍົກລັດຖະມົນຕີແຫ່ງສປປລາວ ໄດ້ອອກຂໍ້ຕົກລົງເລກທີ 81/ນຍ ລົງວັນທີ 30 ພະຈິກ 2017 ວ່າດ້ວຍວ່າການແບ່ງຕົວເລກລັດຖະກອນໃໝ່ ປີ 2018 ຈໍານວນ 3,000 ຄົນ.ໃນນີ້ ຫຼາຍກວ່າໝູ່ຍັງແມ່ນກະຊວງສຶກສາທິການ ແລະ ກີລາ ຈໍານວນ 1,850 ຄົນ, ຮອງມາແມ່ນ ກະຊວງສາທາລະນະສຸກ ຈໍານວນ 440 ຄົນ, ກະຊວງກະສິກໍາ ແລະ ປ່າໄມ້ ຈໍານວນ 71 ຄົນ, ກະຊວງການເງິນ ຈຳນວນ 50 ຄົນ. ສ່ວນແຂວງທີ່ໄດ້ຫຼາຍແມ່ນໄຊສົມບູນ 20 ຄົນ ຮອງມາແມ່ນສະຫວັນນະເຂດ 13 ຄົນ.

ໃນຂໍ້ຕົກລົງ ໄດ້ເນັ້ນເຖິງການບັນຈຸລັດຖະກອນໃໝ່ນີ້ ຕ້ອງບົນພື້ນຖານຫຼັກການຄວາມສະເໝີພາບ, ເປີດເຜີຍ, ພາວະວິໄສ ແລະ ເປັນທໍາ, ຜູ້ທີ່ຖືກບັນຈຸເຂົ້າເປັນລັດຖະກອນ ຕ້ອງຜ່ານລະບົບການສອບເສັງເຂົ້າເປັນລັດຖະກອນ ແຫ່ງ ສປປ ລາວ ບົນພື້ນຖານຕຳແໜ່ງງານວ່າງ ແລະ ວິຊາສະເພາະທີ່ຕ້ອງການ ໃນກົງຈັກການຈັດຕັ້ງ ແລະ ບັນຈຸເຂົ້າໃນຂັ້ນເມືອງ, ຂັ້ນແຂວງເປັນຕົ້ນຕໍ ແລະ ຫ້າມຮັບເອົາພະນັກງານອາສາສະໝັກເຂົ້າເປັນລັດຖະກອນໂດຍບໍ່ຜ່ານການສອບເສັງ.

ນອກນັ້ນ, ການອະນຸມັດຕົວເລກລັດຖະກອນໃໝ່ ແຕ່ລະສົກງົບປະມານ ແມ່ນອະນຸມັດພຽງແຕ່ຄັ້ງດຽວ ແລະ ມີຜົນບັງຄັບໃຊ້ສະເພາະໃນສົກງົບປະມານ ທີ່ລັດຖະບານອະນຸມັດເທົ່ານັ້ນ. ສ່ວນພະນັກງານຕາມສັນຍາທີ່ໄດ້ຮັບບັນຈຸເຂົ້າເປັນລັດຖະກອນແລ້ວ ໃຫ້ຕັດອອກຈາກບັນຊີພະນັກງານຕາມສັນຍາ ແລະ ບໍ່ອະນຸຍາດໃຫ້ບັນດາກະຊວງ, ອົງການຂັ້ນສູນກາງ ແລະ ທ້ອງຖິ່ນ ຮັບເອົາພະນັກງານຕາມສັນຍາຕື່ມອີກ.

ເລກລັດຖະກອນໃໝ່ ທີ່ອະນຸມັດ ປີ 2018 ຈໍານວນ 3,000 ຄົນ ບັນຈຸໃຫ້ສໍາເລັດ ວັນທີ 1 ກໍລະກົດ 2018 ໂດຍມອບໃຫ້ກະຊວງພາຍໃນອອກຄໍາແນະນໍາລະອຽດ ເພື່ອຈັດຕັ້ງຜັນຂະຫຍາຍ ເຮັດໃຫ້ການບັນຈຸລັດຖະກອນ ດຳເນີນໄປຢ່າງມີປະສິດທິພາບ ແລະ ປະສິດທິຜົນ.

2017 ລັດຖະບານ ອະນຸມັດຮັບລັດຖະກອນໃຫມ່ ໃນຈຳນວນ 5,000 ຄົນ ໂດຍກະຊວງທີ່ໄດ້ຫຼາຍກວ່າໝູ່ແມ່ນ ກະຊວງ ສຶກສາທິການ ແລະ ກີລາ (ລັດຖະກອນບໍລິຫານ ແລະ ລັດຖະກອນຄູ) ຈຳນວນ 1,900 ຄົນ, ກະຊວງສາທາລະນະສຸກ 550 ຄົນ, ກະຊວງກະສິກຳ ແລະ ປ່າໄມ້ 175 ຄົນ, ສະພາແຫ່ງຊາດ 150 ຄົນ, ກະຊວງແຜນການ ແລະ ການລົງທຶນ 140 ຄົນ ແລະ ກະຊວງ ໂຍທາທິການ ແລະ ຂົນສົ່ງ 120 ຄົນ.

ໂກຕ້າລັດຖະກອນໃໝ່ປີໜ້າ 3 ພັນຄົນ ເຊິ່ງຂະແໜງສຶກສາ-ສາທາກວມສ່ວນໃຫຍ່, ສ່ວນຂະແໜງ ອື່ນຕ້ອງອົດໃຈລໍຖ້າປີຕໍ່ໄປ

ພະນັກງານທີ່ເປັນສັນຍາຈ້າງ, ອາສາສະໝັກ ຫຼື ຜູ້ມີຄວາມຫວັງຈາກຈະເຂົ້າເປັນພະນັກງານສັງກັດລັດ ນອກຈາກຂະແໜງສຶກສາ ແລະ ສາທາ ກໍ່ຕ້ອງໄດ້ທຳໃຈໄປອີກປີ, ເນື່ອງຈາກລັດຖະບານເຫັນດີໃນກອງປະຊຸມປະຈຳເດືອນຕຸລາ 2017 ຜ່ານມາວ່າ: ຈະຮັບລັດຖະກອນໃໝ່ໃນປີ 2018 ນີ້ ພຽງແຕ່ 3 ພັນຄົນເທົ່ານັ້ນ, ເຊິ່ງຈະຈັດສັນໄປຕາມບູລິມະສິດທີ່ລັດກຳນົດ ໂດຍສຸມໃສ່ຂະແໜງສຶກສາ ແລະ ສາທາລະນະສຸກ ແລະ ບັນດາເມືອງທຸກຍາກເປັນອັນດັບຕົ້ນໆ. ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ເນັ້ນຕໍ່ທີ່ປະຊຸມລັດຖະບານສະໄໝສາມັນປະຈຳເດືອນຕຸລາ 2017 ວ່າ: ການຈັດສັນໂຄຕາລັດຖະກອນໃນປີ 2018 ທີ່ສະພາຮັບຮອງໃນຈຳນວນ 3,000 ຕໍາແໜ່ງ ໃຫ້ໄປຕາມບຸລິມະສິດທີ່ລັດຖະບານກໍານົດໂດຍໃຫ້ບຸລິມະສິດແກ່ຂະແໜງການສຶກສາ, ສາທາລະນະສຸກ ແລະ ກະສິກຳຢູ່ບັນດາເມືອງທຸກຍາກ ແລະ ຂະແໜງການຢູ່ສູນກາງ ແລະ ທ້ອງຖິ່ນທີ່ຈຳເປັນແທ້ມີຕໍາແໜ່ງງານທີ່ຊັນເຈນ. ພ້ອມກັນນີ້ ກໍໃຫ້ຄັດເລືອກເອົາພະນັກງານທີ່ມີຄຸນນະພາບ, ມີຄວາມຮູ້, ຄວາມສາມາດ ແລະ ໄດ້ຕາມມາດຕະຖານ ຕາມເງື່ອນໄຂທີ່ຕໍາແໜ່ງງານກໍານົດດ້ວຍຄວາມໂປ່ງໃສ.…

1 ພະຈິກ 2017